Viral Video: భారత్ టూర్‌లో ఆఫ్రికన్‌ యువకుడి ఎమోషనల్ వీడియో..

Viral Video: ప్రపంచంలో ఎన్నో దేశాలు ఉన్నప్పటికీ, భారతదేశానికి వచ్చే పర్యాటకులు ఇక్కడ పొందే అనుభూతి పూర్తిగా భిన్నంగా ఉంటుంది. తాజాగా ఒక 21 ఏళ్ల ఆఫ్రికన్ యువకుడు భారతదేశంలో ఒంటరిగా (Solo Travel) గడిపిన రోజుల్లో తాను నేర్చుకున్న విషయాలను, పొందిన అనుభూతులను సోషల్ మీడియా వేదికగా పంచుకున్నాడు. ఈ ప్రయాణం ఆధ్యాత్మికత, చరిత్ర , తన సొంత గుర్తింపును తాను చూసే కోణాన్నే పూర్తిగా మార్చేసిందని అతను ఎంతో భావోద్వేగంగా రాసుకొచ్చాడు.

ఆర్థిక శాస్త్రంలో గ్రాడ్యుయేషన్ పూర్తి చేసి, ప్రపంచాన్ని ఒంటరిగా చుట్టేస్తున్న ఈ యువకుడు.. భారతదేశంలోని ఒక రద్దీగా ఉండే వీధిలో నడుస్తున్న వీడియోను ఇన్‌స్టాగ్రామ్‌లో పంచుకుంటూ, తాను గమనించిన ఐదు ముఖ్యమైన విషయాలను ప్రపంచంతో పంచుకున్నాడు.

వలసపాలన గాయాలు.. ఆఫ్రికన్లకు మాత్రమే తెలిసే బాధ.!

భారతదేశ చరిత్రపై ఆ యువకుడు చేసిన మొదటి వ్యాఖ్య అందరినీ ఆలోచింపజేస్తోంది. "ఒకప్పుడు ఈ భూమి ప్రపంచంలోనే అత్యంత సంపన్నమైన నాగరికతకు నిలయం. బ్రిటిష్ వారు మనల్ని పాలించడానికి ముందు ప్రపంచ జీడీపీలో భారతదేశం వాటా ఏకంగా 25 శాతంగా ఉండేది. ఇప్పుడు ఇక్కడి వీధుల్లో నడుస్తుంటే.. ఒకప్పటి ఆ వైభవం అవశేషాలు, పేదరికం మధ్య కొలువై ఉన్న గుడులలోని బంగారం కనిపిస్తాయి. ఆ వలసపాలన చేసిన గాయం ఇక్కడ ప్రతిచోటా స్పష్టంగా అనుభవంలోకి వస్తుంది. ఒక ఆఫ్రికన్‌గా ఆ బాధను నేను ఇంకా బాగా అర్థం చేసుకోగలను" అని అతను రాశాడు.

ఊహకు అందని జీవన విధానం.. లొంగిపోవాల్సిందే..!

భారతదేశంలోని శబ్దాలు, రంగులు , ఇక్కడి శక్తి (Energy) తనను ఎంతగానో ఆకట్టుకున్నాయని అతను తెలిపాడు. "భారతదేశంలో అడుగుపెట్టే ముందు ఇక్కడి వాతావరణం గురించి మనల్ని ఏదీ సిద్ధం చేయలేదు. ఇక్కడి వాహనాల హారన్ల శబ్దాలు, సువాసనలు, రంగులు, అసంఖ్యాకమైన జనం.. అంతా ఒకేసారి, ఎప్పుడూ రన్ అవుతూనే ఉంటాయి. మన మెదడు వీటన్నింటినీ ఫిల్టర్ చేయలేక అలసిపోతుంది. చివరికి మనల్ని మనం ఆ వాతావరణానికి పూర్తిగా అప్పగించేయాలి (Surrender). ఆశ్చర్యకరంగా, నా జీవితంలో నేను అత్యంత ప్రశాంతంగా, వర్తమానంలో బతికిన క్షణాలు ఇవే" అని అతను వివరించాడు.

కళ్లల్లో నీళ్లు తెప్పించిన ఆధ్యాత్మికత

భారతదేశపు ఆధ్యాత్మిక సంప్రదాయాలు తన మనసుపై అత్యంత లోతైన ప్రభావాన్ని చూపాయని ఆ యువకుడు పేర్కొన్నాడు. "ఇక్కడి ఆధ్యాత్మికత నాలోని అహాన్ని, డిఫెన్స్‌ను బద్దలు కొట్టింది. ఇది కేవలం ఒక టూరిస్ట్‌గా నేను చూసినది కాదు. ఇక్కడి పూజలు, ఆచారాలు, ప్రజల భక్తి వెనుక ఉన్న నిష్కపటమైన నమ్మకం నా హృదయాన్ని తాకింది. నా లోపల దాగి ఉన్న ఎన్నో భావోద్వేగాలు ఒక్కసారిగా బయటకు వచ్చాయి. ఒకరోజు నేను తెలియకుండానే ఏడ్చేశాను, కానీ ఎందుకు ఏడ్చానో ఇప్పటికీ నాకు పూర్తి క్లారిటీ లేదు" అంటూ ఆ దేశపు భక్తి భావనను కొనియాడాడు.

ఒక ఊహాజనిత అద్భుత ప్రపంచం

భారతదేశం తనకు ఒక ఫాంటసీ ప్రపంచంలా (కల్పిత కథలా) అనిపించిందని అతను తెలిపాడు. "నిజాయితీగా చెప్పాలంటే ఇది ఒక అద్భుత ప్రపంచంలా ఉంటుంది. ఇక్కడి కట్టడాల శైలి (ఆర్కిటెక్చర్), ఈ గందరగోళం, రంగులు.. ఇవన్నీ నిజంగానే ఉన్నాయా అనిపిస్తుంది. ఎవరో తమ పూర్తి ఊహాశక్తిని ఉపయోగించి ఈ నాగరికతను సృష్టించినట్లు ఉంటుంది. చిన్నప్పటి నుండి నేను చూస్తూ పెరిగిన ఏ సినిమా లేదా పుస్తకం కూడా నన్ను ఈ వింత ప్రపంచానికి సిద్ధం చేయలేదు" అని రాసుకొచ్చాడు.

దోచుకున్నా.. తగ్గని భారతదేశ సోల్..!

తన చివరి ముగింపుగా భారతదేశపు పట్టుదలను, స్థితిస్థాపకతను (Resilience) అతను అభినందించాడు. "బ్రిటిష్ వారు ఈ దేశాన్ని పూర్తిగా దోచుకున్నారు, వారికి వీలైనంత వరకు అంతా పట్టుకుపోయారు. అయినా సరే, ఈ దేశపు ఆత్మను (Soul) వారు ముక్కలు చేయలేకపోయారు. అది ఇప్పటికీ చెక్కుచెదరకుండా, అత్యంత స్పష్టంగా కనిపిస్తోంది. ఇందులో ఒక గొప్ప పాఠం ఉంది, దాన్ని నేను ఇప్పటికీ అర్థం చేసుకోవడానికి ప్రయత్నిస్తున్నాను" అని అతను ముగించాడు. ఈ పర్యటన కేవలం ప్రదేశాలను చూడటానికే పరిమితం కాలేదని, డబ్బు , ఒక వ్యక్తి గుర్తింపు (Identity) గురించి తాను ఆలోచించే విధానాన్ని కూడా ఈ ప్రయాణం మార్చేసిందని ఆ యువకుడు ఎంతో సంతోషంగా పంచుకున్నాడు.