The Legend of Karna Review: కర్ణుడి గాథకు విజువల్ ట్రీట్.. మిస్ కాకండి.!

The Legend of Karna Review: మహాభారతంలో ఎందరో వీరులు, రాజులు, యోధుల కథలు ఉన్నప్పటికీ, 'కర్ణుడు' పాత్రకు ఉన్న ప్రత్యేకత , క్రేజ్ ఎప్పుడూ వేరే స్థాయిలో ఉంటాయి. పుట్టుకతోనే కష్టాలు, జీవితాంతం సూతపుత్రుడనే అవమానాలు ఎదురైనా, తను నమ్మిన ధర్మానికి , ప్రాణ స్నేహానికి కట్టుబడిన ఆ మహావీరుడి ప్రయాణం ఎందరికో స్పూర్తిదాయకం. అలాంటి ఐకానిక్ పాత్ర ఆధారంగా అభిషేక్ శ్రీవాస్తవ అందించిన సరికొత్త యానిమేషన్ సిరీస్ 'ది లెజెండ్ ఆఫ్ కర్ణ' (సీజన్ 1). సోనీ లివ్ (SonyLIV) వేదికగా అలరిస్తున్న ఈ సిరీస్ మహాభారతంలోని అత్యంత ఆసక్తికరమైన నాయకుడి కథను ఎంతో సరళంగా, మనసుకి హత్తుకునేలా ఆవిష్కరించింది.

ఈ సిరీస్ కథనం రెండు వేర్వేరు కాలరేఖల్లో సమాంతరంగా చాలా ఆసక్తికరంగా సాగుతుంది. ఒకవైపు కుంతి దేవి చిన్నతనంలో దుర్వాస మహర్షి ఇచ్చిన దివ్య మంత్రంతో సూర్యభగవానుడిని ఆవాహన చేయడం, ఆ తర్వాత సామాజిక భయాలతో పుట్టిన బిడ్డను నదిలో వదిలేయడం వంటి సంఘటనలను చూపిస్తారు. మరొకవైపు సూత దంపతుల వద్ద రాధేయుడిగా పెరుగుతున్న కర్ణుడు, అంగరాజుగా మారి దుర్యోధనుడితో శాశ్వత స్నేహ బంధాన్ని ఎలా ఏర్పరచుకున్నాడనేది ప్రధానంగా చూపిస్తారు. హస్తినాపురంలో గురు ద్రోణాచార్యుడి శిష్యుల విద్యార్హతల ప్రదర్శన జరుగుతున్న సమయంలో ఒక విచిత్రమైన సంఘటన జరుగుతుంది. రంగుల రంగస్థలంలోకి లావాతో తయారైన ఒక రాక్షస సింహం ప్రవేశించి అర్జునుడిపై దాడి చేస్తుంది. ఆ సమయంలో ప్రేక్షక వరుసలో ఉన్న కర్ణుడు వెంటనే స్పందించి, తన బాణంతో ఆ రాక్షస మృగాన్ని అక్కడికక్కడే కూల్చేస్తాడు.

అయితే ఆ సింహాన్ని నిజంగా చంపేసింది ఎవరనే విషయంపై అర్జునుడు, కర్ణుడి మధ్య వివాదం రేగుతుంది. అర్జునుడు తన సత్తా చాటుకోవడానికి కర్ణుడిని ధనుర్విద్య యుద్ధానికి ఆహ్వానించగా, సూర్యాస్తమయం కావడంతో భీష్ముడు ఆ పోటీని ఆపుతారు. కర్ణుడిలోని అసమాన ప్రతిభను గుర్తించిన దుర్యోధనుడు, అతడిని అర్జునుడికి సరైన పోటీదారుడిగా భావిస్తాడు. రాజవంశీయుడు కాదనే కారణంతో పోటీకి అనర్హుడని మిగతావారు నిరసన తెలుపుతుండగా, దుర్యోధనుడు వెంటనే కర్ణుడికి 'అంగరాజ్యం' పట్టాభిషేకం చేసి తనతో సమానమైన స్థానాన్ని కల్పిస్తాడు. ఈ ఒక్క ఘట్టం కర్ణుడి జీవితాన్ని మలుపు తిప్పడమే కాకుండా, దుర్యోధనుడి పట్ల అతడికి ఉన్న ప్రాణత్యాగంతో కూడిన విశ్వాసానికి పునాది వేస్తుంది.

మహాభారతం కథ మనందరికీ బాగా తెలిసిందే అయినప్పటికీ, కథనాన్ని నడిపించిన తీరు వల్ల ఈ సిరీస్ ప్రేక్షకులను ఎక్కడా బోర్ కొట్టించదు. చాలా తక్కువ రన్‌టైమ్‌తో రూపుదిద్దుకున్న ఎపిసోడ్‌లు కథను వేగంగా ముందుకు తీసుకెళ్తాయి. నాటకీయత కోసం అనవసరమైన అభూతకల్పనలు లేదా అతిగా అనిపించే ఎమోషన్లు జోడించకపోవడం ఇందులో ఉన్న అతిపెద్ద బలం. సాధారణంగా పౌరాణిక కథనాల్లో ఉండే గ్రాంథిక పదాలు, పెద్ద పెద్ద కేకలు, నాటక తరహా సంభాషణలు కాకుండా చాలా సహజమైన మాటలను ఉపయోగించారు. కౌరవులు, పాండవులు తమలో తాము నవ్వుకుంటూ, సాధారణ మనుషుల్లా మాట్లాడుకోవడం పాత్రలకు ఒక రకమైన కొత్తదనాన్ని, రియలిస్టిక్ లుక్‌ను తీసుకొచ్చింది. దీనివల్ల పిల్లల నుండి పెద్దల వరకు అందరికీ కథ చాలా సులభంగా అర్థమవుతుంది. అంతేకాకుండా, ఇందులో వాడిన యానిమేషన్ క్వాలిటీ, గ్రాఫిక్స్, ఫైట్ సీన్స్ డిజైన్ చేసిన తీరు ప్రేక్షకులను విశేషంగా ఆకట్టుకుంటాయి.

ఈ యానిమేషన్ సిరీస్‌కు ప్రధాన బలాల్లో ఒకటి వాయిస్ ఓవర్ అందించిన నటులు. ప్రముఖ నటుడు అనూప్ సోని కర్ణుడి పాత్రకు గొంతు ఇచ్చి ప్రాణం పోశారు. ఎక్కడా గొంతు పెంచకుండా, చాలా గంభీరంగా, సహనంతో కూడిన మాటలతో ఒక ధీరోదాత్తమైన వీరుడి వ్యక్తిత్వాన్ని అద్భుతంగా ఆవిష్కరించారు. దుర్యోధనుడి పాత్రలోని కుట్రలు, పట్టుదల, రాజసం , తన మిత్రుడి పట్ల ఉన్న వాత్సల్యాన్ని తన డైలాగ్ డెలివరీతో షాహిద్ జఫర్ చాలా బాగా పండించారు. భీష్ముడిగా శక్తి సింగ్ వాయిస్ మెప్పించగా, పాండవులుగా చెప్పిన ఆర్టిస్టులు కూడా తమ పాత్రల పరిధికి తగ్గట్టుగా అలరించారు.

మొత్తంగా చూస్తే, 'ది లెజెండ్ ఆఫ్ కర్ణ' కేవలం ఒక యానిమేషన్ సిరీస్ మాత్రమే కాదు. జీవితాంతం అవమానాలు, అన్యాయాలు, తిరస్కరణలు ఎదురైనా తన ఆత్మవిశ్వాసాన్ని కోల్పోకుండా, నమ్మిన స్నేహానికి తుది శ్వాస వరకు నిలబడిన ఒక మహావీరుడి నికరమైన ప్రయాణం. కథ తెలిసిన వారికైనా, కొత్తగా మహాభారతాన్ని పరిచయం చేసుకోవాలనుకునే పిల్లలకైనా ఈ వీకెండ్‌లో కుటుంబంతో కలిసి చూడటానికి ఇదొక పర్‌ఫెక్ట్ విజువల్ ట్రీట్..