UPI Charges : రూ.2,000 దాటితే UPIకి ఛార్జీ.? నిజం చెప్పిన నిర్మలా సీతారామన్.!

UPI Charges : రూ. 2,000 కంటే ఎక్కువ విలువైన యూపీఐ (UPI) లావాదేవీలపై మర్చంట్ డిస్కౌంట్ రేట్ (MDR) విధిస్తారనే వార్తలు ఇటీవల దేశవ్యాప్తంగా తీవ్ర కలకలం రేపాయి. డిజిటల్ చెల్లింపులు ఇకపై ఉచితం కావేమోనని సాధారణ ప్రజల్లో పలు అనుమానాలు, ఆందోళనలు వ్యక్తమయ్యాయి. అయితే, ఈ అంశంపై కేంద్ర ఆర్థిక మంత్రి నిర్మలా సీతారామన్ పూర్తి స్పష్టతనిచ్చారు. భవిష్యత్తులో ఈ రుసుములను ఒకవేళ ప్రవేశపెట్టినప్పటికీ, యూపీఐ సేవలను ఉపయోగించే సామాన్య వినియోగదారులపై ఎలాంటి భారం పడదని ఆమె స్పష్టం చేశారు.

సామాన్య వినియోగదారులకు పూర్తి ఉచితం

కాంగ్రెస్ నేత జైరామ్ రమేష్ లేవనెత్తిన సందేహాలకు సోషల్ మీడియా వేదికగా ఆర్థిక మంత్రి సమాధానమిచ్చారు. యూపీఐ వాడే సాధారణ వినియోగదారులు చెల్లింపుల కోసం రుసుములు చెల్లించాల్సి వస్తుందనే వార్తలు పూర్తిగా అవాస్తవమని తేల్చిచెప్పారు. ఫోన్‌పే, గూగుల్ పే లేదా పేటీఎం వంటి యాప్‌ల ద్వారా రోజువారీ లావాదేవీలు చేసే సాధారణ ప్రజలు ఎప్పటిలాగే ఎటువంటి అదనపు ఛార్జీలు లేకుండా సేవలను ఉచితంగా పొందుతారని స్పష్టం చేశారు. ఈ ప్రతిపాదిత నిబంధన కేవలం యూపీఐ చెల్లింపులను స్వీకరించే పెద్ద వ్యాపారులకు మాత్రమే వర్తిస్తుందని వివరించారు.

ఎండీఆర్ (MDR) ప్రతిపాదన ఎందుకు?

ప్రస్తుతం అమల్లో ఉన్న జీరో-ఎండీఆర్ (Zero-MDR) విధానం వల్ల దేశంలో డిజిటల్ చెల్లింపుల వాడకం విపరీతంగా పెరిగినప్పటికీ, లావాదేవీల ఉచిత నిర్వహణ బ్యాంకులు , ఫిన్‌టెక్ సంస్థలకు ఆర్థికంగా పెద్ద భారంగా మారింది. ఈ చెల్లింపుల వ్యవస్థను సురక్షితంగా నిర్వహించే బ్యాంకులు, పేమెంట్ యాప్‌లకు సుస్థిరమైన ఆదాయ నమూనా అవసరమని ప్రభుత్వం భావిస్తోంది. ఆ ఆదాయంతో డిజిటల్ మౌలిక సదుపాయాలను మెరుగుపరచడం, సైబర్ భద్రతను బలోపేతం చేయడం , కొత్త సాంకేతిక పరిజ్ఞానాన్ని అందుబాటులోకి తీసుకురావడం సాధ్యమవుతుందని ఆర్థిక మంత్రి పేర్కొన్నారు.

ఎలాంటి మార్పులు రావచ్చు?

ఈ ప్రతిపాదన అమల్లోకి వస్తే వార్షిక టర్నోవర్ రూ. 1.5 కోట్లకు పైగా ఉన్న పెద్ద వ్యాపారులపై, రూ. 2,000 లేదా అంతకంటే ఎక్కువ విలువైన లావాదేవీలపై 0.3 శాతం నుంచి 0.5 శాతం వరకు రుసుము విధించే ఆలోచన జరుగుతోంది. లేదా వ్యాపారి మొత్తం టర్నోవర్‌ను బట్టి ఈ రుసుమును నిర్ణయించే ప్రత్యామ్నాయ విధానాన్ని కూడా పరిశీలిస్తున్నారు. అయితే, చిన్న వ్యాపారులకు , సాధారణ ప్రజలకు ఈ మార్పుల వల్ల ఎటువంటి ఇబ్బంది ఉండదు.

తుది నిర్ణయం ఇంకా జరగలేదు

ప్రస్తుతానికి ఈ రుసుముల విధింపుపై ఎటువంటి తుది నిర్ణయం తీసుకోలేదని నిర్మలా సీతారామన్ వెల్లడించారు. పార్లమెంట్‌లో సంబంధిత చట్ట సవరణ ప్రక్రియ పూర్తయిన తర్వాత, ఎన్‌పీసీఐ (NPCI) ఆధ్వర్యంలోని కమిటీ దీనిపై విస్తృతంగా చర్చించి తుది నిర్ణయాన్ని ప్రకటిస్తుందని తెలిపారు. అందువల్ల డిజిటల్ చెల్లింపులు జరిపే ప్రజలు ఎలాంటి ఆందోళన చెందాల్సిన అవసరం లేదు.