విజయ్ ఫ్యాన్స్కు పూనకాలు తెప్పించిన రామ్ చరణ్ స్పీచ్
సూపర్ స్టార్గా కోట్లాది రూపాయల రెమ్యునరేషన్, తిరుగులేని ఇమేజ్ను వదులుకుని ప్రజలకు సేవ చేయడం కోసం రాజకీయాల్లోకి రావడం అనేది సాధారణ విషయం కాదు
మెగా పవర్ స్టార్ రామ్ చరణ్ తమిళనాడు రాజకీయాలపై, అక్కడ నూతన ముఖ్యమంత్రి, కోలీవుడ్ అగ్ర నటుడు ‘దళపతి’ విజయ్ విజయంపై చేసిన వ్యాఖ్యలు ఇప్పుడు ఇండస్ట్రీతో పాటు సోషల్ మీడియాలో తీవ్ర సంచలనంగా మారాయి. తన తాజా పాన్-ఇండియా చిత్రం ‘పెద్ది’ ప్రమోషన్లలో భాగంగా చెన్నైలో నిర్వహించిన ప్రెస్ మీట్లో రామ్ చరణ్ ఈ ఆసక్తికర వ్యాఖ్యలు చేశారు.
కెరీర్ పీక్స్లో ఉన్నప్పుడు సినిమాలు వదిలేయడం సామాన్యం కాదు!
తమిళనాడు అసెంబ్లీ ఎన్నికల్లో భారీ విజయాన్ని నమోదు చేసి, ముఖ్యమంత్రి పీఠాన్ని కైవసం చేసుకున్న తళపతి విజయ్కు రామ్ చరణ్ వేదికగా హృదయపూర్వక అభినందనలు తెలియజేశారు. ఈ సందర్భంగా విజయ్ తీసుకున్న నిర్ణయాన్ని చరణ్ ఆకాశానికెత్తారు. "సినిమా కెరీర్ పీక్ స్టేజ్లో ఉన్నప్పుడు, ఒక సూపర్ స్టార్గా కోట్లాది రూపాయల రెమ్యునరేషన్, తిరుగులేని ఇమేజ్ను వదులుకుని ప్రజలకు సేవ చేయడం కోసం రాజకీయాల్లోకి రావడం అనేది సాధారణ విషయం కాదు. అది కేవలం విజయ్ గారికి మాత్రమే సాధ్యమైంది" అంటూ చరణ్ ప్రశంసల వర్షం కురిపించారు. విజయ్ ప్రజా సేవలో మరిన్ని గొప్ప విజయాలు సాధించాలని, ఆయన భవిష్యత్తు ప్రయాణం అద్భుతంగా సాగాలని మనస్ఫూర్తిగా కోరుకుంటున్నట్లు చరణ్ పేర్కొన్నారు.
నెట్టింట విజయ్ ఫ్యాన్స్ హంగామా.. క్లిప్ వైరల్!
చెన్నై మీడియా వేదికగా రామ్ చరణ్ తమ హీరో గురించి అంతటి గొప్పగా మాట్లాడటంతో తళపతి విజయ్ అభిమానులు ఫుల్ ఖుషీ అవుతున్నారు. రామ్ చరణ్ మాట్లాడిన వీడియో క్లిప్ను ఎక్స్ (ట్విట్టర్), ఇన్స్టాగ్రామ్ వేదికగా విపరీతంగా షేర్ చేస్తూ ట్రెండ్ చేస్తున్నారు. టాలీవుడ్ టాప్ హీరో కోలీవుడ్ నూతన సీఎంకు ఇచ్చిన ఈ రెస్పెక్ట్ రెండు పరిశ్రమల మధ్య ఉన్న ఆరోగ్యకరమైన వాతావరణాన్ని చాటిచెబుతోందని నెటిజన్లు కామెంట్లు పెడుతున్నారు.
జూన్ 4న థియేటర్లలో ‘పెద్ది’ విధ్వంసం
ఇక రామ్ చరణ్ నటిస్తున్న మోస్ట్ ఎవైటెడ్ స్పోర్ట్స్ యాక్షన్ డ్రామా ‘పెద్ది’ జూన్ 4వ తేదీన ప్రపంచవ్యాప్తంగా పలు భాషల్లో అత్యంత ఘనంగా విడుదల కానుంది. ‘ఉప్పెన’ ఫేమ్ బుచ్చిబాబు సన అద్భుతమైన కథాంశంతో, ఎమోషనల్ స్పోర్ట్స్ బ్యాక్డ్రాప్లో ఈ చిత్రాన్ని తెరకెక్కించారు. ఈ సినిమాలో చరణ్ సరసన బాలీవుడ్ బ్యూటీ జాన్వీ కపూర్ హీరోయిన్గా నటిస్తుండగా, ఆస్కార్ విజేత ఏఆర్ రెహమాన్ ఈ చిత్రానికి మ్యూజిక్ అందించారు. చెన్నై ప్రెస్ మీట్ సక్సెస్ కావడంతో తమిళనాడులో కూడా ఈ సినిమాపై భారీ అంచనాలు నమోదవుతున్నాయి.