శరీరానికి చలువ, పుష్టినిచ్చే పాతకాలం నాటి వంటకం.. సగ్గుబియ్యం పాయసం!

పండుగలు, శుభకార్యాలు, ప్రత్యేక సందర్భాల్లో త్వరగా తయారు చేసుకునే స్వీట్‌లలో సగ్గుబియ్యం పాయసం ఒకటి. సగ్గుబియ్యాన్ని ముందుగా నానబెట్టి ఉంచితే తక్కువ సమయంలోనే రుచికరమైన పాయసం తయారు చేసుకోవచ్చు. పాలు, డ్రైఫ్రూట్స్, నెయ్యి, యాలకులు, కుంకుమపువ్వుతో చేసే ఈ పాయసం పిల్లల నుంచి పెద్దల వరకు అందరికీ నచ్చుతుంది.

సగ్గుబియ్యంతో తయారు చేసే ఈ పాయసం శరీరానికి శక్తిని అందించడంతో పాటు, వేసవి కాలంలో చల్లదనాన్ని ఇచ్చే ఆహారంగా చాలామంది భావిస్తారు. అయితే చక్కెరను పరిమితంగా ఉపయోగించడం మంచిది.

కావాల్సిన పదార్థాలు

సగ్గుబియ్యం – 1 కప్పు

పాలు – 3 కప్పులు

డ్రైఫ్రూట్స్ – 1 కప్పు

నెయ్యి – 2 టేబుల్ స్పూన్లు

కుంకుమపువ్వు – చిటికెడు

యాలకుల పొడి – అర టీస్పూన్

పంచదార – రుచికి తగినంత

సగ్గుబియ్యం పాయసం తయారీ విధానం

ముందుగా సగ్గుబియ్యాన్ని నాలుగు గంటల పాటు నానబెట్టుకోవాలి. సమయం లేకపోతే రాత్రి నానబెట్టి ఉదయాన్నే పాయసం తయారు చేసుకోవచ్చు.

స్టవ్‌పై పాన్ పెట్టి నెయ్యి వేసి వేడి చేయాలి. అందులో బాదం, పిస్తా, జీడిపప్పు వంటి డ్రైఫ్రూట్స్ వేసి బంగారు రంగు వచ్చే వరకు వేయించి పక్కన పెట్టుకోవాలి.

అదే పాన్‌లో నానబెట్టిన సగ్గుబియ్యాన్ని వేసి కొద్దిసేపు వేయించాలి. అనంతరం పాలు పోసి బాగా కలిపి ఉడికించాలి. సగ్గుబియ్యం మెత్తగా ఉడికిన తర్వాత కుంకుమపువ్వు, పంచదార వేసి కలపాలి.

పంచదార పూర్తిగా కరిగి పాయసం క్రీమీగా మారిన తర్వాత యాలకుల పొడి వేసి కలపాలి. చివరగా ముందుగా వేయించి పెట్టుకున్న డ్రైఫ్రూట్స్‌ను వేసి స్టవ్ ఆఫ్ చేయాలి.

అంతే.. రుచికరమైన సగ్గుబియ్యం పాయసం సిద్ధం. పండుగల సమయంలో నైవేద్యంగా, ప్రసాదంగా కూడా దీనిని తయారు చేసుకోవచ్చు. వేడిగా మాత్రమే కాకుండా ఫ్రిజ్‌లో ఉంచి చల్లగా కూడా ఆస్వాదించవచ్చు.

గమనిక: సగ్గుబియ్యం పాయసంలో పంచదార ఎక్కువగా వేయకుండా పరిమితంగా తీసుకోవడం మంచిది. ప్రత్యేక ఆరోగ్య అవసరాలు ఉన్నవారు ఆహారాన్ని వ్యక్తిగత అవసరాలకు అనుగుణంగా ఎంచుకోవాలి.