Summer Crops: వేసవిలో ఆరుతడి పంటలే బెస్ట్.. తక్కువ నీరు.. రెట్టింపు లాభం

Farming: వేసవి కాలం వచ్చిందంటే చాలు.. సాగు నీటి ఎద్దడి రైతులను కలవరపెడుతుంది. చెరువులు, కుంటలు ఎండిపోవడం, భూగర్భ జల మట్టం పడిపోవడంతో వరి వంటి నీటి వినియోగం ఎక్కువ ఉన్న పంటలు వేయడం సాహసమనే చెప్పాలి. ఇలాంటి తరుణంలో ఆరుతడి పంటలు రైతులకు వరంగా మారుతున్నాయి. తక్కువ కాలంలో, తక్కువ నీటితో చేతికొచ్చే ఈ పంటలు పెట్టుబడికి రెట్టింపు లాభాలను అందిస్తున్నాయి. వేసవిలో సాగు చేయదగ్గ కొన్ని మేలైన ఆరుతడి పంటల వివరాలు గురించి తెలుసుకుందాం.

నువ్వులు

నువ్వుల సాగుకు వేసవి కాలం అత్యంత అనుకూలం.జనవరి చివర లేదా ఫిబ్రవరిలో విత్తుకుంటే కేవలం 80 నుండి 90 రోజుల్లోనే పంట చేతికి వస్తుంది. ఈ పంటకు నీటి అవసరం చాలా తక్కువ. ఒకట్రెండు తడులతోనే దిగుబడి సాధించవచ్చు. నూనె గింజలకు మార్కెట్‌లో ఎప్పుడూ మంచి డిమాండ్ ఉంటుంది, కాబట్టి రైతులకు ఆశించిన ధర దక్కుతుంది.

పెసర

పప్పుధాన్యాలలో పెసర సాగు అత్యంత లాభదాయకమైనది.ఇది చాలా తక్కువ కాలం, అంటే 60 నుండి 70 రోజుల్లోనే కోతకు వస్తుంది. పెసర పంట కేవలం లాభాలనే కాకుండా, భూమిలో నత్రజనిని స్థిరీకరించి నేల సారాన్ని పెంచుతుంది. తద్వారా తదుపరి వేసే పంటకు ఎరువుల ఖర్చు తగ్గుతుంది. దీనికి కూలీల ఖర్చు, పురుగు మందుల వాడకం కూడా తక్కువే.

చిరుధాన్యాలు

ప్రస్తుతం సమాజంలో ఆరోగ్యంపై అవగాహన పెరగడంతో చిరుధాన్యాలకు భారీ డిమాండ్ ఏర్పడింది. సజ్జలు, జొన్నలు వంటి పంటలు అధిక ఉష్ణోగ్రతలను కూడా తట్టుకుని ఎదుగుతాయి. ఎంతటి కరువు పరిస్థితుల్లోనైనా ఇవి తట్టుకుని నిలబడతాయి. పశుగ్రాసంగాను, ఆహార ధాన్యంగాను వీటికి మంచి విలువ ఉండటంతో రైతులు రెండు రకాలుగా లాభపడవచ్చు.

ఎందుకు ఆరుతడి పంటలే వేయాలి?

వరి సాగు చేసే నీటితో మూడింతలు ఎక్కువ విస్తీర్ణంలో ఆరుతడి పంటలను పండించవచ్చు. చీడపీడల తాకిడి తక్కువగా ఉండటం వల్ల పంట నష్టం జరిగే అవకాశం తక్కువ. ఒకే సీజన్‌లో ఒకటి కంటే ఎక్కువ పంటలు వేయడానికి ఇది వీలు కల్పిస్తుంది. నీటి లభ్యత తక్కువగా ఉన్న ప్రాంతాల్లో రైతులు వరి వెంటే పడకుండా.. తెలివిగా ఆరుతడి పంటల వైపు మళ్ళితే ఆర్థికంగా స్థిరపడవచ్చు. స్వల్ప కాలంలో స్వల్ప పెట్టుబడితో గరిష్ట లాభాలు పొందడానికి నువ్వులు, పెసర , చిరుధాన్యాలు ఉత్తమ మార్గం.