Skoda Kylaq : నెక్సాన్ - బ్రెజాకు గట్టిపోటీ.. త్వరలోనే స్కోడా కైలాక్ లో బడ్జెట్ వేరియంట్

Skoda Kylaq : ఎస్‌యూవీ కార్ల కోసం డిమాండ్ వేగంగా పెరుగుతోంది. అందుకే ఆటోమొబైల్ కంపెనీలు కొత్త కొత్త ఎస్‌యూవీలను మార్కెట్‌లోకి తీసుకురావడంపై ఎక్కువ దృష్టి పెడుతున్నాయి. గత సంవత్సరం స్కోడా కూడా తమ సబ్-4 మీటర్ ఎస్‌యూవీ 'కైలాక్'ను మార్కెట్‌లోకి విడుదల చేసింది. ఈ కారు కంపెనీకి చాలా అదృష్టాన్ని తెచ్చిపెట్టింది. ఎందుకంటే ఇది కంపెనీ అమ్మకాలను పెంచడమే కాకుండా, కంపెనీ ర్యాంకింగ్‌ను మెరుగుపరచడంలో కూడా సాయపడింది.

మారుతి సుజుకి బ్రెజా, టాటా నెక్సాన్ వంటి కార్లకు పోటీ ఇచ్చే కైలాక్ ఆటోమాటిక్ వేరియంట్ ప్రస్తుతం అందుబాటులో ఉన్న వాటిలో అత్యంత సరసమైనది. కార్‌వాలే నివేదిక ప్రకారం.. ఎస్‌యూవీ సెగ్మెంట్‌లో మరింత సెన్సేషన్ క్రియేట్ చేసేందుకు స్కోడా ఈ ఎస్‌యూవీ కొత్త, మరింత సరసమైన వేరియంట్‌ను త్వరలో విడుదల చేసే అవకాశం ఉంది. దీనిని క్లాసిక్, సిగ్నేచర్ వేరియంట్‌ల మధ్య తీసుకురావచ్చని అంచనా వేస్తున్నారు.

స్కోడా కైలాక్ ప్రస్తుతం క్లాసిక్, క్లాసిక్ గోల్డ్ ఆలివ్, సిగ్నేచర్, సిగ్నేచర్ డ్యూయల్ టోన్, సిగ్నేచర్ ప్లస్, సిగ్నేచర్ ప్లస్ ఇన్ లావా బ్లూ, ప్రెస్టీజ్ వేరియంట్‌లలో అందుబాటులో ఉంది. ఈ ఎస్‌యూవీ ధర రూ.8.25 లక్షల (ఎక్స్-షోరూమ్) నుండి రూ.13.99 లక్షల (ఎక్స్-షోరూమ్) వరకు ఉంది. కొత్త వేరియంట్ ఈ కారు రెండు ఎంట్రీ-లెవల్ వేరియంట్‌ల మధ్య తీసుకురావచ్చు. ఎందుకంటే ఈ రెండు వేరియంట్‌ల మధ్య రూ.1.60 లక్షల (ఎక్స్-షోరూమ్) డిఫరెన్స్ ఉంది. కొత్త వేరియంట్ ఎప్పుడు విడుదల అవుతుంది అనే సమాచారం ప్రస్తుతం అందుబాటులో లేదు. కానీ ఈ ఏడాదిలోనే రిలీజ్ అయ్యే అవకాశం ఉంది.

కొత్త వేరియంట్‌లో ఏబీఎస్, 6 ఎయిర్‌బ్యాగులు, ట్రాక్షన్ కంట్రోల్ సిస్టమ్, ఎల్‌ఈడీ డీఆర్‌ఎల్‌లతో కూడిన ఎల్‌ఈడీ హెడ్‌లైట్స్, ISOFIX చైల్డ్ సీట్లు వంటి ఫీచర్లు ఉండవచ్చు. వీటితో పాటు ఈ వేరియంట్‌లో కొన్ని సిగ్నేచర్ వేరియంట్ ఫీచర్లు కూడా ఉండవచ్చు. అవి క్రూజ్ కంట్రోల్, టైర్ ప్రెజర్ మానిటరింగ్ సిస్టమ్, ఆండ్రాయిడ్ ఆటో, వైర్డ్ ఆపిల్ కార్‌ప్లే, 7-అంగుళాల ఇన్ఫోటైన్‌మెంట్ సిస్టమ్ వంటివి ఉండవచ్చు. ఈ కొత్త వేరియంట్ విడుదల అయితే, స్కోడా కైలాక్ మరింత మంది కస్టమర్లను ఆకర్షించే అవకాశం ఉంది.