Champions Trophy 2025: దక్షిణాఫ్రికా, న్యూజిలాండ్ మ్యాచ్ సమయంలో వర్షం పడితే రిజర్వ్ డే ఉందా ? రద్దయితే ఫైనల్ ఛాన్స్ ఎవరికి?

Champions Trophy: ఛాంపియన్స్ ట్రోఫీలో భారతదేశం ఇప్పటికే ఫైనల్‌లోకి ఎంట్రీ ఇచ్చింది. ఇప్పుడు రెండవ సెమీ-ఫైనల్ మార్చి 5న దక్షిణాఫ్రికా, న్యూజిలాండ్ మధ్య జరుగుతోంది. దుబాయ్‌లో జరిగిన భారత్-ఆస్ట్రేలియా మ్యాచ్‌లో వాతావరణ సమస్య లేదు. కానీ పాకిస్తాన్‌లో జరిగిన నాలుగు మ్యాచ్‌లకు వర్షం అంతరాయం కలిగించింది. సెమీ-ఫైనల్ మ్యాచ్ సమయంలో వర్షం పడితే మ్యాచ్ రద్దు అవుతుందా? వర్షం పడితే సెమీ-ఫైనల్ మ్యాచ్ కోసం ఏదైనా రిజర్వ్ డే ఉంచారా అన్న విషయాలు తెలుసుకుందాం.

వర్షం పడితే సెమీ ఫైనల్ రద్దు అవుతుందా?

ఛాంపియన్స్ ట్రోఫీ 2025 టోర్నమెంట్ ప్రారంభానికి ముందే రిజర్వ్ డేలను నిర్ణయించారు. మార్చి 4న భారత్-ఆస్ట్రేలియా మ్యాచ్ జరిగింది. మ్యాచ్‌లో ఏదైనా అంతరాయం ఏర్పడితే.. మార్చి 5ను మొదటి సెమీ-ఫైనల్‌కు రిజర్వ్ డేగా ఉంచారు. మార్చి 5న న్యూజిలాండ్ vs దక్షిణాఫ్రికా మ్యాచ్ జరుగుతోంది. ఈ మ్యాచ్ సమయంలో వర్షం పడితే మార్చి 6 ను దానికి రిజర్వ్ డేగా ఉంచారు. నాకౌట్ మ్యాచ్‌లలో ఫలితం రావడానికి మ్యాచ్ షెడ్యూల్ చేసిన సమయాన్ని పొడిగించే నిబంధన కూడా ఉంది.

ఫైనల్ మ్యాచ్ కి కూడా రిజర్వ్ డే ఉందా?

2025 ఛాంపియన్స్ ట్రోఫీ చివరి మ్యాచ్ మార్చి 9న దుబాయ్‌లో జరుగుతుంది. భారత జట్టు ఫైనల్‌కు చేరుకున్నప్పటి నుండి హైబ్రిడ్ మోడల్ కింద, ఫైనల్ వేదికను లాహోర్ నుండి దుబాయ్‌కి మార్చారు. ఏదైనా పరిస్థితిలో మార్చి 9న ఫైనల్ మ్యాచ్ ఫలితం రాకపోతే టైటిల్ మ్యాచ్ రిజర్వ్ డే అయిన మార్చి 10న జరుగుతుంది. 2002 ఛాంపియన్స్ ట్రోఫీ ఫైనల్లో కూడా ఇలాంటి పరిస్థితి తలెత్తింది. ఆ సమయంలో వర్షం కారణంగా చివరి రోజు, రిజర్వ్ డే నాడు మ్యాచ్ పూర్తి కాలేదు. భారత్, శ్రీలంకలను ఉమ్మడి విజేతలుగా ప్రకటించారు.