Nagpur: యమలోకం దాకా వెళ్లి తిరిగొచ్చిన బామ్మ.. అంత్యక్రియలకు అంతా సిద్ధం, పాడె ఎక్కించే లోపు షాకింగ్ ట్విస్ట్!

Nagpur: ప్రాణం పోయిందని అందరూ ఏడుస్తున్నారు.. అంత్యక్రియలకు ఏర్పాట్లు పూర్తయ్యాయి.. బంధువుల సోషల్ మీడియా పోస్టులు కూడా ముగిశాయి. కానీ, ఒక్కసారిగా ఆ శవం కాలి వేళ్లు కదిలించింది! మహారాష్ట్రలోని నాగ్‌పూర్ జిల్లాలో జరిగిన ఈ వింత ఘటన ఇప్పుడు దేశవ్యాప్తంగా సంచలనంగా మారింది.

అసలేం జరిగిందంటే?

రాంటెక్ తాలూకా చార్గావ్‌కు చెందిన 103 ఏళ్ల గంగాబాయి సావ్జీ సఖ్రా గత రెండేళ్లుగా అనారోగ్యంతో బాధపడుతున్నారు. సోమవారం (జనవరి 12) ఆమె అకస్మాత్తుగా కదలడం మానేశారు, శ్వాస కూడా ఆగిపోయినట్లు కనిపించింది. దీంతో కుటుంబ సభ్యులు ఆమె మరణించిందని భావించి శోకసంద్రంలో మునిగిపోయారు.

పాడె కట్టే సమయంలో అద్భుతం:

వృద్ధురాలి మరణ వార్త ఊరంతా పాకింది. బంధువులంతా తరలివచ్చారు. అంత్యక్రియలకు అన్ని ఏర్పాట్లు చేసి, ఆమె చెవుల్లో పత్తి కూడా పెట్టారు. అయితే, ఆమెను పాడెపైకి ఎక్కించేందుకు సిద్ధమవుతుండగా.. అకస్మాత్తుగా బామ్మ కాలి వేళ్లు కదలడం అక్కడున్న వారు గమనించారు. మొదట భ్రమ అనుకున్నా, తర్వాత ఆమె శరీరం మొత్తం కదలడంతో బంధువులు షాక్‌కు గురయ్యారు. చనిపోయిందనుకున్న బామ్మ కళ్లు తెరవడంతో విషాదం కాస్తా పెను సంతోషంగా మారిపోయింది.

మరుసటి రోజే పుట్టినరోజు:

మరో విశేషం ఏమిటంటే, ఈ ఘటన జరిగిన మరుసటి రోజు అంటే జనవరి 13న గంగాబాయి 103వ పుట్టినరోజు. అంత్యక్రియలకు వచ్చిన బంధువులందరూ ఆశ్చర్యపోతూనే, ఆమె పుట్టినరోజు వేడుకలను ఘనంగా నిర్వహించారు. చనిపోయిందనుకుని కన్నీళ్లు పెట్టుకున్న కళ్లే ఇప్పుడు ఆమె పునర్జన్మను చూసి చిరునవ్వులు చిందిస్తున్నాయి.