Oxygen Express: 'ఆక్సిజన్‌ ఎక్స్‌ప్రెస్‌'లు నడిపేందుకు సిద్ధమైన రైల్వే శాఖ

Oxygen Express: కరోనా ఉధృతితో దేశంలో ఆక్సిజన్‌కు తీవ్ర డిమాండ్‌ ఏర్పడిన వేళ.. రైల్వే శాఖ కీలక నిర్ణయం తీసుకుంది. ఆక్సిజన్ కొరత తీర్చేందుకు రైల్వే శాఖ ముందుకొచ్చింది. మెడికల్ ఆక్సిజన్​ను దేశవ్యాప్తంగా సరఫరా చేసేందుకు ప్రత్యేక రైళ్లను నడిపేందుకు సిద్ధమైంది. ఈ రైళ్లకు ఆక్సిజన్ ఎక్స్​ప్రెస్​గా నామకరణం చేసింది. ఈ ఆక్సిజన్‌ ఎక్స్‌ప్రెస్ రైలు.. ఉత్పత్తి కేంద్రాల నుంచి ఆక్సిజన్​ను సేకరిస్తుందని రైల్వే శాఖ తెలిపింది.

ఖాళీ ట్యాంకులతో ఉన్న రైలు సోమవారం ముంబయి నుంచి బయలుదేరి విశాఖపట్నం, భిలాయ్‌, జంశెద్​పుర్, రాఉర్కెలా, బొకారోలో ఉన్న ఉత్పత్తి కేంద్రాల నుంచి ఆక్సిజన్‌ను సేకరిస్తుంది. రైళ్లు ఆక్సిజన్‌ను సేకరించిన తర్వాత డిమాండ్‌ ఎక్కువగా ఉన్న రాష్ట్రాలకు సరఫరా చేస్తామని రైల్వే శాఖ వెల్లడించింది. ఆక్సిజన్‌ ఎక్స్‌ప్రెస్‌ సాఫీగా ప్రయాణం సాగించేలా హరిత కారిడార్‌ను సృష్టిస్తామని తెలిపింది.