Ovarian Cancer: మహిళల్లో ఓవేరియన్ క్యాన్సర్ ఎందుకు వస్తుంది? ఎలా గుర్తించాలి?

Ovarian Cancer: నేటి ఉరుకుల పరుగుల జీవితంలో మహిళలు తమ ఆరోగ్యాన్ని తరచుగా నిర్లక్ష్యం చేస్తుంటారు. దీని కారణంగా అనేకసార్లు తీవ్రమైన వ్యాధులు సమయానికి గుర్తించలేకపోతున్నారు. అలాంటి ప్రమాదకరమైన వ్యాధుల్లో ఓవేరియన్ క్యాన్సర్ ఒకటి. ఇది అండాశయ క్యాన్సర్. ఈ వ్యాధి శరీరంలో నిశ్శబ్దంగా పెరుగుతుంది. దాని లక్షణాలు కనిపించే సమయానికి అది చాలా అభివృద్ధి చెంది ఉంటుంది. కాబట్టి, దీనిని ముందుగా గుర్తించడం, అర్థం చేసుకోవడం చాలా ముఖ్యం.

ఓవేరియన్ క్యాన్సర్ అంటే ఏమిటి?

ఓవేరియన్ క్యాన్సర్ మహిళల అండాశయాలలో వచ్చే క్యాన్సర్. స్త్రీ శరీరంలో రెండు అండాశయాలు ఉంటాయి. ఇవి అండాలను ఉత్పత్తి చేస్తాయి.హార్మోన్లను (ఈస్ట్రోజెన్, ప్రొజెస్టెరాన్) ఉత్పత్తి చేస్తాయి. ఈ అండాశయాలలో కణాలు అసాధారణంగా పెరగడం ప్రారంభించి కణితిగా మారినప్పుడు దానిని ఓవేరియన్ క్యాన్సర్ అంటారు. ఈ వ్యాధికి అనేక కారణాలు ఉండవచ్చు. కడుపు నొప్పి లేదా వాపు, త్వరగా కడుపు నిండినట్లు అనిపించడం, తరచుగా మూత్రవిసర్జన, అలసట లేదా బలహీనత, బరువు తగ్గడం వంటి అనేక లక్షణాలు ఉండవచ్చు.

సాధారణంగా 50 సంవత్సరాల కంటే ఎక్కువ వయస్సు ఉన్న మహిళల్లో దీని ప్రమాదం ఎక్కువగా ఉంటుంది. అయితే ఇది తక్కువ వయస్సులో కూడా రావచ్చు.కుటుంబంలో ఎవరికైనా రొమ్ము, ఓవేరియన్ లేదా కోలన్ క్యాన్సర్ ఉంటే ప్రమాదం పెరుగుతుంది.ఆలస్యంగా రుతుక్రమం ఆగిపోవడం లేదా ఎక్కువ కాలం హార్మోన్ల చికిత్స తీసుకోవడం కూడా దీనికి ఒక కారణం కావచ్చు. ఎప్పుడూ గర్భం దాల్చని మహిళల్లో ప్రమాదం కొంచెం ఎక్కువగా కనిపించింది. ఊబకాయం, జంక్ ఫుడ్, ధూమపానం, మద్యపానం వంటి కారణాలు కూడా దీని ప్రమాదాన్ని పెంచుతాయి.

ఓవేరియన్ క్యాన్సర్ ప్రారంభ లక్షణాలు చాలా సాధారణంగా ఉంటాయి. దీని కారణంగా ఇది తరచుగా నిర్లక్ష్యం చేస్తుంటారు. అయితే కొన్ని సంకేతాలపై శ్రద్ధ చూపడం ద్వారా దీనిని గుర్తించవచ్చు. అవి: కడుపులో నిరంతర వాపు, త్వరగా కడుపు నిండినట్లు అనిపించడం లేదా ఆకలి లేకపోవడం, తరచుగా మూత్రవిసర్జన, కడుపు లేదా వెనుక భాగంలో నిరంతర నొప్పి, రుతుక్రమంలో మార్పులు, వేగంగా బరువు తగ్గడం లేదా పెరగడం, అలసట, బలహీనతగా అనిపించడం దీని ప్రారంభ లక్షణాలు. ఈ లక్షణాలు నిరంతరం 2-3 వారాల కంటే ఎక్కువ కాలం కొనసాగితే వెంటనే వైద్యుడిని సంప్రదించాలి.

పరీక్షలు ఎలా చేస్తారు?

పెల్విక్ ఎగ్జామినేషన్

అల్ట్రాసౌండ్ లేదా సిటీ స్కాన్

CA-125 అనే రక్త పరీక్ష

బయాప్సీ (అవసరమైతే)

ఈ పరీక్షలు క్యాన్సర్ ఉందో లేదో నిర్ణయించడానికి సాయపడతాయి.

చికిత్స ఏమిటి?

ఓవేరియన్ క్యాన్సర్ చికిత్స దాని దశ, రోగి పరిస్థితిపై ఆధారపడి ఉంటుంది. శస్త్రచికిత్స (ఆపరేషన్ ద్వారా క్యాన్సర్ సోకిన భాగాన్ని తొలగించడం), కీమోథెరపీ, రేడియేషన్ థెరపీ, హార్మోన్ థెరపీ (కొన్ని సందర్భాల్లో) ఉపయోగిస్తారు. సమయానికి చికిత్స జరిగితే దీని సక్సెస్ ఫుల్ రేటు చాలా బాగుంటుంది.