World Economic Forum: దావోస్‌లో 20 లక్షల కోట్లు సంపాదించిన భారత్.. ఆశ్చర్యపోయిన 130 దేశాలు..!

World Economic Forum: వరల్డ్ ఎకానమిక్ ఫోరంలో (WEF) జరిగిన ఐదు రోజుల వార్షిక సమావేశం శుక్రవారం ముగిసింది. ఈ సమావేశంలో భారత్ ప్రపంచవ్యాప్తంగా ఉన్న వ్యాపార రంగ ప్రముఖుల నుంచి 20 లక్షల కోట్ల రూపాయల మేర పెట్టుబడులను పొందడంలో సక్సెస్ అయింది. ఇందులో మహారాష్ట్రకు అత్యధికంగా దాదాపు 80శాతం వాటా ఉంది. ఈ భారీ పెట్టుబడులు ప్రపంచంలోని 130 దేశాలను ఆశ్చర్యపరిచాయి. కేంద్ర మంత్రి అశ్విని వైష్ణవ్, ఐదుగురు కేంద్ర మంత్రులతో పాటు మూడు రాష్ట్రాల ముఖ్యమంత్రులతో కూడిన అతిపెద్ద భారతీయ ప్రతినిధి మండలి ఈ సమావేశానికి నాయకత్వం వహించింది.

భారతదేశం ఆర్థిక వృద్ధికి కీలక పాత్ర

అశ్వినీ వైష్ణవ్ ప్రకారం.. "భరోసా, ప్రతిభ" అనేవి ప్రపంచాన్ని ఆకర్షించే ప్రధాన కారణాలు. "టీమ్ ఇండియా" రూపంలో అన్ని రాష్ట్రాలు, కేంద్ర ప్రభుత్వ శాఖలు ఒకే వేదికపై తమ ప్రతిష్టలను ప్రదర్శించాయి. ఈ సమావేశంలో తొలిసారి రాష్ట్ర , కేంద్ర మంత్రులు సంయుక్తంగా మీడియా సమావేశం నిర్వహించారు.

రాష్ట్రాల పెట్టుబడుల వివరాలు

మహారాష్ట్ర: సీఎం దేవేంద్ర ఫడణవీస్ నేతృత్వంలోని మహారాష్ట్ర ప్రతినిధి మండలి 15.70 లక్షల కోట్ల రూపాయల విలువైన 61 ఒప్పందాలపై సంతకం చేసింది. ఇది సుమారు 16 లక్షల ఉద్యోగాలు సృష్టించే అవకాశం ఉంది.

తెలంగాణ: సీఎం రేవంత్ రెడ్డి నేతృత్వంలోని ప్రతినిధి మండలి 1.79 లక్షల కోట్ల రూపాయల విలువైన 20 ఒప్పందాలపై సంతకం చేసింది. దీని ద్వారా 50,000 ఉద్యోగాలు ఏర్పడవచ్చు.

కేరళ: కేరళ ప్రభుత్వం తమ ప్రగతిశీల ప్రభుత్వ విధానాలతో పెట్టుబడులను ఆకర్షించింది. రాష్ట్ర మంత్రి పి రాజీవ్ 30 పైగా సమావేశాలు నిర్వహించి కేరళ పెట్టుబడుల సామర్థ్యాన్ని ప్రదర్శించారు.

ఉత్తరప్రదేశ్: రాష్ట్రం 1 లక్ష కోట్ల డాలర్ల ఎకానమీ సాధించే లక్ష్యంతో పెట్టుబడుల స్వీకరించింది.

గ్లోబల్ కంపెనీలతో భాగస్వామ్యాలు

ఈ సమావేశంలో హిందుస్తాన్ యూనిలీవర్ వంటి పెద్ద గ్లోబల్ కంపెనీలు భారతదేశంలో కొత్త ఉత్పత్తి యూనిట్లు ఏర్పాటు చేయడానికి ప్రణాళికలు ప్రకటించాయి. అలాగే, ప్రపంచ వ్యాప్తంగా ఉన్న పెద్ద కంపెనీలు భారతీయ సంస్థలతో భాగస్వామ్యాలు ఏర్పాటు చేసే అవకాశాలను పరిశీలించాయి.

తదుపరి సమావేశం

డబ్ల్యుఇఎఫ్ తదుపరి వార్షిక సమావేశం 2026 జనవరి 19 నుండి 23 వరకు దావోస్‌లో జరగనున్నది. ఈ సమావేశం ద్వారా భారత్ గ్లోబల్ మార్కెట్లో మరింత ప్రాముఖ్యత సంతరించుకుని, పెట్టుబడులను ప్రోత్సహించడంలో కీలక భూమిక పోషించింది.