Buying Gold Tips: నగలు కొనేటప్పుడు తెలివిగా ప్రవర్తించండి.. లేదంటే నకిలీ బంగారం బారిన పడుతారు..!

Buying Gold Tips: దేశంలో పెళ్లిళ్ల సీజన్ నడుస్తోంది. దీంతో మార్కెట్‌లో బంగారం రేట్లు విపరీతంగా పెరుగుతున్నాయి. ఇప్పటికే తులం రూ.55000 పై మాటే నడుస్తుంది. ఇదే అదనుగా మార్కెట్‌లో నకిలీ బంగారం మోసాలు జరుగుతున్నాయి. వ్యాపారులు నకిలీ ఆభరణాలని అంటగట్టి మీ దగ్గర నుంచి లక్షల రూపాయలు దోచుకునే ప్రమాదం ఉంది. కాబట్టి ప్రతి ఒక్కరూ బంగారం కొనేటప్పుడు జాగ్రత్తగా ఉండాలి.

2021 జూన్ నుంచి బంగారం అమ్మకాల సమయంలో ప్రభుత్వం హాల్‌మార్కింగ్‌ని తప్పనిసరి చేసిన విషయం అందరికి తెలిసిందే. హాల్‌మార్కింగ్ లేని బంగారాన్ని విక్రయించడం ద్వారా నగల వ్యాపారులు మిమ్మల్ని మోసం చేస్తారు. మీరు నిజమైన, నకిలీ ఆభరణాల మధ్య తేడాను గుర్తించే చిట్కాలు తెలుసుకోవాలి. అప్పుడే కచ్చితమైన బంగారాన్ని కొనుగోలు చేస్తారు.

అసలు, నకిలీ బంగారాన్ని ఎలా గుర్తించాలి..?

1. ప్రస్తుతం నిజమైన, నకిలీ బంగారాన్ని గుర్తించడం చాలా సులభం. దీని కోసం మీరు కొన్ని ప్రాథమిక చిట్కాలను అనుసరించాలి. బంగారం కొనుగోలు చేసేటప్పుడు BIS త్రిభుజాకార గుర్తును తనిఖీ చేయాలి.

2. బంగారం హాల్‌మార్క్ 375 అయితే అది దాదాపు 37.5 శాతం స్వచ్ఛమైన బంగారం అని అర్థం. బంగారంపై హాల్‌మార్క్ 585 అయితే అది 58.5 శాతం స్వచ్ఛంగా ఉంటుందని అర్థం. మరోవైపు బంగారం ముఖ్య లక్షణం 990 అయితే బంగారం 99.0 శాతం స్వచ్చమైనదని అర్థం. బంగారం హాల్‌మార్క్ 999 అయినప్పుడు అది 99.9 శాతం స్వచ్ఛమైన బంగారం అని అర్థం చేసుకోవాలి.

3. మీరు నిజమైన, నకిలీ బంగారాన్ని గుర్తించడానికి నైట్రిక్ యాసిడ్‌ని ఉపయోగించవచ్చు. నగలపై కొద్దిగా రఫ్‌ చేసి దానిపై నైట్రిక్ యాసిడ్ వేయాలి. బంగారం రంగులో మార్పు రాకపోతే అది నిజమైన బంగారమని అర్థం చేసుకోవాలి. ఏమైన తేడా కనిపిస్తే అది నకిలీ బంగారంగా గుర్తించాలి.