Penumantra: పెనుమంట్రలో 20వ రోజుకు చేరుకున్న వీఆర్ఏల సహాయ నిరాకరణ!

Penumantra: గ్రామ రెవెన్యూ సహాయకులకు పే స్కేలు అమలు చేయాలని, అర్హత కలిగిన గ్రామ రెవెన్యూ సహాయకులకు గ్రామ రెవెన్యూ అధికారులుగా పదోన్నతులు కల్పించాలని, నామినీ గ్రామ రెవెన్యూ సహాయకులను క్రమబద్ధీకరించాలని కోరుతూ పెనుమంట్ర మండల గ్రామ రెవెన్యూ సహాయకులు చేపట్టిన సహాయ నిరాకరణ ఉద్యమం సోమవారానికి 20వ రోజుకు చేరింది.

మండలంలోని 18 గ్రామాలకు చెందిన గ్రామ రెవెన్యూ సహాయకులు ఉద్యమంలో పాల్గొంటున్నారు. తమ న్యాయమైన డిమాండ్లను ప్రభుత్వం తక్షణమే పరిష్కరించాలని వారు కోరుతున్నారు. ఎన్నో ఏళ్లుగా గ్రామస్థాయిలో రెవెన్యూ సేవలు అందిస్తున్నప్పటికీ తమ సమస్యలు పరిష్కారానికి నోచుకోకపోవడం పట్ల వారు ఆవేదన వ్యక్తం చేశారు.

అర్హత, అనుభవం ఉన్న గ్రామ రెవెన్యూ సహాయకులకు గ్రామ రెవెన్యూ అధికారులుగా పదోన్నతులు కల్పించాలని, నామినీగా కొనసాగుతున్న వారిని క్రమబద్ధీకరించి ఉద్యోగ భద్రత కల్పించాలని కోరారు. తమ డిమాండ్లపై ప్రభుత్వం సానుకూలంగా స్పందించి వెంటనే నిర్ణయం తీసుకోవాలని విజ్ఞప్తి చేశారు.

ప్రభుత్వం స్పందించే వరకు ఉద్యమాన్ని కొనసాగిస్తామని గ్రామ రెవెన్యూ సహాయకులు స్పష్టం చేశారు.