Penukonda: పెనుకొండలో నూతన ఆప్కో షోరూమ్‌ను ప్రారంభించిన మంత్రి సవిత!

పెనుకొండ: చేనేత రంగం అభివృద్ధి, నేతన్నల సంక్షేమానికి కూటమి ప్రభుత్వం అత్యంత ప్రాధాన్యత ఇస్తోందని రాష్ట్ర బీసీ సంక్షేమం, చేనేత జౌళి శాఖల మంత్రి సవిత తెలిపారు. పెనుకొండ పట్టణంలో నూతనంగా ఏర్పాటు చేసిన APCO షోరూమ్‌ను సోమవారం మంత్రి సవిత ప్రారంభించారు.

ఈ సందర్భంగా మంత్రి సవిత మాట్లాడుతూ చేనేత కార్మికుల సంక్షేమం కోసం ప్రభుత్వం అనేక కార్యక్రమాలను అమలు చేస్తోందన్నారు. నేతన్నలకు ఆర్థికంగా అండగా నిలిచేందుకు నేతన్న సేవ పథకం ద్వారా అర్హులైన వారికి రూ.25 వేల చొప్పున ఆర్థిక సహాయం అందిస్తున్నామని తెలిపారు. ఇప్పటికే వేలాది మంది నేతన్నలకు ఈ పథకం ద్వారా ప్రయోజనం కల్పించామని, అర్హులైన ప్రతి ఒక్కరికీ పథకం ప్రయోజనం అందేలా చర్యలు తీసుకుంటామని పేర్కొన్నారు.

చేనేత కార్మికులకు ప్రభుత్వం నెలకు 200 యూనిట్ల వరకు ఉచిత విద్యుత్ అందిస్తోందని మంత్రి తెలిపారు. అదేవిధంగా పవర్‌లూమ్ కార్మికులకు 500 యూనిట్ల వరకు ఉచిత విద్యుత్ సదుపాయం కల్పిస్తున్నామని చెప్పారు. నేతన్నలపై విద్యుత్ భారాన్ని తగ్గించి, వారి వృత్తికి మరింత ప్రోత్సాహం అందించాలనే ఉద్దేశంతో ప్రభుత్వం ఈ చర్యలు చేపట్టిందన్నారు.

50 సంవత్సరాలు పైబడిన అర్హత కలిగిన నేత కార్మికులకు నెలకు రూ.4,000 పింఛన్ అందించే విధానాన్ని ప్రభుత్వం అమలు చేస్తోందని మంత్రి తెలిపారు. చేనేత కుటుంబాలకు సంక్షేమ పథకాల ద్వారా ఆర్థిక భరోసా కల్పిస్తూ, వారి జీవన ప్రమాణాలను మెరుగుపరిచేందుకు ప్రభుత్వం కృషి చేస్తోందన్నారు.

రాష్ట్రవ్యాప్తంగా 66 APCO షోరూమ్‌ల ద్వారా చేనేత ఉత్పత్తులకు విస్తృత మార్కెటింగ్ సదుపాయం కల్పిస్తున్నామని మంత్రి సవిత తెలిపారు. నేతన్నలు తయారు చేసిన వస్త్రాలకు మార్కెట్ కల్పించడంతో పాటు, ప్రజలకు నాణ్యమైన చేనేత వస్త్రాలు అందుబాటులోకి తీసుకురావడమే APCO షోరూమ్‌ల ప్రధాన ఉద్దేశమన్నారు.

చేనేత ఉత్పత్తులను కొనుగోలు చేయడం ద్వారా నేతన్నల కుటుంబాలకు నేరుగా అండగా నిలిచినట్లవుతుందని పేర్కొన్నారు.చేనేత వస్త్రాలు మన సంస్కృతికి ప్రతీకలని, ప్రతి ఒక్కరూ వారానికి కనీసం ఒకసారైనా చేనేత వస్త్రాలు ధరించి నేతన్నలను ప్రోత్సహించాలని మంత్రి సవిత పిలుపునిచ్చారు. చేనేత వస్త్రాల వినియోగం పెరిగితే నేతన్నలకు మరిన్ని ఉపాధి అవకాశాలు లభిస్తాయని తెలిపారు.

చేనేత రంగాన్ని బలోపేతం చేయడంతో పాటు నేతన్నలకు అవసరమైన సంక్షేమ పథకాలు, మార్కెటింగ్ సదుపాయాలు, ఆర్థిక సహాయాన్ని అందించేందుకు ప్రభుత్వం నిరంతరం కృషి చేస్తోందని మంత్రి సవిత స్పష్టం చేశారు.ఈ కార్యక్రమంలో ఆర్డీవో ఆనందరావు, ఎండీ కన్నబాబు ,రాజారాం, కూటమి నాయకులు, ప్రజాప్రతినిధులు, అధికారులు, చేనేత కార్మికులు, APCO సిబ్బంది తదితరులు పాల్గొన్నారు.