Gangaram: గిరిజన విద్యార్థినుల ప్రమాదకర ట్రాక్టర్ ప్రయాణం.. తీవ్ర విమర్శలు!
Gangaram: గంగారంలో బిర్సా ముండా జయంతి వేడుకలకు గిరిజన బాలికలను పరిమితికి మించి ట్రాక్టర్లో ప్రమాదకరంగా తరలించడంపై తీవ్ర విమర్శలు వ్యక్తమవుతున్నాయి.
Gangaram: గిరిజన విద్యార్థినుల ప్రమాదకర ట్రాక్టర్ ప్రయాణం.. తీవ్ర విమర్శలు!
Gangaram: గిరిజన విద్యార్థుల భద్రత పట్ల సంక్షేమ శాఖ అధికారుల నిర్లక్ష్యం మరోసారి బట్టబయలైంది. ఏజెన్సీ ప్రాంతంలోని మారుమూల గ్రామాల నుంచి విద్యార్థులను సురక్షిత వాహనాల్లో తరలించాల్సిన అధికారులే, వారి ప్రాణాలను పణంగా పెట్టి ప్రమాదకర రీతిలో ట్రాక్టర్లలో తరలించిన ఘటన మహబూబాబాద్ జిల్లా గంగారం మండలంలో చోటుచేసుకుంది.
అసలేం జరిగిందంటే..
భగవాన్ బిర్సా ముండా 151వ జయంతి వేడుకలను గంగారం మండల కేంద్రంలో ఘనంగా నిర్వహించారు. ఈ కార్యక్రమానికి ముఖ్య అతిథిగా ఎస్టీ కమిషన్ సభ్యులు జాటోత్ హుస్సేన్ నాయక్ హాజరయ్యారు. ఈ సభకు జనాన్ని, విద్యార్థులను సమీకరించే క్రమంలో స్థానిక గిరిజన సంక్షేమ శాఖ హాస్టల్ బాలికలను నిర్వాహకులు, అధికారులు ఒకే ట్రాక్టర్లో పరిమితికి మించి ఎక్కించారు.
అడుగడుగునా ప్రమాదమే..
ట్రాక్టర్ ట్రాలీలో కూర్చోవడానికి కూడా స్థలం లేకపోవడంతో బాలికలంతా నిలబడి, ఒకరినొకరు గట్టిగా పట్టుకుని ప్రయాణించాల్సి వచ్చింది. ఏజెన్సీ ప్రాంతంలోని ఎగుడుదిగుడు, ప్రమాదకరమైన ఘాట్ రోడ్లపై ట్రాక్టర్ వేగంగా వెళ్తుండటంతో బాలికలు భయంతో బిక్కుబిక్కుమంటూ ప్రయాణించారు. ఏ మాత్రం అదుపుతప్పినా లేదా కుదుపులకు గురైనా పెను ప్రమాదం జరిగే అవకాశం ఉందని ప్రత్యక్ష సాక్షులు ఆందోళన వ్యక్తం చేశారు.
సాక్షాత్తు ఎస్టీ కమిషన్ సభ్యులు హాజరైన కార్యక్రమానికే గిరిజన ఆడపిల్లలను ఇలా పశువుల మాదిరిగా ట్రాక్టర్లలో తరలించడంపై స్థానికులు, గిరిజన సంఘాల నాయకులు తీవ్ర స్థాయిలో మండిపడుతున్నారు. "విద్యార్థులకు రక్షణ కల్పించాల్సిన హాస్టల్ సిబ్బంది, అధికారులే ఇలా బాధ్యతారహితంగా వ్యవహరించడం దారుణం. ప్రయాణంలో ఏదైనా అనుకోని ప్రమాదం జరిగి విద్యార్థుల ప్రాణాలకు హాని కలిగితే ఎవరు బాధ్యత వహిస్తారు?" అని స్థానికులు ప్రశ్నిస్తున్నారు.
బాలికల ప్రాణాలతో చెలగాటమాడిన సంబంధిత హాస్టల్ వార్డెన్, నిర్లక్ష్యంగా వ్యవహరించిన అధికారులపై ఉన్నతాధికారులు తక్షణమే విచారణ జరిపి కఠిన చర్యలు తీసుకోవాలని ప్రజలు డిమాండ్ చేస్తున్నారు. భవిష్యత్తులో ఇలాంటి ఘటనలు పునరావృతం కాకుండా విద్యార్థుల రవాణాకు ప్రత్యేక బస్సులు లేదా సురక్షిత వాహనాలను ఏర్పాటు చేయాలని కోరుతున్నారు.




