Narmetta: నర్మెటలో దసరా సెలవుల్లో శ్రీ చైతన్య స్కూల్ మూసివేత!

Narmetta: ప్రభుత్వం ప్రకటించిన దసరా సెలవుల్లోనూ పాఠశాల నిర్వహణ చేపట్టడంపై నర్మెట మండల కేంద్రంలోని శ్రీ చైతన్య పాఠశాల వ్యవహారం చర్చనీయాంశంగా మారింది. ప్రభుత్వ సెలవుల నిబంధనలు అమలవుతున్నాయా? ప్రైవేట్ పాఠశాలలపై విద్యాశాఖ అధికారుల పర్యవేక్షణ ఎంతవరకు ఉంది? అనే ప్రశ్నలు ఈ ఘటనతో తెరపైకి వచ్చాయి. ప్రభుత్వం ప్రకటించిన దసరా సెలవులను పాటించకుండా శ్రీ చైతన్య పాఠశాలను నిర్వహిస్తున్నట్లు గుర్తించిన ఎస్ఎఫ్ఐ నాయకులు ఈ విషయంపై స్పందించారు. నర్మెట మండల ఎస్ఎఫ్ఐ నాయకులు భూక్య కృష్ణ పాఠశాలను సందర్శించి, విషయాన్ని సంబంధిత మండల విద్యాశాఖాధికారి ఎంఈఓ దృష్టికి తీసుకెళ్లారు. అనంతరం ఎంఈఓ సమక్షంలో పాఠశాలను మూసివేశారు.

ప్రైవేట్ పాఠశాలలపై పర్యవేక్షణ ఏది?

ప్రభుత్వం ప్రకటించిన సెలవుల్లోనూ పాఠశాలలు నిర్వహిస్తే వాటిని పర్యవేక్షించాల్సిన బాధ్యత విద్యాశాఖ అధికారులపై ఉందని ఎస్ఎఫ్ఐ నాయకులు పేర్కొన్నారు. నిబంధనలను ఉల్లంఘించే విద్యాసంస్థలపై అధికారులు తగిన చర్యలు తీసుకోవాలని డిమాండ్ చేశారు. విద్యార్థుల హక్కులను కాపాడేందుకు ఎస్ఎఫ్ఐ నిరంతరం పోరాడుతుందని స్పష్టం చేశారు.సెలవుల సమయంలోనూ పాఠశాలలు నిర్వహించే పరిస్థితి ఎందుకు ఏర్పడుతోంది? ఇలాంటి ఘటనలు పునరావృతం కాకుండా విద్యాశాఖ అధికారులు ఎలాంటి చర్యలు తీసుకుంటారు? అన్నది వేచి చూడాలి.