Kothaguda: కొత్తగూడలో ఘనంగా తెలంగాణ విమోచన దినోత్సవ వేడుకలు!

Kothaguda: మహబూబాబాద్ జిల్లా కొత్తగూడ ఏజెన్సీ ప్రాంతంలో తెలంగాణ విమోచన దినోత్సవ వేడుకలు అత్యంత వైభవంగా జరిగాయి. సెప్టెంబర్ 17ను పురస్కరించుకుని BRS పార్టీ శ్రేణులు మండల కేంద్రంలో భారీ ఎత్తున సంబరాలు నిర్వహించాయి. ఈ కార్యక్రమానికి ములుగు నియోజకవర్గ ఇన్‌ఛార్జ్ బడే నాగజ్యోతి, ములుగు జిల్లా BRS అధ్యక్షుడు కాకులమర్రి లక్ష్మణ్ బాబు ముఖ్య అతిథులుగా హాజరయ్యారు.

కార్యక్రమంలో భాగంగా పార్టీ నాయకులు, కార్యకర్తలు గులాబీ జెండాలతో కొత్తగూడ వీధుల్లో భారీ ర్యాలీ నిర్వహించి, మాజీ ముఖ్యమంత్రి కేసీఆర్ చిత్రపటానికి ఘనంగా పాలాభిషేకం చేశారు.

గిరిజన సంక్షేమం KCRతోనే సాధ్యం

ఈ సందర్భంగా బడే నాగజ్యోతి మాట్లాడుతూ, గిరిజనుల సంక్షేమానికి నిజమైన గుర్తింపు ఇచ్చిన ఏకైక నాయకుడు కేసీఆర్ అని కొనియాడారు. BRS హయాంలో గిరిజన రిజర్వేషన్లను 6 శాతం నుంచి 10 శాతానికి పెంచడమే కాకుండా, ఏజెన్సీ పరిధిలోని 20 వేల మంది గిరిజనులకు పోడు భూముల హక్కు పత్రాలు అందించి వారి జీవితాల్లో వెలుగులు నింపారని గుర్తుచేశారు. అధికారం ఉన్నా లేకున్నా గిరిజనుల గుండెల్లో కేసీఆర్ స్థానం చిరస్థాయిగా ఉంటుందని స్పష్టం చేశారు.

కాంగ్రెస్ ప్రభుత్వంపై తీవ్ర ధ్వజం

రాష్ట్రంలో అధికారంలో ఉన్న కాంగ్రెస్ ప్రభుత్వం గిరిజనుల హక్కులను కాలరాస్తోందని నాయకులు మండిపడ్డారు. 10 శాతం రిజర్వేషన్ల అమలును తొక్కిపెడుతూ, 100 రోజుల్లో నెరవేరుస్తామన్న హామీలను తుంగలో తొక్కారని విమర్శించారు. ప్రజా సమస్యలను గాలికొదిలేసిన కాంగ్రెస్ తీరుపై BRS శ్రేణులు తీవ్ర నిరసన వ్యక్తం చేశాయి.

ఈ వేడుకల్లో స్థానిక BRS నాయకులు, కార్యకర్తలు మరియు ప్రజలు పెద్ద సంఖ్యలో పాల్గొన్నారు.