Parkal: పరకాలలో కాంగ్రెస్ పార్టీ దిష్టిబొమ్మ దహనం చేసిన బీజేపీ నాయకులు!

Parkal: భారత ప్రధానమంత్రి నరేంద్ర మోదీ పై కాంగ్రెస్ పార్టీ అధ్యక్షుడు మల్లికార్జున ఖర్గే చేసిన అనుచిత వ్యాఖ్యలను నిరసిస్తూ, బీజేపీ రాష్ట్ర అధ్యక్షుడు ఎన్. రామచందర్ రావు పిలుపు మేరకు బీజేపీ పరకాల పట్టణ శాఖ అధ్యక్షుడు గాజుల నిరంజన్ ఆధ్వర్యంలో పరకాల బస్టాండ్ సర్కిల్‌లో కాంగ్రెస్ పార్టీ దిష్టిబొమ్మను దహనం చేసి నిరసన వ్యక్తం చేశారు.

ఈ సందర్భంగా గాజుల నిరంజన్ మాట్లాడుతూ, దేశ ప్రధానమంత్రి పట్ల కనీస గౌరవం పాటించలేని రాజకీయ భాష ప్రజాస్వామ్య సంప్రదాయాలకు విరుద్ధమని అన్నారు. రాజకీయాల్లో విమర్శలకు అవకాశం ఉందని, అయితే అవి ప్రజా సమస్యలు, ప్రభుత్వ విధానాలకే పరిమితం కావాలని స్పష్టం చేశారు. ప్రధానమంత్రి పట్ల అనుచిత వ్యాఖ్యలు చేయడం సరికాదని పేర్కొంటూ, ఖర్గే తన వ్యాఖ్యలపై బాధ్యత వహించాలని, కాంగ్రెస్ పార్టీ తన వైఖరిని స్పష్టం చేయాలని డిమాండ్ చేశారు.

ప్రజాస్వామ్యంలో విమర్శలు ఉండాలి. కానీ వ్యక్తిగత అనుచిత వ్యాఖ్యలు ఉండకూడదు అని పేర్కొన్న ఆయన, రాజకీయ నాయకులు తమ మాటల్లో సంయమనం పాటించాలని సూచించారు.

ఈ నిరసన కార్యక్రమంలో బీజేపీ జిల్లా ప్రధాన కార్యదర్శి ఆర్.పి. జయంతి లాల్, పరకాల మున్సిపల్ 12వ వార్డు కౌన్సిలర్ ఆకుల శ్రీధర్, పట్టణ ప్రధాన కార్యదర్శి సంగా పురుషోత్తం, ఉపాధ్యక్షుడు మిడిదొడ్డి నరేష్, నాయకులు వెనిశెట్టి శారద, పిట్ట కిషోర్, దంచనాదుల సత్యనారాయణ, ముత్యాల దేవేందర్, మెంతుల సురేష్, దామ సతీష్, కక్కు రాజు, సల్పల సురేష్, రంతు తదితర బీజేపీ నాయకులు, కార్యకర్తలు పాల్గొన్నారు.