Vizianagaram: రాష్ట్రీయ ఆవిష్కరణల పోటీల్లో ‘సీతం’ విద్యార్థుల హవా!

విజయనగరం, అక్టోబరు 18: రాష్ట్రీయ ఆవిష్కరణల పోటీలు – 2026 జిల్లా స్థాయి పోటీల్లో విజయనగరంలోని సత్య ఇన్‌స్టిట్యూట్ ఆఫ్ టెక్నాలజీ అండ్ మేనేజ్‌మెంట్‌ (సీతం) విద్యార్థులు అసాధారణ ప్రతిభ కనబరిచారు. విశాఖపట్నంలోని రతన్ టాటా ఆవిష్కరణల కేంద్రం ఆధ్వర్యంలో, యూనియన్ బ్యాంక్ సామాజిక సేవా సంస్థ సహకారంతో నిర్వహించిన ఈ పోటీల్లో మూడు ప్రథమ బహుమతులనూ సాధించారు.

కృత్రిమ మేధ, సమాచార విశ్లేషణ విభాగానికి చెందిన ఈశ్వర్‌ బృందం రూపొందించిన ‘నాన్న కల’, విద్యుత్, ఎలక్ట్రానిక్స్ విభాగానికి చెందిన ఎల్‌. మోహన్‌ బృందం రూపొందించిన ‘సౌరశక్తితో పనిచేసే ఆధునిక చిన్న శీతల నిల్వ కేంద్రం’, అదే విభాగానికి చెందిన రవితేజ బృందం రూపొందించిన ‘రక్షణ డ్రోన్‌’ ప్రాజెక్టులు విజేతలుగా నిలిచాయి.

విజేతలైన మూడు బృందాలకు రూ.10 వేల చొప్పున నగదు బహుమతితో పాటు ప్రశంసాపత్రాలు అందజేశారు. విశాఖపట్నంలోని రతన్ టాటా ఆవిష్కరణల కేంద్రంలో జరిగిన కార్యక్రమంలో ఆ కేంద్రం ముఖ్య కార్యనిర్వహణాధికారి డాక్టర్ రవి ఈశ్వరపు, కార్యక్రమ సమన్వయకర్త కె. సురేష్ కుమార్ విద్యార్థులకు బహుమతులు, ప్రశంసాపత్రాలు అందజేశారు. దీంతో సీతం విద్యార్థులు మొత్తం రూ.30 వేల నగదు బహుమతులు గెలుచుకున్నారు.

మూడు బృందాలూ త్వరలో జరగనున్న రాష్ట్రస్థాయి పోటీలకు అర్హత సాధించాయి. విద్యార్థుల సృజనాత్మకత, సాంకేతిక నైపుణ్యం, వినూత్న ఆలోచనలను సీతం యాజమాన్యం అభినందించింది. విద్యార్థుల్లో ఆవిష్కరణలు, ఔత్సాహిక పారిశ్రామికతను ప్రోత్సహిస్తున్న రతన్ టాటా ఆవిష్కరణల కేంద్రం, యూనియన్ బ్యాంక్ సామాజిక సేవా సంస్థలకు కృతజ్ఞతలు తెలిపింది.