Madhurawada: మధురవాడ 7వ వార్డులో వైఎస్సార్‌సీపీ అభ్యర్థి పోతిన జాహ్నవి ప్రచారం

మధురవాడ: జీవీఎంసీ ఎన్నికల నేపథ్యంలో మధురవాడ 7వ వార్డులో వైఎస్సార్‌సీపీ కార్పొరేటర్ అభ్యర్థి పోతిన జాహ్నవి విస్తృతంగా ఇంటింటి ప్రచారం నిర్వహించారు. బుధవారం మరికావలస, కార్పెంటర్స్ కాలనీ, డ్రైవర్స్ కాలనీల్లో పర్యటిస్తూ స్థానికులను కలుసుకుని వారి సమస్యలను అడిగి తెలుసుకున్నారు. ఈ సందర్భంగా తనకు మద్దతు ఇవ్వాలని, ఫ్యాన్ గుర్తుపై ఓటు వేయాలని ఓటర్లను అభ్యర్థించారు.

ఈ సందర్భంగా పోతిన జాహ్నవి మాట్లాడుతూ, తనకు అవకాశం కల్పించిన వైఎస్సార్‌సీపీ అధినేత వైఎస్‌ జగన్‌మోహన్‌రెడ్డికి కృతజ్ఞతలు తెలిపారు. తనపై ఉంచిన నమ్మకాన్ని నిలబెట్టుకుంటూ ప్రజలకు అందుబాటులో ఉండి సేవలందిస్తానని పేర్కొన్నారు. ప్రచారంలో ప్రజలు ప్రధానంగా తాగునీరు, రహదారులు, డ్రైనేజీ సమస్యలను తన దృష్టికి తీసుకొస్తున్నారని, వాటి పరిష్కారానికి కృషి చేస్తానని హామీ ఇచ్చారు.

గతంలో తమ కుటుంబం ప్రజలకు అందుబాటులో ఉన్న సమయంలో వార్డులో వాటర్ ట్యాంకర్ల సౌకర్యం, ఆసుపత్రి అభివృద్ధి, పాఠశాల భవనాల నిర్మాణం వంటి పనులు జరిగాయని గుర్తుచేశారు. తన తండ్రి అనుభవం, సూచనలతో వార్డు అభివృద్ధికి కృషి చేస్తానని, ప్రజలకు ఎల్లప్పుడూ అందుబాటులో ఉంటానని స్పష్టం చేశారు. ఈ కార్యక్రమంలో వైఎస్సార్‌సీపీ వార్డు ఇన్‌చార్జులు, సీనియర్ నాయకులు, మహిళా విభాగం ప్రతినిధులు, యువత పాల్గొన్నారు.