Visakhapatnam: ఐక్యరాజ్యసమితి వేదికకు అరకు ఎంపీ తనూజ రాణి!

Visakhapatnam: అరకు పార్లమెంట్ సభ్యురాలిగా ప్రజా జీవితంలో అడుగుపెట్టిన డా. గుమ్మ తనూజ రాణి, ఇప్పుడు అంతర్జాతీయ వేదికపై భారతదేశానికి ప్రాతినిధ్యం వహించే అరుదైన అవకాశాన్ని దక్కించుకున్నారు. ఐక్యరాజ్యసమితి 81వ సర్వసభ్య సమావేశానికి సంబంధించిన కార్యక్రమాల్లో పాల్గొనే భారత పార్లమెంటరీ ప్రతినిధి బృందంలో ఆమెకు చోటు లభించడం విశేషంగా నిలిచింది.

ఆదివాసీ ప్రాంతం నుంచి ఒక మహిళా పార్లమెంట్ సభ్యురాలు భారత పార్లమెంటరీ ప్రతినిధి బృందంలో భాగస్వామిగా న్యూయార్క్ పర్యటనకు వెళ్లడం అరకు ప్రాంత ప్రజలకు, గిరిజన సమాజానికి గర్వకారణంగా మారింది. ముఖ్యంగా గిరిజన యువత, మహిళలు, విద్యార్థులకు ఇది స్ఫూర్తిదాయకమైన పరిణామంగా నిలుస్తోంది.

ఈ సందర్భంగా అరకు ఎంపీ దంపతులు డా. గుమ్మ తనూజ రాణి, వైసీపీ యువనేత చెట్టి వినయ్, వైసీపీ అధినేత, రాష్ట్ర మాజీ ముఖ్యమంత్రి వైఎస్ జగన్ మోహన్ రెడ్డిని మర్యాదపూర్వకంగా కలిశారు. ఐక్యరాజ్యసమితి 81వ సర్వసభ్య సమావేశానికి సంబంధించిన కార్యక్రమాలకు భారత పార్లమెంటరీ ప్రతినిధి బృందంలో ఎంపికైన డా. గుమ్మ తనూజ రాణిని జగన్ మోహన్ రెడ్డి అభినందించి శుభాకాంక్షలు తెలిపారు.

193 దేశాలు సభ్యులుగా ఉన్న ఐక్యరాజ్యసమితి 81వ సర్వసభ్య సమావేశానికి సంబంధించిన అక్టోబర్ 5 నుంచి 12వ తేదీ వరకు జరిగే కార్యక్రమాల్లో పాల్గొనే 18 మంది సభ్యుల భారత పార్లమెంటరీ ప్రతినిధి బృందంలో డా. గుమ్మ తనూజ రాణికి చోటు దక్కడం ప్రత్యేక ప్రాధాన్యత సంతరించుకుంది.

అరకు వంటి గిరిజన ప్రాంతం నుంచి ఒక మహిళా ఎంపీ అంతర్జాతీయ వేదికపై భారతదేశానికి ప్రాతినిధ్యం వహించడం అరుదైన అవకాశంగా నిలుస్తోంది. ఇది అరకు ప్రాంత ప్రజల ఆకాంక్షలకు, గిరిజన యువతలోని ప్రతిభకు స్ఫూర్తినిచ్చే పరిణామంగా నిలుస్తోంది.