Anakapalli: అనకాపల్లిలో స్థానిక సమరానికి జనసేన సమాయత్తం!

Anakapalli: ఆంధ్రప్రదేశ్‌లో త్వరలో జరగనున్న స్థానిక సంస్థల ఎన్నికలకు జనసేన పార్టీ ఇప్పటి నుంచే కార్యాచరణను వేగవంతం చేస్తోంది. అనకాపల్లి నియోజకవర్గంలో 100 శాతం స్ట్రైక్‌ రేట్‌ సాధించడమే లక్ష్యంగా ముందుకు సాగాలని మాజీ మంత్రి, అనకాపల్లి ఎమ్మెల్యే కొణతాల రామకృష్ణ పార్టీ ఎన్నికల నిర్వహణ కమిటీ సభ్యులకు దిశానిర్దేశం చేశారు. కూటమి భాగస్వామ్య పార్టీల నాయకులతో సమన్వయం చేసుకుంటూ, అత్యధిక స్థానాల్లో విజయం సాధించేలా ప్రణాళికాబద్ధంగా పనిచేయాలని సూచించారు.

జనసేన పార్టీ అధినేత, రాష్ట్ర ఉప ముఖ్యమంత్రి పవన్‌ కల్యాణ్‌ నాయకత్వంలో అనకాపల్లి నియోజకవర్గానికి ఎన్నికల నిర్వహణ కమిటీ, సమన్వయకర్తలు, నిర్వాహక దళ్‌ సభ్యులను ఏర్పాటు చేసిన నేపథ్యంలో అనకాపల్లి జనసేన పార్టీ కార్యాలయంలో సమావేశం నిర్వహించారు. ఈ సమావేశంలో రానున్న స్థానిక ఎన్నికల్లో అనుసరించాల్సిన వ్యూహాలు, క్షేత్రస్థాయిలో పార్టీని బలోపేతం చేసే చర్యలు, ఎన్నికల నిర్వహణకు సంబంధించి చేపట్టాల్సిన కార్యక్రమాలపై కొణతాల రామకృష్ణ సభ్యులకు పలు సూచనలు చేశారు.

బలమైన అభ్యర్థుల ఎంపికే కీలకం

స్థానిక సంస్థల ఎన్నికలు పార్టీ సంస్థాగత బలోపేతానికి, గ్రామస్థాయి నుంచి పట్టణ స్థాయి వరకు పార్టీ పునాదులను మరింత పటిష్ఠం చేసుకోవడానికి కీలకమని కొణతాల పేర్కొన్నారు. ఎన్నికలను సమర్థవంతంగా ఎదుర్కొనేందుకు ఇప్పటి నుంచే స్పష్టమైన కార్యాచరణతో ముందుకు సాగాలని సూచించారు. అభ్యర్థుల ఎంపికలో ప్రత్యేక శ్రద్ధ వహించాలని, పార్టీ ఆవిర్భావం నుంచి జనసేన కోసం కష్టపడి పనిచేస్తున్న నాయకులు, కార్యకర్తలకు తగిన అవకాశాలు కల్పించాలన్న పార్టీ అధిష్ఠానం సూచనలను దృష్టిలో ఉంచుకోవాలని గుర్తుచేశారు.

కూటమి సమన్వయంతో ముందుకు..

కూటమి భాగస్వామ్య పార్టీల నాయకులతో నిరంతరం సంప్రదింపులు జరుపుతూ, పరస్పర అవగాహనతో ఎన్నికల కార్యాచరణను రూపొందించాలని కొణతాల సూచించారు. స్థానిక పరిస్థితులను పరిగణనలోకి తీసుకుని, సమన్వయంతో ముందుకు సాగడం ద్వారా ఎన్నికల నిర్వహణను మరింత సమర్థవంతంగా చేపట్టవచ్చని పేర్కొన్నారు.

అనకాపల్లి నియోజకవర్గ పరిధిలో జనసేన పార్టీని మరింత బలోపేతం చేయడంతో పాటు, స్థానిక సంస్థల ఎన్నికల్లో కూటమి అభ్యర్థులు అత్యధిక స్థానాల్లో విజయం సాధించేలా ఎన్నికల నిర్వహణ కమిటీ సభ్యులు, సమన్వయకర్తలు, నిర్వాహక దళ్‌ సభ్యులు సమష్టిగా పనిచేయాలని పిలుపునిచ్చారు.

స్పష్టమైన ప్రణాళిక, పటిష్ఠమైన సమన్వయం, బలమైన అభ్యర్థుల ఎంపికతో అనకాపల్లి నియోజకవర్గంలో 100 శాతం స్ట్రైక్‌ రేట్‌ లక్ష్యాన్ని చేరుకునేందుకు ప్రతి ఒక్కరూ కృషి చేయాలని కొణతాల రామకృష్ణ సూచించారు. రానున్న స్థానిక ఎన్నికలను దృష్టిలో ఉంచుకుని పార్టీ శ్రేణులు ఇప్పటి నుంచే క్షేత్రస్థాయిలో సమన్వయంతో పనిచేయాల్సిన అవసరాన్ని ఆయన స్పష్టం చేశారు.