Anakapalli: అనకాపల్లి తొలి జడ్పీ చైర్మన్ రేసులో పది మంది ఆశావహులు!
Anakapalli: తొలి జడ్పీ చైర్మన్ పదవి కోసం వైసీపీలో జోరందుకున్న ఆశావహుల ప్రయత్నాలు. రేసులో పది మంది వరకు పేర్లు వినిపిస్తుండటంతో రాజకీయ వర్గాల్లో ఆసక్తి.
Anakapalli: అనకాపల్లి తొలి జడ్పీ చైర్మన్ రేసులో పది మంది ఆశావహులు!
Anakapalli: అనకాపల్లి జిల్లాలో రాజకీయ సమీకరణాలు క్రమంగా వేడెక్కుతున్నాయి. జీవీఎంసీ అభ్యర్థుల ఎంపికపై వైఎస్సార్‌ కాంగ్రెస్‌ పార్టీ దృష్టి సారించిన నేపథ్యంలో.. తాజాగా జిల్లా పరిషత్‌ పీఠంపైనా ఆ పార్టీ గురిపెట్టినట్లు రాజకీయ వర్గాల్లో చర్చ సాగుతోంది. అనకాపల్లి జిల్లా ఏర్పడిన తర్వాత తొలిసారిగా జిల్లా పరిషత్‌ ప్రక్రియ జరగనుండటంతో.. తొలి జడ్పీ చైర్మన్ ఎవరు అవుతారన్న అంశం ఆసక్తిని రేకెత్తిస్తోంది.
జిల్లా స్థాయిలో శనివారం జరిగిన విస్తృత సమావేశంలో జడ్పీ చైర్మన్ పదవిని ఆశిస్తున్న పలువురు నాయకులు తమ ఆసక్తిని వ్యక్తం చేసినట్లు సమాచారం. వైసీపీకి చెందిన సుమారు పది మంది ఆశావహులు ఈ పదవిపై ఆసక్తి చూపుతున్నట్లు పార్టీ వర్గాల్లో చర్చ జరుగుతోంది.
ఆశావహుల్లో మాడుగుల నియోజకవర్గం నుంచి ఇద్దరు, అనకాపల్లి నియోజకవర్గం నుంచి ఇద్దరు, నర్సీపట్నం నియోజకవర్గం నుంచి ఇద్దరు, ఎలమంచిలి నియోజకవర్గం నుంచి ఒకరు ఉన్నట్లు తెలుస్తోంది. మిగిలిన ఆశావహులు జిల్లాలోని ఇతర ప్రాంతాలకు చెందినవారిగా పార్టీ వర్గాల్లో ప్రచారం సాగుతోంది.
ఇదిలా ఉండగా.. అనకాపల్లి మాజీ ఎంపీపీ గొర్రెలు సూరిబాబు పేరు కూడా జడ్పీ చైర్మన్ పదవికి ఆశావహుల జాబితాలో వినిపిస్తున్నట్లు రాజకీయ వర్గాల్లో చర్చ జరుగుతోంది. అయితే చివరకు పార్టీ అధిష్ఠానం ఎవరికి అవకాశం కల్పిస్తుందన్నది మాత్రం ఇంకా స్పష్టతకు రాలేదు.
అనకాపల్లి జిల్లా ఏర్పడిన తర్వాత ఇదే తొలి జిల్లా పరిషత్‌ ఎన్నికల ప్రక్రియ కావడంతో.. తొలి జడ్పీ చైర్మన్ పీఠం మరింత ప్రాధాన్యత సంతరించుకుంది. ఒకే పార్టీ నుంచి ఇంతమంది ఆశావహులు ముందుకు రావడం కూడా వైసీపీ అంతర్గత రాజకీయాల్లో చర్చనీయాంశంగా మారింది.
నియోజకవర్గాల వారీగా రాజకీయ సమీకరణాలు, సామాజిక వర్గాల సమతుల్యత, స్థానికంగా ఉన్న బలాబలాలు.. చివరి నిర్ణయంలో కీలకంగా మారే అవకాశాలు కనిపిస్తున్నాయి. ఈ నేపథ్యంలో పార్టీ అధిష్ఠానం ఎవరికి మొగ్గు చూపుతుంది? ఆశావహుల్లో సీటు ఎవరిని వరిస్తుంది? అనకాపల్లి జిల్లా తొలి జడ్పీ చైర్మన్‌గా ఎవరి పేరు చరిత్రలో నిలుస్తుంది? అన్నది ఇప్పుడు జిల్లా రాజకీయాల్లో హాట్‌టాపిక్‌గా మారింది.
