Big Issue: చైనా వస్తువులకు భారత్ రూట్?.. ట్రంప్ వ్యాఖ్యలపై హెచ్‌ఎమ్‌టీవీ విశ్లేషణ!

Big Issue: భారత్‌పై మరోసారి అమెరికా మాజీ అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. చైనా వస్తువులను భారత్ ద్వారా అక్రమంగా (ట్రాన్స్‌షిప్‌మెంట్) అమెరికాకు తరలిస్తున్నారని, చైనాకు భారత్ సహకరిస్తోందంటూ తీవ్ర ఆరోపణలు చేశారు. దీనిపై హెచ్‌ఎమ్‌టీవీ (hmtv) నిర్వహించిన ప్రత్యేక డిబేట్‌లో అంతర్జాతీయ వ్యవహారాల నిపుణులు సంజయ్ పాల్గొని కీలక వివరాలు వెల్లడించారు.

అమెరికా విధిస్తున్న అధిక సుంకాలను (టారిఫ్‌లు) తప్పించుకునేందుకు చైనా తమ ఉత్పత్తులను కంబోడియా, లాఓస్, బంగ్లాదేశ్ వంటి తక్కువ లేదా సున్నా టారిఫ్ ఉన్న దేశాల ద్వారా ఇతర దేశాలకు పంపుతోందనేది ప్రధాన ఆరోపణ. అయితే, భారత్ స్వయంగా చైనా దిగుమతుల వల్ల తమ స్థానిక పరిశ్రమలు, కార్మికులు దెబ్బతినకుండా ఉండేందుకు చైనా ఉత్పత్తులపై (టాయ్స్, టెక్స్‌టైల్స్, 5G నెట్‌వర్క్స్) ఎప్పటికప్పుడు కఠిన నిబంధనలు, యాంటీ డంపింగ్ డ్యూటీలను విధిస్తోంది.

ఔషధ తయారీకి కావలసిన ఏపీఐ (API) లాంటి కొన్ని అనివార్యమైన ఇంటర్మీడియట్ రా మెటీరియల్స్ మాత్రమే భారత్ చైనా నుంచి దిగుమతి చేసుకుంటోంది తప్ప, ఉద్దేశపూర్వకంగా చైనా వస్తువులను అమెరికాకు పంపించే ప్రసక్తే లేదని నిపుణులు స్పష్టం చేశారు. అమెరికా సుప్రీంకోర్టు టారిఫ్ నిర్ణయాలను తప్పుపట్టిన నేపథ్యంలో, మళ్లీ టారిఫ్‌లు విధించేందుకే అమెరికా ఇలాంటి ఒత్తిడి తంత్రాలను ప్రయోగిస్తోందని విశ్లేషించారు.