Off The Record: డీఎస్సీపై జగన్ లోకేష్ పొలిటకల్ గేమ్!

Off The Record: డీఎస్సీ వేలాది మంది నిరుద్యోగుల ఏళ్ల కల. ఒక ఉపాధ్యాయ ఉద్యోగం కోసం నెలలు, సంవత్సరాల పాటు చదవాలి. కోచింగ్ తీసుకోవాలి. ఉద్యోగమే లక్ష్యంగా ఎన్నో త్యాగాలు చేయాలి. కుటుంబ సభ్యుల ఆశలు, అభ్యర్థుల కష్టం.. ఇవన్నీ కలిసే ఒక ర్యాంక్‌గా మారతాయి. అలాంటి పోటీ పరీక్షలో విజయం సాధించి దాదాపు 16 వేల మంది అభ్యర్థులు ఉపాధ్యాయ ఉద్యోగాలు పొందారు. ఇప్పుడు అదే డీఎస్సీ నియామక ప్రక్రియపై ఆరోపణలు, ప్రత్యారోపణలు రావడంతో.. తాము సాధించుకున్న ఉద్యోగాల పరిస్థితి ఏమిటన్న ఆందోళన కొందరు అభ్యర్థుల్లో కనిపిస్తోంది.

డీఎస్సీలో ముఖ్యంగా స్పోర్ట్స్ కోటా నియామకాలు, సర్టిఫికెట్ల చెల్లుబాటుపై వైసీపీ అభ్యంతరాలు వ్యక్తం చేస్తోంది. అసోసియేషన్ల నుంచి సమర్పించిన సర్టిఫికెట్ల ఆధారంగా రాత పరీక్ష లేకుండానే కొందరికి ఉద్యోగాలు ఇచ్చారన్నది ఆ పార్టీ ప్రధాన ఆరోపణల్లో ఒకటి. దీనికి సంబంధించి కొన్ని వివరాలు, పత్రాలను వైసీపీ అధినేత జగన్ మీడియా ముందుకు తీసుకొచ్చారు. నియామక ప్రక్రియపై సమగ్ర విచారణ జరపాలని డిమాండ్ చేస్తున్నారు.

మరోవైపు కూటమి నేతలు ఈ ఆరోపణలను ఖండిస్తున్నారు. కొందరి అర్హతలు లేదా సర్టిఫికెట్లపై అభ్యంతరాలు ఉంటే వాటిని నిబంధనల ప్రకారం పరిశీలించవచ్చని.. కానీ మొత్తం డీఎస్సీ ప్రక్రియను అనుమానాస్పదంగా చూపించడం ద్వారా కష్టపడి ఉద్యోగాలు సాధించిన 16 వేల మంది అభ్యర్థుల మనోభావాలను దెబ్బతీసే ప్రయత్నం జరుగుతోందని ఆరోపిస్తున్నారు. రాజకీయ లబ్ధి కోసం ఈ వ్యవహారాన్ని పెద్దది చేస్తున్నారని విమర్శిస్తున్నారు.

అయితే ఇక్కడ ప్రధానంగా తేలాల్సింది రాజకీయ ఆరోపణల్లో ఎవరి మాట నిజమన్నది మాత్రమే కాదు. అసలు నిబంధనలు ఏం చెబుతున్నాయి? వివాదాస్పదంగా మారిన సర్టిఫికెట్లు చెల్లుబాటు అవుతాయా? ఆయా అభ్యర్థులకు ఉన్న అర్హతలు నియామక నిబంధనలకు అనుగుణంగా ఉన్నాయా? రాత పరీక్షకు సంబంధించిన నిబంధనలు ఎలా వర్తించాయి? అన్నదే. వీటిపై అధికారిక విచారణ, సంబంధిత రికార్డుల పరిశీలన ద్వారా స్పష్టత రావాల్సి ఉంటుంది. నిజంగా అక్రమాలకు సంబంధించిన ఆధారాలు ఉంటే వాటిని అధికారులకు సమర్పించడం, విచారణ కోరడం లేదా న్యాయస్థానాలను ఆశ్రయించడం ద్వారా చట్టపరమైన పరిష్కారం కోరవచ్చు. తప్పు చేసినట్లు తేలిన వ్యక్తులపై చర్యలు తీసుకోవడం కూడా అదే ప్రక్రియలో సాధ్యమవుతుంది. అదే సమయంలో ఒకరి అర్హతపై ఉన్న అనుమానాన్ని మొత్తం నియామక ప్రక్రియకు ఆపాదించడం వల్ల ఎలాంటి తప్పు చేయకుండా మెరిట్‌తో ఉద్యోగం సాధించిన అభ్యర్థులు కూడా ప్రశ్నార్థకంగా మారే అవకాశం ఉంది.

ఇక్కడే ప్రభుత్వ బాధ్యత కూడా కీలకం. వివాదాస్పద అంశాలపై వాస్తవాలను స్పష్టంగా వెల్లడించడం, అవసరమైన పత్రాలను పరిశీలించడం, తప్పు ఉంటే బాధ్యులపై చర్యలు తీసుకోవడం. అదే సమయంలో అర్హులైన అభ్యర్థులకు అన్యాయం జరగకుండా చూడడం అవసరం. ప్రతిపక్షం కూడా ఆరోపణలను రాజకీయ వేదికపై మాత్రమే కాకుండా, తన వద్ద ఉన్న ఆధారాలను అధికారిక విచారణ ప్రక్రియలో ముందుంచితే ఆరోపణల్లో వాస్తవమెంత అన్నది తేలుతుంది.

ఎందుకంటే ఇది కేవలం అధికార, ప్రతిపక్ష పార్టీల మధ్య రాజకీయ వివాదం కాదు. 16 వేల మంది అభ్యర్థుల ఉద్యోగాలు, వారి కుటుంబాల భవిష్యత్తుతో ముడిపడిన అంశం. ఒక అభ్యర్థి డీఎస్సీ ర్యాంకు కోసం చేసిన సంవత్సరాల కష్టాన్ని ఒక్క రాజకీయ ఆరోపణతో అనుమానాస్పదంగా మార్చకూడదు. అదే సమయంలో నిజంగా నిబంధనలకు విరుద్ధంగా ఏదైనా జరిగితే దానిపై చర్యలు లేకుండా వదిలేయడం కూడా సరికాదు. అందుకే డీఎస్సీ వివాదానికి పరిష్కారం ఆరోపణలు, ప్రత్యారోపణల్లో కాకుండా.. ఆధారాలు, పారదర్శక విచారణ, న్యాయపరమైన స్పష్టతలోనే ఉంది. తప్పు చేసిన వ్యక్తి ఎవరైనా చర్యలు ఎదుర్కోవాలి. కానీ తప్పు చేయకుండా కష్టపడి ఉద్యోగం సాధించిన అభ్యర్థి మాత్రం నష్టపోకూడదు. ప్రస్తుతం ఈ వ్యవహారంలో అత్యంత ముఖ్యమైన అంశం కూడా ఇదే. మరి.. డీఎస్సీ నియామకాల్లో తప్పులు జరిగాయా..? లేదా..? అన్న దానిపై రాజకీయాలకు పోకుండా.. వాస్తవాలు తేల్చి, అభ్యర్థులకు భరోసా కల్పిస్తారని ఆశిద్దాం.