Renigunta: రేణిగుంటలో వివాహిత ఆత్మహత్య భర్తపై ఆరోపణలు!

Renigunta: భర్త మద్యపానం, కుటుంబాన్ని పట్టించుకోకపోవడంతో మనస్తాపానికి గురైన ఓ వివాహిత ఆత్మహత్యకు పాల్పడిన ఘటన రేణిగుంట మండలంలో చోటుచేసుకుంది. ఈ ఘటనపై రేణిగుంట పోలీసులు కేసు నమోదు చేసి దర్యాప్తు చేపట్టారు.

పోలీసుల వివరాల ప్రకారం చిత్తూరు జిల్లా తవణంపల్లి మండలానికి చెందిన కీర్తి (30)కి సుమారు 12 ఏళ్ల క్రితం సునీల్ కుమార్‌తో వివాహమైంది. వీరికి ఇద్దరు పిల్లలు ఉన్నారు. ప్రస్తుతం ఈ దంపతులు రేణిగుంట మండలం కరకంబాడి పంచాయతీ పరిధిలోని తారకరామ నగర్‌లో నివాసం ఉంటున్నారు.

భర్త మద్యానికి బానిసై కుటుంబ బాధ్యతలను పట్టించుకోవడం లేదని, ఈ విషయంపై పలుమార్లు పెద్దలు సర్దిచెప్పినా మార్పు రాలేదని పోలీసులకు ఇచ్చిన ఫిర్యాదులో మృతురాలి తల్లి పేర్కొన్నట్లు సమాచారం. గురువారం రాత్రి భార్యాభర్తల మధ్య వాగ్వాదం జరిగినట్లు పోలీసులు తెలిపారు. అనంతరం రాత్రి కీర్తి ఇంటి వరండాలో ఉరివేసుకుని ఆత్మహత్యకు పాల్పడింది.

అర్ధరాత్రి ఈ విషయం వెలుగులోకి రావడంతో కుటుంబ సభ్యులు ఆందోళనకు గురయ్యారు. మృతురాలి తల్లి ఇచ్చిన ఫిర్యాదు మేరకు రేణిగుంట పోలీసులు కేసు నమోదు చేశారు. మృతదేహాన్ని పోస్టుమార్టం నిమిత్తం తిరుపతిలోని రుయా ఆసుపత్రి మార్చురీకి తరలించారు. ఘటనపై పోలీసులు దర్యాప్తు కొనసాగిస్తున్నారు.