Tirupati: ఏకం క్షేత్రంలో కల్కి భగవాన్ భౌతికకాయానికి ఎమ్మెల్యే నివాళి
Tirupati: తిరుపతి జిల్లా బత్తలవల్లం ఏకం క్షేత్రంలో కల్కి భగవాన్ భౌతికకాయానికి సూళ్లూరుపేట ఎమ్మెల్యే డాక్టర్ నెలవల విజయశ్రీ ఘనంగా నివాళులర్పించారు.
Tirupati: ఏకం క్షేత్రంలో కల్కి భగవాన్ భౌతికకాయానికి ఎమ్మెల్యే నివాళి
తిరుపతి: తిరుపతి జిల్లా వరదయ్యపాళెం మండలం బత్తలవల్లం గ్రామంలోని ఆధ్యాత్మిక కేంద్రమైన ఏకం క్షేత్రంలో కల్కి భగవాన్ భౌతికకాయానికి సూళ్లూరుపేట శాసనసభ్యురాలు డాక్టర్ నెలవల విజయశ్రీ శుక్రవారం ఘనంగా నివాళులర్పించారు. ఏకం క్షేత్రానికి చేరుకున్న ఎమ్మెల్యే.. కల్కి భగవాన్ పార్థివదేహాన్ని దర్శించుకుని అత్యంత భావోద్వేగంతో శ్రద్ధాంజలి ఘటించారు. అనంతరం ఆయన చిత్రపటానికి పూలమాలలు వేసి అంజలి అర్పించిన ఎమ్మెల్యే, ఆశ్రమ ప్రతినిధులు మరియు భక్తులను పరామర్శించి ఓదార్చారు.
ఈ సందర్భంగా ఎమ్మెల్యే డాక్టర్ విజయశ్రీ మాట్లాడుతూ.. సమాజంలో ఆధ్యాత్మిక వికాసం, మానసిక ప్రశాంతత పెంపొందించడంలో కల్కి భగవాన్ చేసిన సేవలు ఎనలేనివని కొనియాడారు. బత్తలవల్లం గ్రామాన్ని ప్రపంచ ఆధ్యాత్మిక పటంలో నిలిపిన ఏకం క్షేత్రం, ఆయన చేపట్టిన అనేక సామాజిక, ఆధ్యాత్మిక కార్యక్రమాలు కోట్లాది మందికి మార్గదర్శకంగా నిలిచాయని తెలిపారు. ప్రజాసేవలోనూ, ఆధ్యాత్మిక ప్రయాణంలోనూ ఆయన చూపిన మార్గం నిరంతరం అనుసరణీయమన్నారు.
“భౌతికంగా కల్కి భగవాన్ మన మధ్య లేకపోయినా, ఆయన అందించిన దివ్యమైన బోధనలు, ఆలోచనలు సమాజానికి నిరంతరం స్ఫూర్తినిస్తూనే ఉంటాయి. ఆయన పవిత్ర ఆత్మకు శాంతి చేకూరాలని ప్రార్థిస్తున్నాం. ఈ తీవ్ర దుఃఖ సమయంలో ఆయన కుటుంబ సభ్యులకు, ప్రపంచవ్యాప్తంగా ఉన్న భక్తులకు నా ప్రగాఢ సానుభూతిని తెలియజేస్తున్నాను” అని పేర్కొన్నారు.
నియోజకవర్గ అభివృద్ధితో పాటు ఆధ్యాత్మిక, సేవా కార్యక్రమాలకు నిరంతరం ప్రాధాన్యమిచ్చే ఎమ్మెల్యే విజయశ్రీ ఈ కార్యక్రమంలో ప్రత్యేక ఆకర్షణగా నిలిచారు. క్షేత్రానికి విచ్చేసిన ఎమ్మెల్యే డా.నెలవల విజయశ్రీ కు ఆశ్రమ ప్రతినిధులు ఘన స్వాగతం పలికి దగ్గరుండి దర్శన ఏర్పాట్లు చేశారు. ఈ కార్యక్రమంలో స్థానిక ప్రజాప్రతినిధులు, ప్రముఖ వ్యాపారవేత్తలు, తెదేపా/కూటమి నాయకులు, ఆశ్రమ ప్రతినిధులు మరియు భక్తులు పెద్ద సంఖ్యలో పాల్గొన్నారు.
