Sullurupeta: స్థానిక సంస్థల ఎన్నికల్లో వైఎస్సార్‌సీపీ గెలుపే లక్ష్యం: కిలివేటి!

సూళ్ళూరుపేట: ​తిరుపతి జిల్లా నాయుడుపేటలో వైఎస్సార్ కాంగ్రెస్ పార్టీ సూళ్ళూరుపేట నియోజకవర్గ స్థాయి సమావేశం, పార్టీ ఐడీ కార్డుల పంపిణీ కార్యక్రమం నిర్వహించారు. ఉమ్మడి నెల్లూరు జిల్లా పార్టీ అధ్యక్షుడు డాక్టర్ కాకాని గోవర్ధన్ రెడ్డి సూచనల మేరకు జరిగిన ఈ కార్యక్రమానికి మాజీ ఎమ్మెల్యే, నియోజకవర్గ సమన్వయకర్త కిలివేటి సంజీవయ్య హాజరై ప్రసంగించారు. రాబోయే స్థానిక సంస్థల ఎన్నికల్లో పార్టీ గెలుపే లక్ష్యంగా కార్యకర్తలు పనిచేయాలని పిలుపునిచ్చారు.

​కూటమి ప్రభుత్వంపై సంజీవయ్య తీవ్రస్థాయిలో విమర్శలు గుప్పించారు. వైఎస్సార్సీపీ నాయకులు, కార్యకర్తలపై అక్రమ కేసులు బనాయిస్తూ పోలీసులతో వేధింపులకు గురిచేస్తున్నారని ఆరోపించారు. ఎన్నికల ముందు ఇచ్చిన హామీలను నెరవేర్చడంలో ప్రభుత్వం పూర్తిగా విఫలమైందన్నారు. నీటి సంక్షోభం, పశుగ్రాసం కొరతతో రైతులు తీవ్ర ఇబ్బందులు పడుతున్నారని, సోమశిల-కండలేరు నీటి లభ్యతపై ప్రభుత్వం నిర్లక్ష్యం వహిస్తోందని విమర్శించారు.

​గడచిన రెండేళ్లుగా కొత్త పెన్షన్ల మంజూరుపై స్పష్టత లేదని, ఇప్పుడు ఎన్నికల వేళ దరఖాస్తులు స్వీకరించడంపై ప్రజలకు సమాధానం చెప్పాలని డిమాండ్ చేశారు. అలాగే కూటమి ప్రభుత్వం వచ్చిన తర్వాత కొత్తగా ఎన్ని ఇళ్లు మంజూరు చేశారో వెల్లడించాలని కోరారు. నియోజకవర్గ ప్రజలు స్థానిక ఎమ్మెల్యేకు అవకాశం ఇచ్చినా అక్కడ ఆశించిన స్థాయిలో అభివృద్ధి జరగడం లేదని ఎద్దేవా చేశారు. తిరుమల లడ్డూ ప్రసాదం వివాదంపై అధికారిక సంస్థల సమాచారాన్ని మాత్రమే ప్రజలు విశ్వసించాలని, టీటీడీ కూడా కఠిన నాణ్యతా ప్రమాణాలు పాటిస్తున్నట్లు స్పష్టం చేసిందని పేర్కొన్నారు.

​సూళ్ళూరుపేట నియోజకవర్గంలోని ఆరు మండలాలు, రెండు మున్సిపాలిటీలు, జడ్పీటీసీ, ఎంపీటీసీ స్థానాల్లో విజయం సాధించేలా ఇప్పటినుంచే సమన్వయంతో కృషి చేయాలని కోరారు. గత వైఎస్సార్సీపీ ప్రభుత్వ సంక్షేమ పథకాలను ప్రజల్లోకి తీసుకెళ్లాలని, కష్టకాలంలో పార్టీ కోసం పనిచేసే ప్రతి కార్యకర్తకూ తాను అండగా ఉంటానని భరోసా ఇచ్చారు.

​ఈ కార్యక్రమంలో పార్టీ నాయకులు తంబిరెడ్డి సుబ్రహ్మణ్యం రెడ్డి, కామిరెడ్డి రాజారెడ్డి, మద్దాలి సోమశేఖర్ రెడ్డి, దేశిరెడ్డి మధుసూదన్ రెడ్డి, ఒట్టూరు కిషోర్ యాదవ్, పాదర్తి హరినాధ రెడ్డి, పలువురు మండల అధ్యక్షులు, మాజీ ఎంపీపీలు, వైఎస్సార్సీపీ కార్యకర్తలు పెద్ద సంఖ్యలో పాల్గొన్నారు.