Chandragiri: చంద్రగిరిలో దాడులకు పాల్పడితే సహించేది లేదు

చంద్రగిరి: తిరుపతి రూరల్, అక్టోబరు 21(గరుడధాత్రి న్యూస్) చంద్రగిరి నియోజకవర్గంలో ఎంపీటీసీ, జెడ్పీటీసీ ఎన్నికల నామినేషన్ల సందర్భంగా చోటుచేసుకున్న దాడులపై ఎమ్మెల్యే పులివర్తి నాని తీవ్రంగా స్పందించారు. కలెక్టరేట్ ఎదుట ధర్నా అనంతరం నిర్వహించిన ప్రెస్ మీట్‌లో ఆయన మాట్లాడుతూ, ఎన్నికలు ప్రశాంతంగా జరిగేందుకు కూటమి నాయకులు సహకరిస్తున్నారని, అయితే కొన్ని ప్రాంతాల్లో దాడులు చోటుచేసుకోవడం ఆందోళనకరమని పేర్కొన్నారు.

చంద్రగిరి, పాకాల, చిన్నగొట్టిగల్లు మండలాల్లో కూటమి నాయకులు, కార్యకర్తలపై దాడులు జరిగాయని ఆయన ఆరోపించారు. దాడులకు సంబంధించిన వివరాలు, ఆధారాలను పోలీసులకు అందజేశామని, అవసరమైన సాక్ష్యాలను న్యాయస్థానం ముందు ఉంచుతామని తెలిపారు. 2024 ఎన్నికల సమయంలో తనపై జరిగిన దాడికి సంబంధించి వీడియోలు, ఇతర ఆధారాలు తన వద్ద ఉన్నాయని నాని పేర్కొన్నారు.

ఎన్నికల ప్రక్రియలో పోలీసులు, అధికారులు నిష్పక్షపాతంగా వ్యవహరించాలని, ప్రజాస్వామ్యబద్ధంగా నామినేషన్లు వేసుకునే ప్రతి ఒక్కరికీ రక్షణ కల్పించాలని కోరారు. కలెక్టరేట్ వద్ద ధర్నా అనంతరం తనను పోలీసులు అరెస్టు చేశారని పేర్కొంటూ, ఈ పరిణామాలపై ఆయన ప్రశ్నలు లేవనెత్తారు. చెవిరెడ్డి కుటుంబం అధికారులపై ఒత్తిడి తెస్తోందని, నియోజకవర్గ అభివృద్ధికి సంబంధించిన అంశాల్లోనూ అడ్డంకులు సృష్టిస్తోందని ఆరోపించారు.

కూటమి నాయకులు, కార్యకర్తలు ఎవరూ భయపడవద్దని, ప్రజాస్వామ్యబద్ధంగా ఎన్నికల్లో పాల్గొనాలని పిలుపునిచ్చారు. వైఎస్సార్‌సీపీ కార్యకర్తలు కూడా ఎవరి ప్రలోభాలకో, ఒత్తిళ్లకో లోనై దాడులకు పాల్పడకుండా ప్రశాంతంగా ఎన్నికల్లో పాల్గొనాలని విజ్ఞప్తి చేశారు.

తాను చంద్రగిరి నియోజకవర్గాన్ని విడిచిపెట్టే ప్రసక్తే లేదని, ప్రజలకు ఎల్లప్పుడూ అందుబాటులో ఉంటూ నియోజకవర్గ అభివృద్ధికి కృషి చేస్తానని స్పష్టం చేశారు. చంద్రగిరిలో శాంతియుత వాతావరణంలో ఎన్నికలు జరగాలని, ఓటర్లు ఎలాంటి భయాందోళనలు లేకుండా తమ ఓటు హక్కును వినియోగించుకోవాలని ఎమ్మెల్యే పులివర్తి నాని, తిరుపతి రూరల్ టిడిపి అధ్యక్షుడు ఈశ్వర్ రెడ్డి కోరారు.