Tirupati: తిరుపతి జిల్లా మున్సిపల్ ఎన్నికలకు పకడ్బందీ ఏర్పాట్లు!

Tirupati: తిరుపతి నగరపాలక సంస్థతో పాటు జిల్లాలోని నాలుగు మున్సిపాలిటీల పరిధిలో నవంబర్ 1న నిర్వహించనున్న మున్సిపల్ ఎన్నికలను ప్రశాంత వాతావరణంలో, స్వేచ్ఛాయుతంగా, నిష్పక్షపాతంగా నిర్వహించేందుకు అన్ని ఏర్పాట్లు పూర్తి చేసినట్లు జిల్లా కలెక్టర్ డా. ఎస్. వెంకటేశ్వర్ తెలిపారు.

శనివారం ఎస్వీ ఆర్ట్స్ కళాశాల ప్రాంగణంలోని ఎన్నికల సామగ్రి పంపిణీ కేంద్రాన్ని మున్సిపల్ కమిషనర్ ఎం. జయకృష్ణతో కలిసి కలెక్టర్ పరిశీలించారు. పోలింగ్ సిబ్బందికి బ్యాలెట్ బాక్సులు, బ్యాలెట్ పేపర్లు, ఇతర ఎన్నికల సామగ్రి పంపిణీ ప్రక్రియను సమీక్షించారు.

నవంబర్ 1న ఉదయం 7 గంటల నుంచి సాయంత్రం 5 గంటల వరకు పోలింగ్ నిర్వహించనున్నట్లు కలెక్టర్ తెలిపారు. ఇప్పటికే 90 శాతం ఓటరు స్లిప్పుల పంపిణీ పూర్తయిందని పేర్కొన్నారు. గర్భిణులు, బాలింతలు, దివ్యాంగులు, వృద్ధులు, మహిళా ఓటర్లకు ప్రత్యేక సౌకర్యాలు కల్పించడంతో పాటు క్యూ నిర్వహణకు ఎన్‌ఎస్‌ఎస్ వాలంటీర్ల సేవలను వినియోగించనున్నట్లు వెల్లడించారు.