ఇంకా ఎమ్మెల్సీ ఓటు నమోదు చేసుకోలేదా? పట్టభద్రులకు శుభవార్త చెప్పిన సీఈవో సుదర్శన్ రెడ్డి!

తెలంగాణలో జరగనున్న పట్టభద్రుల (గ్రాడ్యుయేట్) ఎమ్మెల్సీ ఎన్నికల ఓటరు నమోదు ప్రక్రియలో గ్రాడ్యుయేట్లకు అత్యంత కీలకమైన ఊరట లభించింది. దరఖాస్తుల సమర్పణ గడువును పొడిగిస్తున్నట్లు రాష్ట్ర ప్రధాన ఎన్నికల అధికారి (CEO) సి. సుదర్శన్ రెడ్డి వెల్లడించారు. గత కొన్ని రోజులుగా ఎన్నికల సంఘం ఆన్‌లైన్ పోర్టల్‌లో తీవ్ర సాంకేతిక సమస్యలు తలెత్తడం, సర్వర్లు మొరాయించడంతో దరఖాస్తు ప్రక్రియ పూర్తిగా నిలిచిపోయింది. దీంతో నిర్దేశిత గడువులోగా దరఖాస్తు చేసుకోలేపోతున్నామని వేలాది మంది పట్టభద్రుల నుంచి ఆందోళన వ్యక్తం కావడంతో స్పందించిన ఎన్నికల కమిషన్ ఈ నిర్ణయం తీసుకుంది.

గ్రాడ్యుయేట్ ఎమ్మెల్సీ ఎన్నికలకు నామినేషన్ల దాఖలు ప్రక్రియ ముగిసే చివరి రోజు వరకు అర్హులైన పట్టభద్రులు ఓటరుగా దరఖాస్తు చేసుకోవచ్చని సీఈవో సుదర్శన్ రెడ్డి భరోసా ఇచ్చారు. సాంకేతిక లోపాలను త్వరితగతిన సరిచేసి ఆన్‌లైన్ సేవలను వేగవంతంగా పునరుద్ధరిస్తున్నామని తెలిపారు.

ఎన్నికల షెడ్యూల్ ప్రకారం ఈ నెల 25వ తేదీన ముసాయిదా (డ్రాఫ్ట్) ఓటర్ల జాబితాను అధికారికంగా విడుదల చేయనున్నట్లు చెప్పారు. ఆ తదనంతరం నవంబర్ 25వ తేదీ నుంచి డిసెంబర్ 10వ తేదీ వరకు దరఖాస్తులపై ఏవైనా అభ్యంతరాలు లేదా ఫిర్యాదులు ఉంటే వాటిని స్వీకరిస్తామని స్పష్టం చేశారు. ఆ తదుపరి ప్రక్రియలను పూర్తి చేసి అర్హులందరికీ ఓటు హక్కు కల్పించేలా యంత్రాంగం చర్యలు తీసుకుంటోందని వెల్లడించారు.