Revanth Reddy: రైతులకు సాగునీరు అందించడమే లక్ష్యం.. మహారాష్ట్రతో చర్చలకు సిద్ధమైన తెలంగాణ ప్రభుత్వం

Revanth Reddy: తెలంగాణలో సాగునీటి అవసరాలను తీర్చేందుకు రాష్ట్ర ప్రభుత్వం కీలక ప్రాజెక్టులపై దృష్టి పెట్టింది. తుమ్మిడిహెట్టి బ్యారేజీ నిర్మాణానికి సంబంధించి మహారాష్ట్ర ప్రభుత్వంతో చర్చలకు సిద్ధంగా ఉండాలని సీఎం రేవంత్ రెడ్డి అధికారులను ఆదేశించారు. ఈ ప్రాజెక్టుతో ఉమ్మడి ఆదిలాబాద్ జిల్లాలో రెండు లక్షల ఎకరాలకు సాగునీరు అందించాలని ప్రభుత్వం లక్ష్యంగా పెట్టుకుంది. తుమ్మిడిహెట్టి బ్యారేజీ నిర్మాణంపై మహారాష్ట్ర ప్రభుత్వంతో త్వరలో చర్చలు జరగనున్న నేపథ్యంలో తెలంగాణ ప్రభుత్వం కసరత్తు వేగవంతం చేసింది. ఈ నెల 23 తర్వాత చర్చలకు ఆహ్వానించే అవకాశం ఉందని మహారాష్ట్ర సీఎం దేవేంద్ర ఫడ్నవీస్ సూచించినట్లు రేవంత్ రెడ్డి తెలిపారు. శుక్రవారం బోధి పెవిలియన్‌లో నీటిపారుదల శాఖ అధికారులతో నిర్వహించిన సమీక్షలో ఈ మేరకు ఆదేశాలు జారీ చేశారు. కేంద్ర జల సంఘం ఆధ్వర్యంలో ఢిల్లీలో జరిగిన సమావేశాల్లో చర్చించిన అంశాలు, కోరిన నివేదికలను సిద్ధం చేయాలని సూచించారు.

బ్యారేజీ ఎత్తుపై కీలక చర్చ

తుమ్మిడిహెట్టి వద్ద 152 మీటర్ల ఎత్తుతో బ్యారేజీ నిర్మిస్తే ఎంత నీటిని తరలించవచ్చు? 150 మీటర్ల ఎత్తుతో నిర్మిస్తే ఎల్లంపల్లి వరకు ఎంత నీరు తీసుకెళ్లవచ్చు? అనే అంశాలపై అధికారులు సీఎంకు వివరించారు. 152 మీటర్ల ఎత్తుతో నిర్మిస్తే సుమారు 2,300 ఎకరాలు, 150 మీటర్ల ఎత్తుతో నిర్మిస్తే వెయ్యి ఎకరాల లోపు భూములు ముంపునకు గురయ్యే అవకాశం ఉందని అంచనా వేశారు. మహారాష్ట్ర పరిధిలో గ్రామాలు ముంపునకు గురయ్యే ప్రమాదం లేదని అధికారులు తెలిపినట్లు సమాచారం.

ఆదిలాబాద్‌లో రెండు లక్షల ఎకరాలకు నీరు

ఉమ్మడి ఆదిలాబాద్ జిల్లాలోని అటవీ, గిరిజన ప్రాంతాలకు సాగునీరు అందించడమే తుమ్మిడిహెట్టి ప్రాజెక్టు ప్రధాన లక్ష్యమని రేవంత్ రెడ్డి పేర్కొన్నారు. ఈ ప్రాజెక్టు ద్వారా రెండు లక్షల ఎకరాలకు నీరు అందించాలని ప్రభుత్వం భావిస్తోంది. గతంలో 148 మీటర్ల ఎత్తుకు మహారాష్ట్ర అంగీకరించినప్పటికీ, ఆ ఎత్తుతో ఆశించిన స్థాయిలో నీటిని తరలించడం సాధ్యం కాదని సీఎం అభిప్రాయపడ్డారు. 152 మీటర్ల ఎత్తుకు అంగీకారం పొందేందుకు నీటి లభ్యత, ముంపు విస్తీర్ణం, సాంకేతిక అంశాలపై పూర్తి నివేదికలు సిద్ధం చేయాలని ఆదేశించారు.

డిండి, అచ్చంపేట ప్రాజెక్టులకూ అదనపు నీరు

డిండి ప్రాజెక్టుకు ఏదుల రిజర్వాయర్ నుంచి 0.5 టీఎంసీలు, అచ్చంపేట ఎత్తిపోతల పథకానికి 0.1 టీఎంసీల నీటిని అందించే ఏర్పాట్లు చేయాలని సీఎం సూచించారు. ఈ రెండు ప్రాజెక్టులకు అవసరమైన 0.6 టీఎంసీల నీటిని శ్రీశైలం నుంచి అదనంగా సమకూర్చుకునే మార్గాలను పరిశీలించాలని చెప్పారు. పంపులు, పంప్‌హౌస్‌లు, కాలువలు, సొరంగాల సామర్థ్యంపై అధ్యయనం చేసి అవసరమైన రూపకల్పన సిద్ధం చేయాలని అధికారులను ఆదేశించారు.

పాలమూరు ప్రాజెక్టుకు ఇబ్బంది లేకుండా చర్యలు

డిండి, అచ్చంపేట ప్రాజెక్టులకు నీటిని తరలించే క్రమంలో పాలమూరు ప్రాజెక్టుకు కేటాయించిన నీటికి ఎలాంటి ఇబ్బంది కలగకూడదని ప్రభుత్వం స్పష్టం చేసింది. నార్లాపూర్ నుంచి నీటిని తరలించాలా? ఏదుల నుంచి తీసుకెళ్లాలా? అనే అంశాలపై అధికారులు ఖర్చుల వివరాలను సమర్పించారు. పాలమూరు ప్రాజెక్టు ప్రయోజనాలకు ఆటంకం లేకుండా అదనపు నీటిని సమకూర్చుకునే మార్గాన్ని ఎంచుకోవాలని సీఎం సూచించారు.