Telangana: చేపపిల్లల పంపిణీ ఏది? సీఎం రేవంత్ రెడ్డిని ప్రశ్నించిన జంగిటి శ్రీనివాస్!

Telangana: తెలంగాణ రాష్ట్రంలోని మత్స్యకారుల ఆర్థిక అభివృద్ధికి, ముదిరాజ్ సామాజిక వర్గానికి జీవనోపాధి కల్పించడానికి కీలకమైన ఉచిత చేపపిల్లల పంపిణీ పథకం అమలుపై కాంగ్రెస్ ప్రభుత్వాన్ని ముదిరాజ్ హక్కుల సాధన సమితి రాష్ట్ర అధ్యక్షులు జంగిటి శ్రీనివాస్ ముదిరాజ్ ప్రశ్నించారు. మత్స్య సొసైటీలకు ఉచిత చేపపిల్లల పంపిణీ విషయంలో ప్రభుత్వం నిర్లక్ష్యంగా వ్యవహరిస్తోందని ఆయన ఆరోపించారు.

చేపపిల్లల పంపిణీ కోసం కేటాయించినట్లు పేర్కొంటున్న రూ.116 కోట్ల నిధుల పరిస్థితిపై ప్రభుత్వం స్పష్టత ఇవ్వాలని డిమాండ్ చేశారు.శనివారం ముదిరాజ్ హక్కుల సాధన సమితి రాష్ట్ర ప్రధాన కార్యదర్శి మేడికాయల వెంకటేశం, చిన్నకోడూర్ మాజీ వైస్ ఎంపీపీ కీసరి పాపయ్యతో కలిసి జంగిటి శ్రీనివాస్ ముదిరాజ్ మాట్లాడుతూ, రాష్ట్రంలోని మత్స్య సొసైటీలకు సకాలంలో ఉచిత చేపపిల్లలు అందకపోవడం వల్ల మత్స్యకారులు ఇబ్బందులు ఎదుర్కొనే పరిస్థితి ఏర్పడుతోందని ఆవేదన వ్యక్తం చేశారు.

మత్స్య సంపదపై ఆధారపడి జీవించే కుటుంబాలకు ప్రభుత్వ పథకాల ద్వారా అందాల్సిన ప్రయోజనాలు సకాలంలో అందేలా చర్యలు తీసుకోవాలని కోరారు.గత ప్రభుత్వంలో ముందస్తు ప్రణాళికతో పంపిణీ జరిగేది గత బీఆర్ఎస్ ప్రభుత్వ హయాంలో ముఖ్యమంత్రి కేసీఆర్, నీటిపారుదల శాఖ మంత్రిగా పనిచేసిన హరీశ్ రావు చేపట్టిన ముందస్తు ప్రణాళికల వల్ల వర్షాకాలం ప్రారంభమైన మొదటి నెలలోనే ఉచిత చేపపిల్లల పంపిణీ కార్యక్రమాన్ని చేపట్టేవారని జంగిటి శ్రీనివాస్ ముదిరాజ్ గుర్తుచేశారు.

చెరువులు, కుంటలు, చెక్‌డ్యాముల్లో నీరు చేరిన సమయంలో చేపపిల్లలను వదలడం వల్ల అవి పెరిగి మత్స్య సంపద అభివృద్ధి చెందడానికి, మత్స్యకారులకు ఉపాధి అవకాశాలు పెరగడానికి అవకాశం ఉండేదని పేర్కొన్నారు. టెండర్ల ప్రక్రియను ముందుగానే పూర్తి చేసి, వర్షాకాలానికి అనుగుణంగా పంపిణీ కార్యక్రమాన్ని నిర్వహించేవారని తెలిపారు.

ప్రస్తుత కాంగ్రెస్ ప్రభుత్వ హయాంలో చేపపిల్లల పంపిణీపై మత్స్య సొసైటీలకు స్పష్టమైన సమాచారం అందడం లేదని, పంపిణీ ఆలస్యమైతే చెరువుల్లో చేపల పెంపకానికి అనుకూలమైన సమయాన్ని కోల్పోయే ప్రమాదం ఉందని ఆయన ఆందోళన వ్యక్తం చేశారు. ప్రభుత్వం గతంలో అమలైన విధానాలను పరిశీలించి, మత్స్యకారులకు ప్రయోజనం చేకూరేలా తక్షణ చర్యలు తీసుకోవాలని కోరారు.116 కోట్ల కేటాయింపుపై ప్రభుత్వం స్పష్టత ఇవ్వాలి.

ఉచిత చేపపిల్లల పంపిణీ కోసం రూ.116 కోట్లు కేటాయించినట్లు పేర్కొంటూ, ఆ నిధుల వినియోగం, విడుదల, పంపిణీ ప్రక్రియపై ప్రభుత్వం బహిరంగంగా వివరాలు వెల్లడించాలని జంగిటి శ్రీనివాస్ ముదిరాజ్ డిమాండ్ చేశారు.ప్రభుత్వం నిజంగా ఈ పథకానికి ఎంత మొత్తాన్ని కేటాయించింది? ఇప్పటివరకు ఎంత నిధిని విడుదల చేసింది? టెండర్ల ప్రక్రియ ఏ దశలో ఉంది? రాష్ట్రంలోని ఎన్ని మత్స్య సొసైటీలకు చేపపిల్లలు పంపిణీ చేశారు? ఇంకా ఎన్ని సొసైటీలకు పంపిణీ చేయాల్సి ఉంది? అనే అంశాలపై అధికారిక ప్రకటన చేయాలని కోరారు.

నిధుల కేటాయింపు మాత్రమే కాకుండా, అవి క్షేత్రస్థాయిలో మత్స్యకారులకు ఎలా ఉపయోగపడుతున్నాయన్నది కూడా ముఖ్యమని అన్నారు. మత్స్య సొసైటీల వారీగా నిధుల వివరాలను వెల్లడించి, పథకం అమలులో పారదర్శకతను పాటించాలని సూచించారు.మత్స్య సొసైటీల ఖాతాల్లో నగదు బదిలీ చేయాలి.ఉచిత చేపపిల్లల పంపిణీకి సంబంధించిన నిధులను అర్హత కలిగిన మత్స్య సొసైటీల వారీగా నేరుగా నగదు బదిలీ చేయాలని ముదిరాజ్ హక్కుల సాధన సమితి ప్రభుత్వాన్ని కోరింది.

చెరువులు, కుంటలు, చెక్‌డ్యాముల వారీగా మత్స్య సొసైటీల వివరాలను సేకరించి, అర్హతలను నిర్ధారించి, పారదర్శకమైన విధానంలో నిధులను అందించాలని సూచించారు. నిధులు సకాలంలో అందితే సొసైటీలు స్థానిక పరిస్థితులకు అనుగుణంగా చేపపిల్లల కొనుగోలు, చెరువుల్లో విడుదల వంటి కార్యక్రమాలను ప్రణాళికాబద్ధంగా నిర్వహించేందుకు అవకాశం ఉంటుందని పేర్కొన్నారు.

చెరువుల్లో చేపల పెంపకం సక్రమంగా సాగితే మత్స్యకారులకు ఉపాధి లభించడంతోపాటు చేపల ఉత్పత్తి పెరిగే అవకాశం ఉంటుందని తెలిపారు. పథకం అమలులో ఆలస్యం జరిగితే దాని ప్రభావం మత్స్యకార కుటుంబాల ఆదాయంపై పడే ప్రమాదం ఉందని ఆందోళన వ్యక్తం చేశారు.

ముదిరాజ్ సామాజిక వర్గానికి ఎన్నికల సమయంలో ఇచ్చిన హామీలను ప్రభుత్వం గుర్తుచేసుకోవాలని, మత్స్యకారుల సంక్షేమానికి సంబంధించిన పథకాలను మాటలకే పరిమితం చేయకుండా క్షేత్రస్థాయిలో అమలు చేయాలని కోరారు.

బీసీ-ఏ వర్గీకరణ, మత్స్యకార సంక్షేమంపై హామీలు నిలబెట్టుకోవాలి. ముదిరాజ్ సామాజిక వర్గానికి సంబంధించిన బీసీ-ఏ వర్గీకరణ అంశంతోపాటు, మత్స్యకారుల ఉపాధి, సంక్షేమం, ప్రభుత్వ పథకాల అమలుపై కూడా కాంగ్రెస్ ప్రభుత్వం స్పష్టమైన వైఖరి వెల్లడించాలని జంగిటి శ్రీనివాస్ ముదిరాజ్ డిమాండ్ చేశారు.

మత్స్యకారుల సమస్యలను ప్రభుత్వం నిర్లక్ష్యం చేయకుండా, వారి ప్రతినిధులతో సమావేశమై సమస్యల పరిష్కారానికి కార్యాచరణ రూపొందించాలని సూచించారు. చేపపిల్లల పంపిణీ, సబ్సిడీలు, మత్స్య సొసైటీలకు ఆర్థిక సహాయం వంటి అంశాల్లో అర్హులైన వారందరికీ న్యాయం జరగాలని అన్నారు. ఉచిత చేపపిల్లలు ఉష్ కాకి.. సబ్సిడీ స్వాహా.. ముదిరాజుల బీసీ-ఏ బిత్తరవాయే కదా సీఎం రేవంత్ రెడ్డి గారు?” అంటూ జంగిటి శ్రీనివాస్ ముదిరాజ్ ప్రభుత్వాన్ని ప్రశ్నించారు. మత్స్యకారుల సంక్షేమానికి సంబంధించిన నిధులు, పథకాల అమలుపై ప్రభుత్వం తక్షణమే స్పందించి, అర్హులైన మత్స్య సొసైటీలకు న్యాయం చేయాలని డిమాండ్ చేశారు.

ఈ కార్యక్రమంలో ముదిరాజ్ హక్కుల సాధన సమితి రాష్ట్ర అధ్యక్షులు జంగిటి శ్రీనివాస్ ముదిరాజ్, రాష్ట్ర ప్రధాన కార్యదర్శి మేడికాయల వెంకటేశం, మాజీ వైస్ ఎంపీపీ కీసరి పాపయ్య, సర్పంచులు యట సత్యలక్ష్మి యాదయ్య, చెరుకు రేఖ సంతోష్, శ్యామల దేవయ్య, బోనాల లింగం సొసైటీ అధ్యక్షుడు, ముదిరాజ్ సంఘం అధ్యక్షుడు గీకూరు అంజయ్య, గీకురు రమేష్, గీకూరు వంశీ, చేరుకు నారాయణ, పెండెల బాలయ్య,పాల్గొని మత్స్యకారుల సమస్యల పరిష్కారానికి ప్రభుత్వం చర్యలు తీసుకోవాలని కోరారు.