Chicken Price: చికెన్ లవర్స్‌కు గుడ్ న్యూస్.. తెలుగు రాష్ట్రాల్లో ఘోరంగా పడిపోయిన ధరలు

Chicken Price: తెలుగు రాష్ట్రాల్లోని మాంసాహార ప్రియులకు పౌల్ట్రీ మార్కెట్ సూపర్ న్యూస్ అందించింది. గత కొన్ని రోజులుగా ఆకాశాన్ని తాకిన చికెన్, కోడిగుడ్ల ధరలు ఒక్కసారిగా దిగొచ్చాయి. మొన్నటివరకు కిలో రూ.300 దాకా పలికిన చికెన్ ధర ప్రస్తుతం రూ.250 స్థాయికి పడిపోయింది. పవిత్రమైన కార్తీక మాసం త్వరలోనే ప్రారంభం కానుండటంతో మాంసాహారం తినే వారి సంఖ్య గణనీయంగా తగ్గడమే ఈ ధరల పతనానికి ప్రధాన కారణంగా కనిపిస్తోంది.

కార్తీక మాసం ఎఫెక్ట్.. పడిపోయిన డిమాండ్

సాధారణంగా శని, ఆదివారాల్లో చికెన్‌కు మార్కెట్‌లో విపరీతమైన డిమాండ్ ఉంటుంది. కానీ త్వరలో కార్తీక మాసం ప్రారంభం కానుండటంతో చాలామంది మాంసాహారానికి దూరంగా ఉండటానికి ప్రాధాన్యత ఇస్తారు. దీనికి తోడు మార్కెట్‌లో కోళ్ల సరఫరా ఎక్కువగా ఉండటం, కొనుగోలుదారులు తగ్గడంతో పౌల్ట్రీ వ్యాపారులు ధరలను భారీగా తగ్గించాల్సి వచ్చింది. వచ్చే రోజుల్లో కార్తీక మాసం మొదలైతే ఈ ధరలు మరిన్ని రోజులు మరింతగా పడిపోయే అవకాశం ఉందంటూ పౌల్ట్రీ వర్గాలు చెబుతున్నాయి.

తెలుగు రాష్ట్రాల్లో నేటి చికెన్ ధరలు ఇవే

అక్టోబర్ 31 నాటికి హైదరాబాద్, కరీంనగర్ జోన్లలో కిలో స్కిన్‌లెస్ చికెన్ ధర రూ.252 వద్ద లభిస్తుండగా, డ్రస్స్‌డ్ చికెన్ ధర రూ.223గా ఉండిపోయింది. అలాగే రిటైల్ లైవ్ బర్డ్ రూ.144, ఎక్స్ ఫారమ్ లైవ్ బర్డ్ ధర రూ.117 వరకు పలుకుతోంది. ఆంధ్రప్రదేశ్‌లో పరిస్థితి చూస్తే విజయవాడ జోన్‌లో కిలో స్కిన్‌లెస్ చికెన్ ధర రూ.266 కాగా, డ్రస్స్‌డ్ స్కిన్‌తో వచ్చే చికెన్ ధర రూ.236గా ఉంది. ఇక రిటైల్ లైవ్ బర్డ్ ధర రూ.152, ఫారమ్ లైవ్ బర్డ్ ధర రూ.125 వద్ద కొనసాగుతోంది.

కుప్పకూలిన కోడిగుడ్ల ధరలు

చికెన్ బాటలోనే కోడిగుడ్ల ధరలు కూడా భారీగా కుప్పకూలాయి. హైదరాబాద్, విజయవాడ జోన్లలో డజన్ కోడిగుడ్ల (12 గుడ్లు) ధర ప్రస్తుతం రూ.80కి దిగొచ్చింది. చికెన్, గుడ్ల రేట్లు తగ్గడంతో సామాన్య కుటుంబాలతో పాటు హోటళ్లు, రెస్టారెంట్లు, ఫాస్ట్ ఫుడ్ సెంటర్ల నిర్వాహకులకు మెటీరియల్ ఖర్చు తగ్గి ఊరట లభిస్తోంది. అయితే ఈ వ్యాపారంలో డిమాండ్ సడన్‌గా పడిపోవడంతో పౌల్ట్రీ రైతులకు మాత్రం రాబడి తగ్గి తీవ్ర నష్టం వాటిల్లుతోంది.

మున్ముందు మార్కెట్ పరిణామాలు

కోళ్ల దాణా ధరలు, రవాణా చార్జీలు, పెంపకం వ్యయం పెరిగిన వేళ ఇలా ధరలు తగ్గడం పౌల్ట్రీ వ్యాపారుల లాభాల మార్జిన్‌ను బాగా దెబ్బతీసింది. కార్తీక మాసం ముగిసేవరకు ఈ తక్కువ ధరల ధోరణి కొనసాగవచ్చని అంచనా వేస్తున్నారు. ఆ తర్వాత మళ్లీ డిమాండ్ పెరిగితేనే సాధారణ స్థాయికి ధరలు చేరుకునే అవకాశం ఉందంటూ నిపుణులు విశ్లేషిస్తున్నారు.