Kamareddy: అమ్మమ్మ ఇంటికి వచ్చిన యువతి విగతజీవిగా.. గాంధారిలో కలకలం

Kamareddy: కామారెడ్డి జిల్లా గాంధారి మండల కేంద్రంలో అర్ధరాత్రి దారుణ హత్యోదంతం చోటుచేసుకుంది. హైదరాబాదులో నివాసముంటూ ఇటీవల నిశ్చితార్థం కూడా జరుపుకున్న ఒక యువతి అత్యంత నిష్ఠురంగా హత్యకు గురైన ఘటన స్థానికంగా తీవ్ర సంచలనం సృష్టించింది.

మృతురాలిని కామారెడ్డి ప్రాంతానికి చెందిన ఆర్తి కౌర్ (19)గా పోలీసులు గుర్తించారు. వారం రోజుల క్రితమే గాంధారిలోని తన అమ్మమ్మ ఇంటికి వచ్చిన సదరు యువతి, శుక్రవారం అర్ధరాత్రి సమయంలో ఎవరికీ చెప్పకుండా ఇంట్లో నుంచి బయటకు వెళ్లి తిరిగి రాలేదు.

శనివారం ఉదయం ఆర్తి కౌర్ ఎంతకీ కనిపించకపోవడంతో కంగారుపడిన బంధువులు, కుటుంబ సభ్యులు చుట్టుపక్కల ప్రాంతాల్లో గాలించడం ప్రారంభించారు. ఈ క్రమంలో స్థానిక సెల్ టవర్ సమీపంలో తీవ్ర గాయాలతో విగతజీవిగా పడి ఉన్న యువతి మృతదేహాన్ని గమనించి తీవ్ర భయాందోళనకు గురయ్యారు.

తక్షణమే సమాచారం అందుకున్న డీఎస్పీ శ్రీనివాసరావు, సీఐ వీరయ్య చౌదరి, సీఐ సంతోష్, ఎస్సై మహేందర్ తమ బృందాలతో మరియు క్లూస్ టీమ్, డాగ్ స్క్వాడ్‌తో ఘటనా స్థలానికి చేరుకుని క్షుణ్ణంగా పరిశీలించారు. మృతదేహాన్ని స్వాధీనం చేసుకుని పోస్టుమార్టం నిమిత్తం బాన్సువాడ ఏరియా ఆసుపత్రికి తరలించారు.

బాధితురాలి నిశ్చితార్థం ఇటీవలే జరిగిందని, ఇంతలోనే ఈ దారుణం జరగడంతో కుటుంబంలో తీవ్ర విషాద ఛాయలు అలముకున్నాయని బంధువులు కన్నీరుమున్నీరవుతున్నారు.

ఈ సంచలన ఘటనపై కేసు నమోదు చేసుకుని విచారణ వేగవంతం చేసినట్లు ఎస్సై వెల్లడించారు. హత్య వెనుక ఉన్న గల కారణాలు, అర్ధరాత్రి ఆమెను బయటకు ఎవరు పిలిచారనే కోణంలో దర్యాప్తు చేస్తున్నారు. పరిసర ప్రాంతాల్లోని సీసీటీవీ (CCTV) కెమెరా ఫుటేజీలను సేకరించి నిందితులను గుర్తించే పనిలో పోలీసులు నిమగ్నమయ్యారు.