Kadiyam Srihari: కడియం శ్రీహరిపై కూడా వేటు తప్పదా..?

Kadiyam Srihari: తెలంగాణ రాజకీయాల్లో ఫిరాయింపుల ఎపిసోడ్ ఇప్పుడు అత్యంత కీలక మలుపు తిరుగుతోంది. బీఆర్ఎస్ పార్టీ టికెట్‌పై గెలిచి కాంగ్రెస్ గూటికి చేరిన ఖైరతాబాద్ ఎమ్మెల్యే దానం నాగేందర్‌పై అనర్హత వేటు పడటంతో.. ఇప్పుడు స్టేషన్ ఘన్‌పూర్ ఎమ్మెల్యే కడియం శ్రీహరి రాజకీయ భవితవ్యంపై తీవ్ర ఉత్కంఠ నెలకొంది. దానంపై వేటు వేసిన న్యాయస్థానం తీర్పుతో కడియం శ్రీహరిలోనూ టెన్షన్ మొదలైనట్లు ప్రచారం జరుగుతోంది.

2023 డిసెంబర్ అసెంబ్లీ ఎన్నికల్లో బీఆర్ఎస్ 'బీ ఫామ్'పై గెలుపొందిన కడియం శ్రీహరి, పార్లమెంట్ ఎన్నికల ముందు కాంగ్రెస్ పార్టీలో చేరారు. కాంగ్రెస్ అభ్యర్థిగా వరంగల్ ఎంపీ స్థానం బరిలో నిలిచిన తన కుమార్తె కడియం కావ్య గెలుపు కోసం ఆయన నియోజకవర్గంలో విస్తృతంగా ప్రచారం నిర్వహించారు. కాంగ్రెస్ కండువా కప్పుకోవడమే కాకుండా, కూతురు నామినేషన్ పత్రాలపై ఆయన సంతకం చేసినట్లు బలమైన ఆరోపణలు ఉన్నాయి. పబ్లిక్ మీటింగ్‌లలోనూ హస్తం నేతలతో కలిసి ఆయన జోరుగా పాల్గొనడం రాజకీయ వర్గాల్లో చర్చనీయాంశమైంది.

గతంలో బీఆర్ఎస్ నుంచి కాంగ్రెస్‌లోకి ఫిరాయించిన ఎమ్మెల్యేలతో పాటు కడియం శ్రీహరికి కూడా స్పీకర్ కోర్టు క్లీన్‌చిట్ ఇచ్చిన విషయం తెలిసిందే. అయితే, మిగతా ఎమ్మెల్యేలు కేవలం పార్టీ కండువాలు మాత్రమే మార్చగా.. కడియం శ్రీహరి మాత్రం స్వయంగా ప్రత్యర్థుల తరఫున ఎన్నికల ప్రచారంలో బహిరంగంగా పాల్గొన్నారని బీఆర్ఎస్ నేతలు కోర్టును ఆశ్రయించారు. దీనికి సంబంధించిన దృశ్యాలు, ఫొటోలు, వీడియోలు మరియు పత్రాలను బలమైన ఆధారాలుగా న్యాయస్థానానికి సమర్పించారు. ఒక పార్టీ గుర్తుపై గెలిచి, మరో పార్టీ అభ్యర్థి విజయం కోసం ప్రత్యక్షంగా ప్రచారం చేయడం కచ్చితంగా పార్టీ ఫిరాయింపుల నిరోధక చట్టం కిందకు వస్తుందని బీఆర్ఎస్ వర్గాలు గట్టిగా వాదిస్తున్నాయి.

ఇటీవల దానం నాగేందర్ విషయంలో హైకోర్టు తీసుకున్న సంచలన నిర్ణయం రాజకీయంగా పెను ప్రకంపనలు సృష్టించింది. ఇదే కోవలో త్వరలో విచారణకు రానున్న కడియం శ్రీహరి కేసులోనూ న్యాయస్థానం ఎలాంటి తీర్పు వెలువరిస్తుందనే దానిపై తీవ్ర ఆసక్తి నెలకొంది. సాక్ష్యాధారాలు బలంగా ఉండటంతో కడియం శ్రీహరి సభ్యత్వంపై కూడా అనర్హత వేటు పడే అవకాశం ఉందని న్యాయనిపుణులు అంచనా వేస్తున్నారు. ఒకవేళ అదే గనుక జరిగితే స్టేషన్ ఘన్‌పూర్ రాజకీయాల్లో భారీ ఉపఎన్నిక ముప్పు తప్పదని విశ్లేషకులు భావిస్తున్నారు. ఈ పరిణామాలు రానున్న రోజుల్లో తెలంగాణ రాజకీయాల్లో ఎలాంటి సంచలనాలకు కేంద్ర బిందువుగా మారుతాయో వేచి చూడాలి.