Hyderabad Traffic Advisory: ఆ రూట్లలో వెళ్తున్నారా? హైదరాబాద్ ట్రాఫిక్ పోలీసులు కీలక హెచ్చరిక..

Hyderabad Traffic Advisory: హైదరాబాద్ నగరంలో దేవీ శరన్నవరాత్రి ఉత్సవాల అనంతరం దుర్గామాత విగ్రహాల నిమజ్జనం దృష్ట్యా హైదరాబాద్ ట్రాఫిక్ పోలీసులు కీలక ప్రకటన చేశారు. పీపుల్స్ ప్లాజా, గార్డెన్ పాయింట్, జలవిహార్ మరియు సంజీవయ్య పార్క్‌లోని బేబీ పాండ్స్ (కృత్రిమ గుంటలు) వద్ద పెద్ద ఎత్తున విగ్రహాల నిమజ్జనం జరగనుండటంతో ఎన్టీఆర్ మార్గ్, నెక్లెస్ రోడ్ (పీవీ మార్గ్) మరియు ట్యాంక్ బండ్ పరిసర ప్రాంతాల్లో అక్టోబర్ 21 మధ్యాహ్నం 3:00 గంటల నుండి అక్టోబర్ 24 ఉదయం 6:00 గంటల వరకు ట్రాఫిక్ మళ్లింపులు అమల్లో ఉంటాయని జాయింట్ కమిషనర్ ఆఫ్ పోలీస్ (ట్రాఫిక్) డి. జోయల్ డేవిస్ వెల్లడించారు.

ప్రధాన ట్రాఫిక్ మళ్లింపు పాయింట్లు ఇవే:

పంజాగుట్ట / రాజ్‌భవన్ రోడ్: ఖైరతాబాద్ ఫ్లైఓవర్ వైపు వచ్చే వాహనాలను వి.వి. విగ్రహం వద్ద నిరంకారి జంక్షన్ వైపు మళ్లిస్తారు (కేవలం అమ్మవారి విగ్రహ వాహనాలకే అనుమతి).

నిరంకారి జంక్షన్: ఇక్బాల్ మినార్ వైపు వచ్చే ట్రాఫిక్‌ను పాత సైఫాబాద్ పోలీస్ స్టేషన్ వద్ద రవీంద్ర భారతి, మాసాబ్‌ట్యాంక్ వైపు మళ్లిస్తారు.

ఇక్బాల్ మినార్: సెక్రటేరియట్ వైపు వచ్చే వాహనాలను తెలంగాణ తల్లి ఫ్లైఓవర్ మీదుగా లోయర్ ట్యాంక్ బండ్ వైపు మళ్లిస్తారు.

ఖైరతాబాద్ / మింట్ కాంపౌండ్: నెక్లెస్ రోటరీ వైపు వెళ్లే ట్రాఫిక్‌ను అనుమతించరు. ప్రింటింగ్ ప్రెస్ జంక్షన్ వద్ద రాజీవ్ గాంధీ విగ్రహం వైపు మళ్లిస్తారు.

లిబర్టీ & అప్పర్ ట్యాంక్ బండ్: సెక్రటేరియట్ జంక్షన్ వైపు వచ్చే వాహనాలను పాత అంబేడ్కర్ విగ్రహం వద్ద లిబర్టీ వైపు మళ్లిస్తారు.

రాణిగంజ్ / మినిస్టర్ రోడ్: పి.వి. మార్గ్ (నెక్లెస్ రోడ్డు) వైపు వచ్చే వాహనాలను సోనాబీ అబ్దుల్లా మసీదు మరియు నల్లగుట్ట ఎక్స్ రోడ్స్ వద్ద మినిస్టర్ రోడ్డు / రాణిగంజ్ వైపు మళ్లిస్తారు.

రద్దీ ఉండే ప్రాంతాలు – ప్రత్యామ్నాయ మార్గాలు ఉత్తమం:

వి.వి. విగ్రహం, సైఫాబాద్, రవీంద్ర భారతి, హెచ్‌టీపీ జంక్షన్, బషీర్‌బాగ్, లిబర్టీ, అంబేడ్కర్ విగ్రహం, అప్పర్ ట్యాంక్ బండ్, నల్లగుట్ట ఎక్స్ రోడ్స్ పరిసరాల్లో తీవ్ర రద్దీ ఉండే అవకాశం ఉంది. సాధారణ ప్రయాణికులు ప్రత్యామ్నాయ మార్గాలను ఎంచుకోవాలని కోరారు.

సహాయం కోసం: అత్యవసర సమాచారం లేదా ప్రయాణ సాయం కోసం 9010203626 హెల్ప్‌లైన్ నంబర్‌ను లేదా @HYDTP సోషల్ మీడియా ఖాతాలను సంప్రదించవచ్చని తెలిపారు.