Harish Rao: టీజీ ట్రాన్స్‌కో ప్రైవేటీకరణ ప్రయత్నాలను అడ్డుకోండి: రాహుల్ గాంధీకి హరీశ్ రావు లేఖ!

Harish Rao: తెలంగాణలోని కీలక విద్యుత్ రంగానికి చెందిన సంస్థల్లో వాటాల విక్రయం, ప్రైవేటీకరణ ప్రయత్నాలను తక్షణమే అడ్డుకోవాలని కోరుతూ బీఆర్ఎస్ సీనియర్ నేత, మాజీ మంత్రి హరీశ్ రావు కాంగ్రెస్ అగ్రనేత రాహుల్ గాంధీకి లేఖ రాశారు. టీజీ ట్రాన్స్‌కోలో 26 శాతం వాటాలను ఐపీఓ (IPO) ద్వారా విక్రయించి నిధులు సమీకరించాలన్న రాష్ట్ర ప్రభుత్వ ప్రతిపాదనపై ఆయన తీవ్ర అభ్యంతరం వ్యక్తం చేశారు.

ప్రజాధనంతో నిర్మితమైన టీజీ ట్రాన్స్‌‌కో రాష్ట్ర విద్యుత్ సరఫరా వ్యవస్థకు వెన్నెముక వంటిదని హరీశ్ రావు తన లేఖలో గుర్తుచేశారు. వేలాది కిలోమీటర్ల మేర విస్తరించిన విద్యుత్ లైన్లు, హై-వోల్టేజ్ సబ్‌స్టేషన్లతో కూడిన ఈ సంస్థ అత్యంత విలువైన ప్రభుత్వ ఆస్తి అని పేర్కొన్నారు. ఈ కీలక వ్యవహారంలో కాంగ్రెస్ జాతీయ నాయకత్వం వెంటనే జోక్యం చేసుకోవాలని విజ్ఞప్తి చేశారు.

ట్రాన్స్‌కోలో ప్రైవేట్ వాటాలకు అనుమతినిస్తే, భవిష్యత్తులో టీజీ జెన్‌కో, సింగరేణి, డిస్కమ్‌ల ప్రైవేటీకరణకు కూడా మార్గం సుగమం అవుతుందని ఆందోళన వ్యక్తం చేశారు. రాష్ట్ర ప్రభుత్వ ఈ నిర్ణయం కాంగ్రెస్ పార్టీ 2019 ఎన్నికల మేనిఫెస్టోతో పాటు 2023 రాయ్‌పూర్ తీర్మానాలకు పూర్తిగా విరుద్ధమని ప్రశ్నించారు.

కేంద్ర ప్రభుత్వం ఎల్ఐసీ (LIC) వాటాలను విక్రయిస్తుంటే తీవ్రంగా వ్యతిరేకించిన కాంగ్రెస్, తెలంగాణలో అధికారంలోకి రాగానే అందుకు భిన్నంగా వ్యవహరించడం ద్వంద్వ ప్రమాణాలకు నిదర్శనమని నిలదీశారు.

విద్యుత్ సంస్థల ప్రైవేటీకరణ, వాటాల విక్రయం లేదా పబ్లిక్ ఇష్యూ అంశాలపై ప్రతిపక్షాల నుంచి పెద్ద ఎత్తున విమర్శలు వ్యక్తమవుతున్న నేపథ్యంలో టీజీ ట్రాన్స్‌కో వర్గాలు స్పందించాయి. ట్రాన్స్‌కోలో వాటాల ఉపసంహరణ లేదా ఐపీఓకు వెళ్లే అంశంపై ఇప్పటి వరకు ఎలాంటి తుది నిర్ణయం తీసుకోలేదని ఆ సంస్థ ఉన్నతాధికార వర్గాలు స్పష్టం చేశాయి.