Hyderabad: హైదరాబాద్ రోడ్లపై ఎలక్ట్రిక్ క్యాబ్స్.. GreenSM రాకతో లాభనష్టాలేంటి.?

హైదరాబాద్‌: హైదరాబాద్‌లో GreenSM క్యాబ్స్ రాకపై భిన్న స్పందన వస్తోంది. తక్కువ ఛార్జీలకే సర్వీసు అందుబాటులోకి రావడంతో ప్యాసింజర్లకు ఖర్చుల భారం తగ్గుతుందని కొందరు అంటున్నారు. ఉబర్, ర్యాపిడో వంటి సర్వీసులు డిమాండ్ సమయంలో భారీగా విధించే ఛార్జీలకు బ్రేక్ పడుతుందని చెబుతున్నారు. అయితే దీనివల్ల ఇతర క్యాబ్, ఆటో డ్రైవర్ల ఉపాధి దెబ్బతినే అవకాశముందని మరికొందరు అంటున్నారు. వియత్నాంకు చెందిన విన్‌ఫాస్ట్ గ్రూప్ సంస్థ GreenSM హైదరాబాద్‌లో ఎలక్ట్రిక్ టాక్సీ సేవలను ప్రారంభించింది.

ఈ సంస్థ ఇప్పటికే జూన్‌లో ఢిల్లీ-ఎన్‌సీఆర్‌లో ప్రారంభమైంది. హైదరాబాద్‌లో కి.మీ.కు రూ. 8 నుంచి రూ. 10 వసూలు చేస్తోందని రిపోర్టులు చెబుతున్నాయి. వర్షాలు, రద్దీ వేళల్లో కూడా సర్జ్ ప్రైసింగ్ ఉండదని కంపెనీ చెబుతోంది. సొంత వాహనాలు, జీతం తీసుకునే డ్రైవర్లు ఈ సేవల ప్రత్యేకత. ఏడు సీట్ల విన్‌ఫాస్ట్ ఎలక్ట్రిక్ కార్లు వాడుతోంది. హైదరాబాద్‌లో ఇప్పటికే సుమారు 1,000 కార్లు తిరుగుతున్నాయని, డ్రైవర్లు దొరికితే మరో 2,000 సిద్ధంగా ఉన్నాయని రిపోర్టులు పేర్కొంటున్నాయి.

హైదరాబాద్‌లో ఓలా, ఉబర్ సాధారణంగా కి.మీ.కు రూ. 15 నుంచి రూ. 20 వసూలు చేస్తాయి. ఇది ట్రాఫిక్, డిమాండ్, వాహన రకాన్ని బట్టి మారుతుంది. ప్రయాణికులు వర్షాలు, రద్దీ సమయాల్లో భారీ సర్జ్ ఛార్జీలతో ఇబ్బంది పడుతున్నారు. అయితే కొందరు యూజర్లు చెప్పిన వివరాలు భిన్నంగా ఉన్నాయి. ఒక యూజర్ 6 కి.మీ. దూరానికి ప్రోమో డిస్కౌంట్ తర్వాత కూడా రూ. 160 చూపించిందని చెప్పగా, మరొకరు 50 శాతం డిస్కౌంట్‌తో GreenSM రూ. 117, ఉబర్ రూ. 136 చూపించాయని పేర్కొన్నారు. అంటే కనీస ఛార్జీలు, ప్రయాణ దూరం, సమయాన్ని బట్టి ధరలు మారుతున్నాయి.

ఇతర క్యాబ్ డ్రైవర్లలో ఆందోళన మొదలైంది. తక్కువ ధరల వల్ల ప్రయాణికులు GreenSM వైపు మళ్లవచ్చని, తమ ఆదాయం తగ్గుతుందని ఓలా, ఉబర్, ర్యాపిడో డ్రైవర్లు భయపడుతున్నారు. సొంత వాహనాలు కొని ఈఎంఐలు కడుతున్న డ్రైవర్ల పరిస్థితి ఇప్పటికే కష్టంగా ఉందని కొందరు అంటున్నారు. ఈ సంస్థ ప్లాట్‌ఫామ్‌లో డ్రైవర్లకు నెలకు రూ. 40 వేల నుంచి రూ. 60 వేల వరకు జీతం ఇస్తుందని రిపోర్టులు చెబుతున్నాయి. అయితే లిఖితపూర్వక ఒప్పందాలు లేవని, ఆరోగ్య బీమా, ఉద్యోగ భద్రత గురించి స్పష్టత లేదని తెలంగాణ గిగ్ వర్కర్స్ అసోసియేషన్ ప్రశ్నించింది.

ఈ అంశం రాజకీయ వివాదంగా మారింది. బీఆర్ఎస్ ప్రధాన కార్యదర్శి ఆర్ఎస్ ప్రవీణ్ కుమార్ గురువారం తెలంగాణ భవన్‌లో జరిగిన ప్రెస్ మీట్‌లో GreenSM క్యాబ్స్‌ను నిషేధించాలని డిమాండ్ చేశారు. రాష్ట్రంలో సుమారు 6 లక్షల మంది క్యాబ్ డ్రైవర్లు ఈ సంస్థ రాకతో ప్రభావితమవుతారని చెప్పారు. ఈ సంస్థకు ఎవరు అనుమతి ఇచ్చారని ప్రశ్నించారు. ఆ సంస్థ భాగస్వామ్య విధానం ముసుగులో పనిచేస్తోందని, జీఎస్టీ చెల్లించడం లేదని ఆరోపించారు. క్యాబ్ ఛార్జీలపై నియంత్రణ కావాలని కూడా కోరారు. ఈ ఆరోపణలపై ప్రభుత్వం లేదా GreenSM నుంచి అధికారిక స్పందనపై వేచి చూడాల్సి ఉంది.