Saddula Bathukamma: ట్యాంక్‌బండ్‌పై వైభవంగా సద్దుల బతుకమ్మ వేడుకలు.. ముఖ్య అతిథులుగా విరోష్ జంట

Saddula Bathukamma: తెలంగాణ ఆడపడుచుల అత్యంత ప్రతిష్టాత్మక పూల పండుగ బతుకమ్మ వేడుకలు చివరి అంకాన్ని చేరుకున్నాయి. తొమ్మిది రోజుల పాటు అత్యంత భక్తిశ్రద్ధలతో జరుపుకున్న ఈ పూల పండుగ ముగింపు ఘట్టమైన సద్దుల బతుకమ్మ వేడుకలను హైదరాబాద్‌లోని చారిత్రాత్మక ట్యాంక్‌బండ్ ప్రాంగణంలో అత్యంత వైభవంగా నిర్వహించేందుకు ప్రభుత్వం అన్ని ఏర్పాట్లు పూర్తి చేసింది. తెలంగాణ సంస్కృతి, సంప్రదాయాలకు నవతరం గ్లామర్‌ను జోడిస్తూ రాష్ట్ర సాంస్కృతిక శాఖ ఈసారి సంబరాలను కన్నులపండువగా తీర్చిదిద్దింది. నగరంలోని నలుమూలల నుంచి వేలాదిగా తరలివచ్చే మహిళలతో ట్యాంక్‌బండ్ ప్రాంగణం పూర్తిగా కళకళలాడనుంది.

ప్రత్యేక ఆకర్షణగా టాలీవుడ్ క్రేజీ కపుల్

ఈ ఏడాది సద్దుల బతుకమ్మ వేడుకలలో టాలీవుడ్ ప్రముఖ నటులు విజయ్ దేవరకొండ, రష్మిక మందన్న ప్రధాన ఆకర్షణగా నిలవనున్నారు. టాలీవుడ్‌లో ప్రత్యేక క్రేజ్ ఉన్న ఈ హిట్ జోడీ ఈ సాంప్రదాయ వేడుకలో ప్రత్యక్షంగా పాల్గొని సందడి చేయనుంది. సాయంత్రం 5 గంటల నుంచి రాత్రి 10 గంటల వరకు జరిగే ఈ వేడుకల్లో వారు భాగస్వాములు కానుండటంతో అభిమానులలో భారీ ఉత్సాహం నెలకొంది. ప్రముఖ సినీ తారల రాకతో ఈ వేడుకల శోభ మరింత పెరగనుందని నిర్వాహకులు తెలిపారు.

జానపద కళాకారుల విన్యాసాలు

తెలంగాణ సాంస్కృతిక వైభవాన్ని నలుదిశలా చాటిచెప్పేలా వివిధ కళారూపాలను ప్రదర్శించనున్నారు. రాష్ట్రంలోని పలు ప్రాంతాల నుంచి వచ్చిన సుమారు 700 మంది జానపద కళాకారులు తమ అద్భుతమైన ప్రదర్శనలతో ప్రాంగణాన్ని హోరెత్తించనున్నారు. హుస్సేన్‌సాగర్ జలాల సాక్షిగా రాత్రి వేళ ఆకాశాన్ని రంగులమయం చేసేలా ప్రత్యేక లేజర్ షో, బాణసంచా విన్యాసాలను ఏర్పాటు చేశారు. రంగురంగుల బతుకమ్మల శోభ, జానపద సవ్వడులు నగరవాసులను మంత్రముగ్ధులను చేయనున్నాయి.

పటిష్ట భద్రతా ఏర్పాట్లు అలాగే ట్రాఫిక్ మళ్లింపులు

వివిధ ప్రాంతాల నుంచి భారీ సంఖ్యలో తరలివచ్చే ప్రజలకు ఎలాంటి అసౌకర్యం కలగకుండా అధికారులు అప్రమత్తమయ్యారు. రద్దీని నియంత్రించడానికి ప్రత్యేక ట్రాఫిక్ మళ్లింపు చర్యలు చేపట్టడంతో పాటు ప్రాంగణం చుట్టూ పటిష్టమైన భద్రతను ఏర్పాటు చేశారు. నిరంతర నిఘా నీడలో వేడుకలు ప్రశాంతంగా ముగిసేలా పోలీసు యంత్రాంగం అన్ని ముందస్తు చర్యలు తీసుకుంది.