Revanth Reddy: సీఎం హోదాలో తొలిసారి సిరిసిల్లకు రేవంత్‌రెడ్డి.. రూ.345.78 కోట్ల అభివృద్ధి పనులకు శ్రీకారం!

Revanth Reddy: ముఖ్యమంత్రి రేవంత్ రెడ్డి రేపు తొలిసారిగా సీఎం హోదాలో సిరిసిల్ల జిల్లాలో పర్యటించనున్నారు. ఈ పర్యటనలో భాగంగా రగుడు బైపాస్ సమీపంలో నిర్వహించనున్న భారీ బహిరంగ సభలో ఆయన పాల్గొననున్నారు. జిల్లా వ్యాప్తంగా మొత్తం రూ.345.78 కోట్ల విలువైన అభివృద్ధి పనులకు శంకుస్థాపనలు మరియు ప్రారంభోత్సవాలు చేయనున్నారు.

చేనేత కార్మికుల సంక్షేమానికి ప్రత్యేక ప్రాధాన్యం ఇస్తూ సిరిసిల్లలో 'నేతన్న బజార్' ఏర్పాటుకు శ్రీకారం చుట్టనున్నారు. చేనేత, పవర్‌లూమ్ ఉత్పత్తులకు మెరుగైన మార్కెటింగ్ సదుపాయాలు కల్పించనున్నారు.

సిరిసిల్ల-వేములవాడలో రూ.200 కోట్లతో 'యంగ్ ఇండియా ఇంటిగ్రేటెడ్ రెసిడెన్షియల్ స్కూళ్లు' నిర్మించనున్నారు. పెద్దూరులో 18 ఎకరాల విస్తీర్ణంలో రూపుదిద్దుకోనున్న ఈ విద్యా సముదాయంలో 2,600 మంది విద్యార్థులకు వసతి లభిస్తుంది. అలాగే సిరిసిల్ల, కోనరావుపేటలో తెలంగాణ పబ్లిక్ పాఠశాలలను ఏర్పాటు చేయనున్నారు.

వేములవాడ శ్రీ రాజరాజేశ్వర స్వామి ఆలయ అభివృద్ధికి రూ.99.40 కోట్లు కేటాయించగా, ఆలయ పరిధిలో 26 అభివృద్ధి పనులకు సీఎం శంకుస్థాపన చేయనున్నారు.

జిల్లాలో 7 కొత్త ప్రభుత్వ కార్యాలయ భవనాలకు శంకుస్థాపన, రుద్రంగిలో 10 వేల మెట్రిక్ టన్నుల సామర్థ్యంతో గోదాముల నిర్మాణం, పెద్దూరులో 'ఇందిరా మహిళా శక్తి భవన్' ప్రారంభం, అలాగే వేములవాడలో ఒక మహిళా పోలీస్ స్టేషన్ మరియు రెండు ట్రాఫిక్ పోలీస్ స్టేషన్ల ఏర్పాటుకు సీఎం శ్రీకారం చుట్టనున్నారు.