Revanth Reddy: ఆ భూములు వేలం వేసి దళితులకు ఖర్చు చేస్తాం.. కబ్జాదారులకు సీఎం రేవంత్ రెడ్డి స్ట్రాంగ్ వార్నింగ్!

Revanth Reddy: హైదరాబాద్‌లోని అత్యంత విలువైన మియాపూర్ భూముల వ్యవహారంలో తెలంగాణ ప్రభుత్వానికి సుప్రీంకోర్టులో భారీ విజయం లభించిన నేపథ్యంలో ముఖ్యమంత్రి రేవంత్ రెడ్డి తీవ్రస్థాయిలో స్పందించారు. హైదరాబాద్‌లో నిర్వహించిన ప్రత్యేక మీడియా సమావేశంలో ఆయన మాట్లాడుతూ, గత బిఆర్ఎస్ ప్రభుత్వం మరియు మాజీ సీఎం కేసీఆర్ కుటుంబంపై సంచలన ఆరోపణలు చేశారు.

మియాపూర్‌లోని దాదాపు 550 ఎకరాల అత్యంత ఖరీదైన భూములను కొల్లగొట్టేందుకు కేసీఆర్, ఆయన బంధువులు అనేక రకాలుగా ప్రయత్నించారని సీఎం రేవంత్ రెడ్డి ఆరోపించారు. ఈ భూములను కాపాడాల్సిన గత కేసీఆర్ ప్రభుత్వం ఏమాత్రం పట్టించుకోలేదని, ఆ క్రమంలోనే గోల్డ్‌స్టోన్ ప్రసాదరావు వంటి వ్యక్తులు ఈ ఆస్తులను కాజేసేందుకు యత్నించారని ఆయన వివరించారు.

ఈ భూముల దందా వ్యవహారంలోనే దామోదరరావుకు ఖరీదైన లగ్జరీ కారు బహుమతిగా వచ్చిందని, అధికారులను అడ్డం పెట్టుకుని వేల కోట్ల విలువైన ప్రభుత్వ భూములను కాజేయాలని చూశారని సీఎం విమర్శించారు. కాంగ్రెస్ ప్రభుత్వం అధికారంలోకి వచ్చిన తర్వాత సుప్రీంకోర్టులో అత్యంత బలమైన వాదనలను వినిపించిందని, ఫలితంగా సుప్రీంకోర్టు రాష్ట్ర ప్రభుత్వానికి అనుకూలంగా చారిత్రాత్మక తీర్పునిచ్చిందని వెల్లడించారు. ఈ తీర్పు ద్వారా తెలంగాణ ప్రజలకు చెందిన దాదాపు రూ. 50 వేల కోట్ల విలువైన ప్రభుత్వ ఆస్తిని కాపాడుకోగలిగామని ఆయన స్పష్టం చేశారు.

సుప్రీంకోర్టు తీర్పు వెలువడిన వెంటనే ఆ భూములను స్వాధీనం చేసుకుని, అక్రమణలకు గురికాకుండా కట్టుదిట్టమైన చర్యలు తీసుకోవాలని అధికారులను ఆదేశించినట్లు సీఎం తెలిపారు. భవిష్యత్తులో ఈ 550 ఎకరాల భూములను అవసరమైతే వేలం వేసి, దాని ద్వారా వచ్చే ఆదాయాన్ని రాష్ట్రంలోని దళిత, బహుజనుల సంక్షేమం మరియు అభివృద్ధి కోసం వెచ్చిస్తామని రేవంత్ రెడ్డి ప్రకటించారు. ప్రభుత్వ భూములను కబ్జా చేయాలని చూస్తే ఎంతటి వారినైనా ఉపేక్షించేది లేదని, భూబకాసూర్లపై ప్రభుత్వం అత్యంత కఠినంగా వ్యవహరిస్తుందని ఆయన ఈ సందర్భంగా హెచ్చరించారు.