6Gలో భారత్‌కు కీలక స్థానం.. త్వరలోనే లాంఛ్‌కు సిద్ధమైన జియో..!

6G Technology: రిలయన్స్ జియో 6G సేవల కోసం తన సన్నద్ధతను వెల్లడించింది. న్యూఢిల్లీలో జరిగిన ఇండియా మొబైల్ కాంగ్రెస్ 2026లో సంస్థ ప్రీ 6G సాంకేతిక వ్యవస్థను ప్రదర్శించింది. 6G సేవలకు అవసరమైన మరో కీలక పరికరాన్ని కూడా ప్రదర్శనలో అందుబాటులో ఉంచింది. ప్రపంచవ్యాప్తంగా 6G ప్రమాణాలు 2030లో ఖరారైన తర్వాత వాణిజ్య సేవలను ప్రారంభించే తొలి దేశాల జాబితాలో భారత్ ఉండొచ్చని జియో తెలిపింది.

ప్రస్తుతం అందుబాటులో ఉన్న 5G సేవలతో పోలిస్తే 6G ద్వారా ఐదు రెట్లు అధిక సామర్థ్యం లభించే అవకాశం ఉందని సంస్థ పేర్కొంది. సమాచార ప్రసారంలో ఆలస్యం కూడా దాదాపు పది రెట్లు తగ్గవచ్చని తెలిపింది. దీనివల్ల ఏఐ ఆధారిత సేవలు, ప్రత్యక్ష ప్రసారాలు, వైద్యం, విద్య వంటి రంగాల్లో మరింత వేగవంతమైన సేవలకు అవకాశం ఏర్పడుతుందని జియో వివరించింది.

ప్రదర్శనలో భారత్‌లోనే తొలి గిగా మిమో రేడియోగా పేర్కొన్న పరికరాన్ని కూడా జియో చూపించింది. 5Gతో పాటు 6G సేవలకు ఉపయోగపడే సాధారణ ఆధార వ్యవస్థను సంస్థ పరిచయం చేసింది.

6G అభివృద్ధిలో కీలక పాత్ర పోషించేందుకు 8,000కు పైగా పేటెంట్లను దాఖలు చేసినట్లు జియో తెలిపింది. వాటిలో వందల సంఖ్యలో 6Gకి సంబంధించినవని పేర్కొంది. ప్రపంచ ప్రమాణాల రూపకల్పనలో 934కు పైగా సహకారాలు అందించినట్లు వెల్లడించింది.

వ్యవసాయం, వైద్యం, విద్య రంగాల్లో కృత్రిమ మేధస్సు ఆధారిత సేవలను మరింత వేగంగా అందించేందుకు 6G ఉపయోగపడవచ్చని జియో భావిస్తోంది. ఇదే కార్యక్రమంలో ఉపగ్రహ అనుసంధాన వ్యవస్థకు సంబంధించిన ప్రణాళికను కూడా సంస్థ వెల్లడించింది. ఇందులో సుమారు 1,600 భూకక్ష్య ఉపగ్రహాలు, దేశవ్యాప్తంగా 23 భూ కేంద్రాలు ఉండే ప్రతిపాదన ఉంది.