EPFO: పీఎఫ్ ఖాతాదారులకు ఊరట.. ఈ ఒక్క యాప్‌తో అన్ని పనులు క్షణాల్లో జరిగిపోతాయి

EPFO: ప్రతినెలా ఉద్యోగుల జీతం నుంచి ప్రావిడెంట్ ఫండ్ జమ అవుతుంటుంది. అయితే పీఎఫ్ బ్యాలెన్స్ చెక్ చేయడం, పాస్‌డవున్‌‌లో లేదంటే అడ్వాన్స్ లోన్ కోసం గతంలో ప్రభుత్వ కార్యాలయాల చుట్టూ తిరగాల్సిన పరిస్థితి ఉండేది. కానీ ఇప్పుడు ఆ అవసరం లేకుండా కేంద్ర ప్రభుత్వం UMANG అనే ప్రత్యేక యాప్‌ను అందుబాటులోకి తెచ్చింది. ఈ ఒక్క మొబైల్ అప్లికేషన్ ద్వారా పీఎఫ్ సంబంధిత అనేక సేవలను ఉద్యోగులు తమ ఇంటి వద్ద నుంచే సులభంగా పొందవచ్చు.

పీఎఫ్ పాస్‌బుక్, బ్యాలెన్స్ చెక్ చేయడం

ఉద్యోగులు తమ పీఎఫ్ ఖాతాలో ఎంత నిల్వ ఉందో తెలుసుకోవడానికి ఎక్కడికీ వెళ్లాల్సిన పని లేదు. స్మార్ట్‌ఫోన్‌లో ఉమాంగ్ యాప్‌ను ఇన్‌స్టాల్ చేసుకుని, యూఏఆర్ నంబర్ ద్వారా లాగిన్ అవ్వాలి. దీని ద్వారా మీ ఖాతాలో ఉన్న బ్యాలెన్స్‌ను క్షణాల్లో చెక్ చేసుకోవచ్చు. అంతేకాకుండా మీ పీఎఫ్ పాస్‌బుక్‌ను పీడీఎఫ్ ఫార్మాట్‌లో ఎప్పుడైనా డౌన్‌లోడ్ చేసుకునే సదుపాయం కూడా ఈ యాప్‌లో అందుబాటులో ఉంటుంది.

అత్యవసర సమయాల్లో పీఎఫ్ అడ్వాన్స్ క్లెయిమ్

జీవితంలో ఎవరికైనా అనుకోని ఖర్చులు లేదా అత్యవసర పరిస్థితులు ఎదురైనప్పుడు పీఎఫ్ డబ్బులు చాలా అవసరమవుతాయి. అటువంటి తరుణంలో ఉద్యోగులు ఎవరినీ సంప్రదించకుండా నేరుగా ఈ యాప్ ద్వారానే పీఎఫ్ అడ్వాన్స్ కోసం దరఖాస్తు చేసుకోవచ్చు. వైద్య అవసరాలు, వివాహాలు లేదా ఇళ్ల నిర్మాణం వంటి వివిధ కారణాల నిమిత్తం అడ్వాన్స్ అమౌంట్‌ను సులభంగా విత్‌డ్రా చేసుకునే వెసులుబాటును ఈ ప్లాట్‌ఫారమ్ కల్పిస్తుంది.

క్లెయిమ్ స్టేటస్ ట్రాక్ చేసే సదుపాయం

అడ్వాన్స్ లేదా ఫైనల్ సెటిల్‌మెంట్ కోసం దరఖాస్తు చేసిన తర్వాత, ఆ రిక్వెస్ట్ ఏ దశలో ఉందో తెలుసుకోవడం చాలా ముఖ్యం. ఉమంగ్ యాప్‌లో ట్రాక్ క్లెయిమ్ అనే ప్రత్యేక ఆప్షన్ ఉంటుంది. దీని సహాయంతో మీ దరఖాస్తు ఎక్కడ పెండింగ్‌లో ఉంది, అప్రూవ్ అయిందా లేదా అనే పూర్తి వివరాలను ఎప్పటికప్పుడు సులభంగా ట్రాక్ చేయవచ్చు.

పీఎఫ్ సంబంధిత ఫిర్యాదుల నమోదు

కొన్నిసార్లు పీఎఫ్ ఖాతాకు సంబంధించిన వివరాలు తప్పుగా ఉండటం, ఎంప్లాయర్ వివరాలు అప్‌డేట్ కాకపోవడం లేదా క్లెయిమ్ రిజెక్ట్ కావడం వంటి సమస్యలు ఎదురవుతుంటాయి. ఈ రకమైన ఇబ్బందులు ఏవైనా ఉంటే ఉద్యోగులు నేరుగా ఈ యాప్ ద్వారానే గ్రీవెన్స్ నమోదు చేయవచ్చు. అధికారులు వెంటనే స్పందించి ఆ సమస్యను పరిష్కరించేందుకు ఈ వేదిక ఎంతో ఉపయోగపడుతుంది.

సమయం ఆదా చేసే డిజిటల్ విధానం

ప్రభుత్వ సేవలను సామాన్యులకు మరింత చేరువ చేసే ఉద్దేశంతో డిజిటల్ ఇండియాలో భాగంగా ఈ యాప్‌ను రూపొందించారు. కేవలం పీఎఫ్ మాత్రమే కాకుండా ఇతర ప్రభుత్వ సేవలన్నీ ఒకే చోట లభిస్తాయి. ఉద్యోగులు ఆఫీసుల చుట్టూ తిరుగుతూ సమయాన్ని వృథా చేసుకోకుండా, స్మార్ట్‌ఫోన్ ద్వారానే డిజిటల్ సేవలను ఉపయోగించుకోవడం చాలా సౌకర్యంగా ఉంటుంది.