Apple Pay India : ఇండియాలోకి యాపిల్ పే.. అక్టోబర్‌లోనే లాంచ్.!

Apple Pay India : యాపిల్ కంపెనీ తన డిజిటల్ పేమెంట్ సర్వీస్ 'యాపిల్ పే' (Apple Pay) ని 2014 సెప్టెంబర్‌లో అమెరికాలో ప్రవేశపెట్టింది. గత 12 ఏళ్ల కాలంలో ప్రపంచంలోని అనేక దేశాలకు ఈ సేవలను విస్తరించినప్పటికీ, డిజిటల్ లావాదేవీల్లో విపరీతమైన వృద్ధిని సాధిస్తున్న భారత మార్కెట్‌లోకి మాత్రం యాపిల్ పే ఇప్పటివరకు అందుబాటులోకి రాలేదు. అయితే, ఈ నిరీక్షణకు త్వరలోనే తెరపడనున్నట్లు తెలుస్తోంది. ప్రముఖ గ్లోబల్ టెక్ దిగ్గజం యాపిల్, భారతీయ ప్రముఖ బ్యాంకింగ్ భాగస్వామ్యంతో వచ్చే నెలలోనే యాపిల్ పే సర్వీసులను భారతదేశంలో అధికారికంగా ప్రారంభించడానికి ప్రణాళికలు రచిస్తోందని సమాచారం.

యాక్సిస్ బ్యాంక్ క్రెడిట్ కార్డ్‌లతో 'ట్యాప్ అండ్ పే' సదుపాయం

రాయిటర్స్ (Reuters) నివేదిక ప్రకారం, ఈ విషయం తెలిసిన విశ్వసనీయ వర్గాలను ఉటంకిస్తూ యాపిల్ పే వచ్చే అక్టోబర్‌లో భారతదేశంలో లాంచ్ కానుందని వెల్లడించింది. దేశంలోనే అతిపెద్ద క్రెడిట్ కార్డ్ ప్రొవైడర్లలో ఒకటైన యాక్సిస్ బ్యాంక్ (Axis Bank) తో కలిసి యాపిల్ ఈ 'ట్యాప్ అండ్ పే' (Tap-and-Pay) ఫంక్షనాలిటీని అందించనుంది. ప్రారంభంలో యాపిల్ పే సర్వీస్ కేవలం యాక్సిస్ బ్యాంక్ క్రెడిట్ కార్డ్ లావాదేవీలకు మాత్రమే మద్దతు ఇస్తుందని ఈ నివేదిక స్పష్టం చేసింది. కొనుగోలుదారులు తమ ఐఫోన్ లేదా యాపిల్ వాచ్ ద్వారా ఎలాంటి ప్రత్యేకా యాప్ తెరవాల్సిన అవసరం లేకుండా నేరుగా పాయింట్-ఆఫ్-సేల్ (PoS) మెషీన్ల వద్ద సులభంగా పేమెంట్లు పూర్తి చేయవచ్చు.

ఇతర ప్రధాన బ్యాంకులతో చర్చలు , విస్తరణ ప్రణాళికలు

ముంబై కేంద్రంగా పనిచేసే యాక్సిస్ బ్యాంక్‌తో పాటు, భారతదేశంలోని మరికొన్ని ప్రధాన ఆర్థిక సంస్థలైన హెచ్‌డిఎఫ్‌సి బ్యాంక్ (HDFC Bank) , ఐసిఐసిఐ బ్యాంక్ (ICICI Bank) లతో కూడా యాపిల్ సంప్రదింపులు జరుపుతోందని సమాచారం. అయితే, యాపిల్ ప్రతిపాదించిన వాణిజ్య నిబంధనలకు ఈ రెండు బ్యాంకులు ఇంకా అంగీకరించలేదని తెలుస్తోంది. ఇతర అంతర్జాతీయ మార్కెట్లలో అనుసరించినట్లే, భారత్‌లో కూడా విడతల వారీగా బ్యాంకులతో నేరుగా ఒప్పందాలు కుదుర్చుకుంటూ భవిష్యత్తులో మరిన్ని బ్యాంకులను ఈ నెట్‌వర్క్‌లోకి తీసుకురావాలని యాపిల్ భావిస్తోంది.

కార్డ్ నెట్‌వర్క్‌లు , లావాదేవీల విధానం

ఇటీవలి నివేదికల ప్రకారం, యాపిల్ పే ఆరంభంలో వీసా (Visa) , మాస్టర్‌కార్డ్ (Mastercard) నెట్‌వర్క్‌లలోని క్రెడిట్ కార్డ్ లావాదేవీలకు మాత్రమే సపోర్ట్ చేయనుంది. కాంటాక్ట్‌లెస్ లావాదేవీల ద్వారా వచ్చే ఆదాయంలో కంపెనీకి దక్కే వాటా (రెవెన్యూ షేరింగ్) పై భారత్‌లోని ప్రముఖ కార్డ్-ఇష్యూయింగ్ బ్యాంకులతో యాపిల్ చర్చలు జరుపుతోంది. ఈ సేవలు అందుబాటులోకి వచ్చాక, వినియోగదారులు తమ అర్హత కలిగిన క్రెడిట్ కార్డ్‌లను 'యాపిల్ వ్యాలెట్' (Apple Wallet) యాప్‌కు యాడ్ చేసుకుని, చాలా వేగంగా కాంటాక్ట్‌లెస్ చెల్లింపులు చేసుకోవచ్చు.

యాపిల్ కంపెనీ ఈ లాంచ్ వివరాలపై ఇంకా అధికారిక ప్రకటన చేయనప్పటికీ, 2026 ద్వితీయార్థంలో (సెప్టెంబర్ లేదా అక్టోబర్ నెలల్లో) యాపిల్ పే భారత్‌లోకి వస్తుందనే మునుపటి ఊహాగానాలకు ఈ కొత్త నివేదిక మరింత బలాన్ని చేకూరుస్తోంది. భారతదేశపు వేగవంతమైన డిజిటల్ పేమెంట్ రంగంలో యాపిల్ పే ఎంట్రీ ఐఫోన్ వినియోగదారులకు మరింత సజావుగా చెల్లింపులు చేసుకునే అవకాశాన్ని కల్పించనుంది.