Anthropic IPO: ఐపీఓ బాటలో ఆంథ్రోపిక్‌.. నాస్‌డాక్‌లో లిస్టింగ్‌కు సిద్ధం

Anthropic IPO: జనరేటివ్‌ ఏఐ రంగంలో వేగంగా ఎదుగుతున్న ప్రముఖ సంస్థ ఆంథ్రోపిక్‌ పబ్లిక్‌ మార్కెట్‌లోకి అడుగుపెట్టేందుకు సిద్ధమైంది. క్లాడ్‌ ఏఐ చాట్‌బాట్‌, ఏఐ ఆధారిత సేవలను అభివృద్ధి చేస్తున్న ఈ సంస్థ అమెరికా స్టాక్‌ మార్కెట్‌లో ఐపీఓకు సన్నాహాలు చేస్తోంది. అమెరికా సెక్యూరిటీస్‌ అండ్‌ ఎక్స్ఛేంజ్‌ కమిషన్‌ (SEC)కు సమర్పించిన పత్రాల్లో నాస్‌డాక్‌ స్టాక్‌ ఎక్స్ఛేంజ్‌లో ‘ANT’ టికర్‌ గుర్తుతో లిస్ట్‌ కావాలని యోచిస్తున్నట్లు వెల్లడించింది. ఐదేళ్ల క్రితం ప్రారంభమైన సంస్థకు ఇది కీలక మైలురాయిగా మారనుంది.

2021లో ప్రారంభమైన సంస్థ

ఆంథ్రోపిక్‌ను 2021లో డారియో అమోడెయ్‌ సహా కొందరు పరిశోధకులు కలిసి స్థాపించారు. వీరు గతంలో ఓపెన్‌ఏఐతో పనిచేసినవారు. ఆ తర్వాత సొంతంగా సంస్థను ఏర్పాటు చేసి, కృత్రిమ మేధస్సు రంగంలో కొత్త మోడళ్ల అభివృద్ధిపై దృష్టి పెట్టారు. ప్రస్తుతం ఓపెన్‌ఏఐతో పాటు గూగుల్‌ వంటి దిగ్గజ సంస్థలకు ఆంథ్రోపిక్‌ గట్టి పోటీ ఇస్తోంది.

ఆ సంస్థ అభివృద్ధి చేసిన క్లాడ్‌ ఏఐ మోడల్‌, ఇతర సేవలకు వ్యాపార సంస్థల నుంచి మంచి ఆదరణ లభిస్తోంది. ఉద్యోగుల పనితీరును మెరుగుపరచడం, కార్యాలయాల్లో కొన్ని పనులను ఆటోమేట్‌ చేయడం, కొత్త వ్యాపార అవకాశాలను గుర్తించడం వంటి అవసరాల కోసం కంపెనీలు ఏఐ సేవలను వినియోగిస్తున్నాయి. దీంతో ఆంథ్రోపిక్‌ సేవలకు డిమాండ్‌ పెరుగుతోంది.

క్లాడ్‌ కోడ్‌తో మరింత వేగం

2026లో ఆంథ్రోపిక్‌ విస్తరణ వేగం పెరగడానికి క్లాడ్‌ కోడ్‌ అనే ఏఐ కోడింగ్‌ టూల్‌ ప్రజాదరణ కూడా ఒక కారణంగా నిలిచింది. సాఫ్ట్‌వేర్‌ అభివృద్ధికి ఉపయోగపడే ఈ సాధనం డెవలపర్లలో ఆసక్తిని పెంచింది. మరోవైపు శక్తివంతమైన ఏఐ మోడళ్ల అభివృద్ధి ద్వారా పోటీ సంస్థలకు దీటుగా నిలవాలని ఆంథ్రోపిక్‌ ప్రయత్నిస్తోంది.

అయితే ఏఐ భద్రత, నియంత్రణలు, జాతీయ భద్రత వంటి అంశాలపై ఆ సంస్థ తీసుకున్న వైఖరికి విమర్శలు కూడా ఎదురయ్యాయి. అమెరికా ప్రభుత్వంతో ఇటీవల కొన్ని కీలక వివాదాలు చోటుచేసుకున్నట్లు నివేదికలు పేర్కొన్నాయి. వేగంగా విస్తరిస్తున్న ఏఐ రంగంలో సాంకేతిక అభివృద్ధితో పాటు నియంత్రణలు, భద్రతకు సంబంధించిన అంశాలు కూడా కంపెనీలకు సవాలుగా మారుతున్నాయి.

స్పేస్‌ఎక్స్‌ ఐపీఓ తర్వాత మరో భారీ ఆఫర్‌?

ఆంథ్రోపిక్‌ ఐపీఓ విజయవంతంగా పూర్తయితే, ఇటీవల స్టాక్‌ మార్కెట్‌లోకి వచ్చిన స్పేస్‌ఎక్స్‌ తర్వాత పెట్టుబడిదారుల దృష్టిని ఆకర్షించే మరో కీలక ఆఫర్‌గా నిలిచే అవకాశం ఉంది. స్పేస్‌ఎక్స్‌ ఐపీఓ ద్వారా 85.7 బిలియన్‌ డాలర్లు సమీకరించినట్లు ఈ నివేదిక పేర్కొంది. అయితే భారీ ఐపీఓలు వచ్చినప్పటికీ, లిస్టింగ్‌ తర్వాత షేర్ల ధరల్లో ఒడిదుడుకులు ఉండవచ్చని మార్కెట్‌ పరిణామాలు సూచిస్తున్నాయి.

ఏఐ పెట్టుబడులపై పెరుగుతున్న ఆందోళనలు

ఆంథ్రోపిక్‌ పబ్లిక్‌ మార్కెట్‌లోకి రావడానికి సిద్ధమవుతున్న సమయంలోనే వాల్‌స్ట్రీట్‌లో ఏఐ రంగంపై పెట్టుబడిదారుల ఆందోళనలు పెరుగుతున్నాయి. ఏఐ సేవల కోసం కంపెనీలు భారీగా ఖర్చు చేస్తున్నప్పటికీ, భవిష్యత్తులో ఆ పెట్టుబడులకు తగిన ఆదాయం వస్తుందా? అనే ప్రశ్నలు తలెత్తుతున్నాయి. డేటా సెంటర్ల నిర్మాణం, కంప్యూటింగ్‌ సామర్థ్యం, ఇతర మౌలిక సదుపాయాల కోసం ట్రిలియన్ల డాలర్లు ఖర్చవుతాయనే అంచనాలు మార్కెట్‌లో చర్చనీయాంశంగా మారాయి.

కోర్‌వీవ్‌, నెబియస్‌ వంటి ఏఐ మౌలిక సదుపాయాల సంస్థల షేర్లు అక్టోబర్‌లో గణనీయంగా పడిపోయినట్లు నివేదిక పేర్కొంది. డేటా సెంటర్ల రంగంలో రుణ సంబంధిత ప్రమాదాలపై ఆందోళనలు పెరగడం కూడా ఈ పరిస్థితికి కారణంగా కనిపిస్తోంది.

పెట్టుబడిదారుల దృష్టి ఆంథ్రోపిక్‌పై

ఐపీఓ ద్వారా ఆంథ్రోపిక్‌ ఎంత మొత్తాన్ని సమీకరించనుంది, సంస్థ విలువను ఎంతగా అంచనా వేస్తారు, పెట్టుబడిదారుల నుంచి ఎలాంటి స్పందన వస్తుంది అనే అంశాలు కీలకంగా మారనున్నాయి. ఏఐ రంగంలో వేగంగా పెరుగుతున్న సంస్థగా ఆంథ్రోపిక్‌కు మంచి గుర్తింపు ఉన్నప్పటికీ, భారీ పెట్టుబడులు, పెరుగుతున్న పోటీ, నియంత్రణపరమైన సవాళ్లు దాని భవిష్యత్తును ప్రభావితం చేయవచ్చు.