IPL 2027: ముంబై ఇండియన్స్‌లో రాబిన్ ఊతప్ప బిగ్ ఎంట్రీ: కొత్త బ్యాటింగ్ కోచ్‌గా భారత మాజీ స్టార్ ఆటగాడు!

IPL 2027: వచ్చే ఐపీఎల్ సీజన్‌కు ముందు ఐదుసార్లు ఛాంపియన్ ముంబై ఇండియన్స్ తమ కోచింగ్ సిబ్బందిలో ఊహించని భారీ మార్పులకు శ్రీకారం చుట్టింది. గత సీజన్‌లో అనుభవించిన ఘోర పరాభవం నుంచి పాఠాలు నేర్చుకున్న యాజమాన్యం, రాబోయే సీజన్‌లో మళ్లీ టైటిల్ విజేతగా నిలవడమే లక్ష్యంగా జట్టు మేనేజ్‌మెంట్‌ను పూర్తిగా ప్రక్షాళన చేసింది. అందులో భాగంగా భారత మాజీ స్టార్ బ్యాటర్, ఐపీఎల్ ఆరెంజ్ క్యాప్ విజేత రాబిన్ ఊతప్పను తమ కొత్త బ్యాటింగ్ కోచ్‌గా నియమించినట్లు ఫ్రాంచైజీ అధికారికంగా ప్రకటించింది. గత సీజన్ వరకు బ్యాటింగ్ కోచ్‌గా ఉన్న కీరన్ పొలార్డ్‌ను ఇటీవల మహేళ జయవర్ధనే స్థానంలో హెడ్ కోచ్‌గా ప్రమోట్ చేయడంతో, ఖాళీ అయిన ఆ స్థానంలోకి ఊతప్పను తీసుకువచ్చారు.

గత ఐపీఎల్ సీజన్‌లో 14 మ్యాచ్‌లలో కేవలం 4 విజయాలు సాధించి పాయింట్ల పట్టికలో 9వ స్థానంతో తీవ్రంగా నిరాశపరిచిన ముంబై, ఈసారి అనుభవజ్ఞులైన మాజీ ఆటగాళ్లకు బాధ్యతలు అప్పగిస్తోంది. 2008 తొలి ఐపీఎల్ సీజన్‌లో ముంబై ఇండియన్స్ తరఫున ఆడిన రాబిన్ ఊతప్పకు టీమ్‌తో ప్రత్యేక అనుబంధం ఉంది. 2007 టీ20 ప్రపంచకప్ గెలిచిన భారత జట్టులో సభ్యుడైన ఆయన, 2014 ఐపీఎల్ సీజన్‌లో కేకేఆర్ తరఫున 660 పరుగులు చేసి ఆరెంజ్ క్యాప్‌ను కైవసం చేసుకున్నారు. ఊతప్ప నియామకంపై ముంబై ఇండియన్స్ స్పందిస్తూ, ఆటపై అద్భుతమైన అవగాహనతో పాటు యువ ఆటగాళ్లకు దిశానిర్దేశం చేసే స్పష్టత ఉన్న రాబిన్‌ను తిరిగి తమ కుటుంబంలోకి స్వాగతిస్తున్నట్లు సోషల్ మీడియాలో పేర్కొంది.

ఈ భారీ మార్పులలో భాగంగా బౌలింగ్, ఫీల్డింగ్ విభాగాలకు కూడా సరికొత్త కోచ్‌లను నియమించారు. 2015 నుండి 2020 మధ్య కాలంలో ముంబై తరఫున ఆడి నాలుగు సార్లు ఐపీఎల్ టైటిల్స్ సాధించడంలో కీలకపాత్ర పోషించిన న్యూజిలాండ్ మాజీ పేసర్ మిచెల్ మెక్‌క్లెనగన్‌ను కొత్త బౌలింగ్ కోచ్‌గా ఎంచుకున్నారు. అలాగే 2024, 2026 టీ20 ప్రపంచకప్‌లు గెలిచిన భారత జట్టు కోచింగ్ బృందంలో పనిచేసి విశేష గుర్తింపు తెచ్చుకున్న టి. దిలీప్‌ను ఫీల్డింగ్ కోచ్‌గా, మాజీ పేసర్ ధవళ్ కులకర్ణిని డెవలప్‌మెంట్ బౌలింగ్ కోచ్‌గా నియమించారు. ఇటీవల బౌలింగ్ కోచ్‌లు లసిత్ మలింగ, పరాస్ మాంబ్రేలతో పాటు ఫీల్డింగ్ కోచ్ కార్ల్ హాప్‌కిన్‌సన్‌లకు సాగనంపిన ముంబై, ఇప్పుడు హెడ్ కోచ్ పొలార్డ్ నాయకత్వంలో సరికొత్త ధీటైన కోచింగ్ బృందంతో బరిలోకి దిగుతోంది.