IPL 2027: ఈ రూ. 18 కోట్ల ఓపెనర్‌పై 3 జట్ల కన్ను.. ఇంతకీ ఎవరా ప్లేయర్.?

IPL 2027: ఐపీఎల్ 2027 వేలానికి ముందు రిటెన్షన్, రిలీజ్ జాబితాలు ఖరారు చేయడానికి నవంబర్ 17 చివరి గడువు. ఈ నేపథ్యంలో రాజస్థాన్ రాయల్స్ తమ స్టార్ ఓపెనర్ యశస్వి జైస్వాల్‌ను ట్రేడ్ చేసే చర్చల్లో ఉందని రిపోర్టులు వచ్చాయి. అయితే ఈ రూమర్స్ ఉన్నా జైస్వాల్ ఇప్పటికీ రాజస్థాన్ ప్రణాళికల్లో కీలకంగానే ఉన్నాడని ఫ్రాంచైజీ వర్గాలు చెబుతున్నాయి. ఈ ఎడమచేతి వాటం ఓపెనర్ ఐపీఎల్‌లో 152.79 స్ట్రైక్ రేట్‌తో 2,593 పరుగులు చేశాడు. జైస్వాల్ పేరు ముందుగా ముంబై ఇండియన్స్‌తో ముడిపడింది. హార్దిక్ పాండ్యాను రాజస్థాన్‌కు ఇచ్చి, జైస్వాల్‌ను ముంబై తీసుకునేలా రెండు ఫ్రాంచైజీలు కొన్ని నెలల క్రితం చర్చలు జరిపాయని సమాచారం. అయితే ఆ చర్చలు ప్రస్తుతం నిలిచిపోయాయని జాతీయ మీడియా తెలిపింది. కెప్టెన్సీ డిమాండ్లు, పర్స్ సమీకరణాలే ఈ ప్రతిష్టంభనకు కారణమని కొన్ని రిపోర్టులు చెబుతున్నాయి. అయినా అలాంటి ట్రేడ్ పూర్తిగా అసాధ్యం కాదని కూడా పేర్కొన్నాయి.

రాజస్థాన్ దగ్గర ఇప్పటికే మరో యువ ఎడమచేతి వాటం ఓపెనర్ లుహాన్-డ్రె ప్రిటోరియస్ ఉన్నాడు. అందువల్లే జైస్వాల్ ట్రేడ్ ఆలోచన పుట్టిందని విశ్లేషకులు అంటున్నారు. జైస్వాల్ రాజస్థాన్‌తో కనీసం మరో సీజన్‌కు కాంట్రాక్ట్‌లో ఉన్నాడు. అతడిని రూ. 18 కోట్లకు ఆ జట్టు రిటైన్ చేసుకుంది. ముంబైలో కూడా అతడు ఆడేందుకు సిద్ధంగా ఉన్నాడని రిపోర్టులు చెబుతున్నాయి. జైస్వాల్ వస్తే రోహిత్ శర్మకు ఓ భారత ఓపెనింగ్ భాగస్వామి దొరుకుతాడు. భవిష్యత్తులో కెప్టెన్సీ అభ్యర్థిగా కూడా అతడిని చూడవచ్చు. కోల్‌కతా నైట్ రైడర్స్‌కు జైస్వాల్ పెద్ద బలమవుతాడని కొన్ని విశ్లేషణలు చెబుతున్నాయి. అజింక్య రహానే రిటైర్మెంట్ తర్వాత కేకేఆర్ కొత్త కెప్టెన్, టాప్ ఆర్డర్ బ్యాటర్ కోసం చూస్తోంది. జైస్వాల్ ఈ రెండు పాత్రలనూ పోషించగలడు. ఫిన్ అలెన్‌తో కలిసి విధ్వంసకర ఓపెనింగ్ జోడీ కూడా అవుతాడు. కేకేఆర్ కామెరాన్ గ్రీన్ (రూ. 25.20 కోట్లు), మతీషా పతిరణ (రూ. 18 కోట్లు)ను విడుదల చేసే అవకాశం ఉంది. దీంతో జైస్వాల్‌ను తీసుకునేందుకు ఆ జట్టు దగ్గర తగినంత పర్స్ ఉంటుంది.

లక్నో సూపర్ జెయింట్స్ కూడా కొత్త కెప్టెన్ కోసం వేట మొదలుపెట్టింది. రిషభ్ పంత్ ట్రేడ్ అయ్యాక జట్టు నాయకత్వం ఖాళీ అయింది. ఐడెన్ మార్క్రమ్, మిచెల్ మార్ష్ బలమైన అభ్యర్థులైనా, యజమానులు భారత ఆటగాడికే ప్రాధాన్యం ఇవ్వవచ్చు. నాణ్యమైన భారత బ్యాటర్ లేకపోవడం కూడా జట్టు లోపమే. జైస్వాల్ రాకతో ఈ లోపం తీరుతుంది. రిటెన్షన్ గడువుకు ముందు ఈ ట్రేడ్ ఊహాగానాలపై రాజస్థాన్ లేదా ఇతర ఫ్రాంచైజీల నుంచి అధికారిక ప్రకటన ఇంకా రాలేదు.