IND Vs PAK: భారత్ - పాకిస్థాన్ మెగా ఫైనల్‌కు వర్షం ముప్పు.. మ్యాచ్ రద్దయితే విజేత ఎవరంటే?

IND Vs PAK: ఆసియా క్రీడల టోర్నమెంట్‌లో భాగంగా పురుషుల క్రికెట్ పసిడి పతకం కోసం చిరకాల ప్రత్యర్థులైన భారత్, పాకిస్థాన్ జట్లు అమీతుమీ తేల్చుకునేందుకు సిద్ధమయ్యాయి. అయితే ఈ ఉత్కంఠభరితమైన మహాసమరానికి జపాన్‌లోని నిస్షిన్ నగరంలో వాతావరణం కాస్త ఆందోళన కలిగిస్తోంది. మ్యాచ్ జరిగే సమయంలో వర్షం పడే అవకాశం ఉందంటూ వాతావరణ శాఖ హెచ్చరికలు జారీ చేయడంతో క్రికెట్ అభిమానుల్లో టెన్షన్ మొదలైంది. అసలే దాయాదుల పోరు కావడంతో ఈ మ్యాచ్‌పై భారీ అంచనాలు ఉన్నాయి.

నిస్షిన్ ప్రాంతంలో శనివారం ఉదయం పూట సుమారు 62 శాతం మేర వర్షం కురిసే అవకాశం ఉందని నిపుణులు అంచనా వేస్తున్నారు. అయితే మధ్యాహ్నం సమయానికి ఈ సంభావ్యత 25 శాతానికి తగ్గే ఛాన్స్ ఉంది. ఉష్ణోగ్రత దాదాపు 20 డిగ్రీల సెల్సియస్ వద్ద కొనసాగనుండగా, ఆకాశం మేఘావృతమై ఉండే అవకాశం ఉంది. వర్షం కారణంగా మ్యాచ్ ఆలస్యం కావడం లేదా అంతరాయం కలగడం జరిగితే ఆటగాళ్లతో పాటు నిర్వాహకులకు కూడా ఇబ్బందికర పరిణామమే అవుతుంది.

మ్యాచ్ రద్దయితే నిబంధనలు ఏం చెబుతున్నాయి?

ఒకవేళ వర్షం కారణంగా ఈ ఫైనల్ మ్యాచ్ పూర్తిగా రద్దైపోయి ఫలితం తేలకుంటే, ఆసియా క్రీడల నిర్వాహకుల తాజా ప్లేయింగ్ కండిషన్స్ ప్రకారం భారత్, పాకిస్థాన్ జట్లు రెండూ సంయుక్త విజేతలుగా ప్రకటిస్తారు. ఎలాంటి రన్నరప్ కేటగిరీ లేకుండా రెండు జట్లకు సంయుక్తంగా పసిడి పతకాన్ని అందజేస్తారు. గతంలో జరిగిన 2023 ఆసియా క్రీడల సమయంలో ఫైనల్ మ్యాచ్ వర్షం వల్ల రద్దయినప్పుడు, మెరుగైన ర్యాంకింగ్ ఉన్న భారత్‌ను విజేతగా ప్రకటించారు. కానీ ప్రస్తుత 2026 టోర్నమెంట్‌ నిబంధనల ప్రకారం ర్యాంకింగ్ ఆధారంగా కాకుండా ఇరు జట్లకు గోల్డ్ మెడల్ పంచుతారు.

రిజర్వ్ డే లేకపోవడమే పెద్ద సమస్య

ఈ ప్రతిష్టాత్మక గోల్డ్ మెడల్ మ్యాచ్ కోసం నిర్వాహకులు ఎలాంటి రిజర్వ్ డేని కేటాయించలేదు. దీనివల్ల వాతావరణం అనుకూలించకపోతే మ్యాచ్‌ను మరో రోజుకు మార్చే అవకాశం ఉండదు. శ్రీలంకతో జరిగిన సెమీఫైనల్ మ్యాచ్‌లో అద్భుతమైన ప్రదర్శన కనబరిచిన భారత జట్టు ఫైనల్‌కు దూసుకెళ్లింది. బౌలర్లు, బ్యాటర్లు సమిష్టిగా రాణించి ఫైనల్‌లోనూ విజయం సాధించి పతకాన్ని నిలబెట్టుకోవాలని పట్టుదలగా ఉన్నారు. మరి వరుణుడు కరుణించి ఎలాంటి అంతరాయం లేకుండా పూర్తి మ్యాచ్‌ను చూసే అవకాశం కల్పిస్తాడో లేదో వేచి చూడాలి.